O le ali’i lea o lo o tu’uaia e le malo sa ia fa’aaoga se uaea moli e titina ai le ua o lona to’alua, ma i’u ina maliu ai o ia ina ua tuana’i aso e 10 talu ona taofia o ia i le falema’i, ua ia teena tu’uaiga fa’asaga ia te ia i luma o le fa’amasinoga maualuga i le vaiaso na te’a nei.

I le teena ai e le ua molia i moliaga o tu’uaiga fa’asaga ia te ia, ua fa’atulaga ai loa e le fa’amasinoga lana ulua’i iloiloga e faia lea i le aso 16 Me 2016.

E pei ona taua i fa’amaumauga a le fa’amasinoga, o le molimau a le atali’i a le ua molia e 9 tausaga sa tu’uina atu i lana faiaoga, na mafua ai loa ona logo e le faiaoga leoleo e uiga i lenei mataupu, ma afua ai loa ona tu’uaia e le malo le ua molia e uiga i lenei mataupu.

Sa i ai i totonu o le potu fa’amasino le ali’i e 9 tausaga i le taimi na faia ai le ulua’i iloiloga a lona tama, ma ina ua mae’a le iloiloga a le ua molia, sa vaaia e le Samoa News le aga’i atu o le ua molia ma fusi lona atali’i, a o laulaututu ni isi o lona aiga.

E pei ona taua i fa’amaumauga a le fa’amasinoga e fa’apea, o le aso 12 Fepuari 2016 na logo ai e le ua molia le Ofisa o le EMS mo se fesoasoani, ina ua ia molimauina se tulaga fa’aletonu i lona to’alua, ae o le aso 22 Fepuari na maliu ai le tina i le falema’i i Fagaalu.

Na taunu’u sui o le EMS ma auina mai le tina mai lo latou aiga i Faleniu, ma auina atu loa i le falema’i, lea na taoifa ai le tina na a’afia e 29 tausaga le matua i le potu tigaina, ona o tulaga matuia i lona soifua maloloina.

Na fa’ailoa e le ua molia i leoleo e fa’apea, o lona to’alua sa taumafai e pule i lona soifua, o le mafua’aga lea o le fa’afitauli e pei ona a’afia ai o ia.

O le aso 17 Fepuari na logoina ai e le faiaoga a le ali’i e 9 tausaga le ofisa o leoleo e uiga i lenei mataupu, i le mae’a ai lea ona fa’amatala e le tamaititi i ni isi o tama ma teine aoga vaaiga sa ia maitauina i lo latou aiga, i le taimi na titina ai e lona tama lona tina i toton o le potu, e fa’aaoga ai le uaea moli.

Na taua e le faiaoga lona lagona o le taimi na fa’amatala ai e le tamaititi le tala i le mea sa tupu i isi fo’i tamaiti aoga, e pei o le taimi na kiki ai e lona tama lona tina, titina lona ua e fa’aaoga ai le uaea moli, atoa ai ma lona ta toso o lona ulu i luma ma tua.

Na taua e le tamaititi le taumafai o lona tina e ee i luga, peita’i sa le mafai, sa ia mana’o fo’i e fia fesoasoani i lona tina peita’i e leai se mea na te mafaia, ona sa fa’ailoa atu e lona tama ia te ia, afai na te fa’amatalaina i se tagata matua le mea sa ia vaai i ai, na te faia fo’i le mea lava lea e tasi ia te ia.

Na fa’amatala e le tamaititi i leoleo e fa’apea, o le ita tele o lona tama i lona tina na mafua ai loa ona fasi e lona tama lona tina.

O moliaga mamafa o lo o tu’uaia ai le ali’i ua molia e aofia ai le fasioti tagata i le tulaga lua, fa’aoolima i le tulaga muamua, atoa ai ma isi moliaga mama e aofia ai lona tu’uina atu o ripoti pepelo, fa’apea ai le fa’atupu vevesi i nofoaga faitele.

O lo o taofia pea le ua molia e aunoa ma se tupe ua fa’atulaga e tatala ai o ia i tua mai le toese i Tafuna.