Ua fa’aalia e le kamupani sa latou sapalaia le suau’u mo le ASPA  lo latou fesiligia o se fa’afinauga a le malo o Amerika Samoa, fai mai e $88 miliona le tupe mo lafoga o lo o latou nofo aitalafu ai mo le malo talu mai le 2009 e oo mai i le 2012.

O lea tete’e o lo o taua e le kamupani a le ExxonMobil Asia Pacific PTE i se latou talosaga sa faila i le fa’amasinoga i le masina na te’a nei, i le mae’a ai lea ona latou maua o se talosaga sa fa’aulu e le Matagaluega o Tupe a le malo.

O isi o lo o faia fa’asaga i ai le tagi a le kamupani e ese mai i le malo e aofia ai le Teutupe ia Dr. Falema’o Phil Pili, o le matagaluega o Tupe a le malo, faapea ai ma le alii kovana ia Lolo Matalasi Moliga.

O lo o taua i le talosaga a le malo sa fa’aulu e fa’apea, e tusa ma le $88.6 miliona le tupe o lo o nofo aitalafu ai le kamupani ae i le tali a le kamupani e tusa ai o le tagi a le malo, o lo o teena ai e le kamupani tulaga uma e pei ona taua e le malo, i le tulaga o ana tupe maua faapea ai tupe e maua mai i le lafoga.

MALILIEGA SA FAIA

E tusa ai o se vaega o le tali a le kamupani o lo o taua ai e faapea, o le masina o Tesema 2008 na amata sapalai ai e le kamupani le suauu mo le Pulega o le Eletise ma le Suavai (ASPA), ma o lea fo’i maliliega sa faia i fafo atu o le teritori o Amerika Samoa, e leai fo’i ni tagata faigaluega a le kamupani sa galulue i totonu o Amerika Samoa i le taimi na fa’atinoina ai lea maliliega.

I le taimi atoa e pei ona taua e le ExxonMobile  i le latou tagi, e fa’atasi i le masina ona kiliva mai e le kamupani le suau’u i le ASPA, ae i le va o le 2009 e oo mai i le 2013, e silia i le 20 isi va’a sa latou la’uina mai le suau’u mo le ASPA i le teritori.

O malaga uma nei e taunuu uma lava i le uafu e pulea e le malo, ae tusa ai ma aiaiga o le maliliega, o le aso 30 o Novema o tausaga taitasi o le maliliega, e feiloa’i ai le sui o le ASPA ma le kamupani mo le talanoaina o tulaga o le feagaiga o lo o fa’agasolo.

TULAGA O LAFOGA

E tusa ai ma se vaega o le talosaga a le kamupani, o tupe mama uma sa mafai ona maua mai le feagaiga ma fefaatauaiga sa faia, sa faamauina uma o lafoga totogi ia i totonu o le malo o Sigapoa, e pei ona taua i faamaumauga a le malo o Sigapoa.

Taua fo’i e le kamupani, e le o mafai e le teutupe a le malo ona ia faamaninoina pe faapefea ona maua le aofa’i o le lafoga e pei ona taua i le latou tagi.

E talitonu le malo, o tupe uma sa maua e le kamupani mai fefaatauaiga sa faia ma le ASPA, o le lafoga uma e tatau ona maua e totogi i Amerika Samoa.

fa’aliliu Ausage Fausia