Na teena e le afioga i le alii Senatoa ia Magalei Logovi’i i le taeao ananafi, se vaega o le saunoaga a le alii Kovana ia Lolo Moliga i le aso Gafua na te’a nei, fai mai e tusa ma le $30 miliona tupe lotoifale a le malo ua le mafai ona toe faatumu mai e le malo tele, i le mae’a lea ona faaaoga e le malo e faatino ai galuega, ma le faamoemoe a maea ona toe totogi mai lea e le malo feterale.

Na taua e le alii senatoa e faapea, le i tupu fo’i se mea faapena i le taimi sa avea ai o ia ma Teutupe a le malo mai le tausaga e 2009 e oo mai i le tausaga e 2012.

Taua e Lolo faapea, o lea tupe e $30 miliona ua le mafai ona aoina sa tula’i mai i le va o le 2009 ma le 2012.

“O a’u na avea ma teutupe a le malo i le taimi tonu lea na taua e le alii kovana i lana saunoaga na amata ai le faaletonu lea, ma ou te ta’utino atu i luma o le maota, e le i tupu se mea faapena i le taimi na ou teutupe ai,” o le saunoaga lea a Magalei.

Na taua e le afioga i le kovana sili i le aso Gafua na te’a nei, o se tasi o faafitauli tele o lo o fetaia’i ma le malo i le taimi nei i tulaga o ana tupe faalotoifale, o le tele o ana tupe faalotoifale sa faaaoga ina ua tuai ona taunuu mai tupe feterale e faatino ai galuega ma auaunaga a le malo, ua le mafai ona toe faatumu mai e le malo tele.

Mo se faataitaiga e pei ona saunoa Lolo, e tusa ma le $30 miliona tupe lotoifale a le malo ua le mafai ona toe faatumu mai e le malo tele, e mafua mai ina ua le faia galuega a le malo e tatau ona fai, ina ia toe faatutumu mai ai nei vaega tupe.

Ae ui i tulaga faaletonu e pei ona saunoa le alii kovana, o se tala fiafia sa ia toe faaalia i luma o le fono, o le isi fa vaiaso o lo o lumana’i nei o le a toe faatumu mai ai e le malo tele ni isi o vaega tupe lotoifale a le malo sa faaaoga i nisi i tautua ma auaunaga masani a le malo.

Mai le $30 miliona e pei ona saunoa Lolo ua le mafai ona toe faatumu mai e le malo, o le $20.1 miliona o lea tupe ua le mafai moni lava ona toe faatumu mai, ma o lo o galulue i ai le faigamalo atoa ai ma le faa faigaluegaina o se tagata e i ai ona agavaa i mataupu faapenei, mo le tau sailia o auala e toe faatumu mai ai tupe nei a le malo.

O se tasi o faafitauli na taua e Lolo o lo o mafua ai lenei faaletonu, o ni isi o polokalame sa faatupe e le feterale na faaaoga i ai tupe lotoifale ma le faamoemoe e toe faatumu mulimuli mai e le feterale, ua tapunia ia polokalame.

I le taimi o folafolaga a le maota maualuga i le taeao ananafi, na matua teena ai e Magalei saunoaga nei a le alii kovana.

Na taua e Magalei e faapea, na te le iloa pe silafia e le alii kovana, o ia sa avea ma teutupe a le malo i le taimi tonu lea sa ia taua na tula’i mai ai tulaga faaletonu i tupe lotoifale a le malo, ina ua le toe totogiina mai e le feterale.

Na faamanino e Magalei e faapea, o le tupe e pei ona taua e le alii kovana, e le $30 miliona e $26 miliona, ae le o le taimi fo’i na avea ai o ia ma teutupe a le malo na tulai mai ai le faafitauli lenei, o tua atu o lona taimi i ni isi o nofoaiga ua mavae atu.

“E le i tupu i le va o le 2009 ma le 2012 le faaletonu lenei e pei ona saunoa le alii kovana, ae afai fo’i o lea ua saunoa le alii kovana, i le $30 miliona sa le mafai ona toe faatumu mai e le malo tele, e $20.1 miliona mo’i lava le tupe ua le mafai ona toe faatumu, o le fesili la ua tula’i mai, o fea ua ave i ai le isi $8 miliona pe afai o le saunoaga lea a le alii kovana,?” o le fesili lea a Magalei.

Saunoa Magalei, e le logo lelei i lana faalogologo le mataupu e pei ona saunoa i ai le alii kovana, ae fai o lea ua saunoa Lolo i tulaga moni e pei ona ia taua, e tatau la ona aami se ripoti a le teutupe a le malo ina ia faamaonia ai numera ma faamaumauga e pei ona taua e le alii kovana.

Na saunoa le taitaifono o le komiti o le paketi a le maota maualuga ia Laolagi Fonoti Savali Vaeao e faapea, e tatau ona aami le teutupe a le malo ina ia tuuina mai ripoti mo mataupu o lo o fesiligia e afioga i senatoa, ina ia manino ma malamalama ai tulaga uma e pei ona taua.

E le i faamautu mai le taimi ma le aso e faia ai le iloiloga al e maota maualuga, mo le talanoaina o lenei mataupu.