O le ali’i foma’i sa avea ma se tasi e ala atu ai sa'iliga fa’alilolilo a Amerika i le nofoaga o i ai le ali’i sa latou mo’omia ona maua, Osama bin Laden, ua fa’ailoa mai lona fa’ai’uga ua faia i ai e le malo o Pakisitana, e 33 tausaga e nofosala ai i le falepuipui.

Ua fa’aalia nei la se lagona o le tama’ita’i o avea nei ma Failautusi a le Iunaite Setete o Amerika, Hillary Clinton, ua le talafeagai tele lea fa’asalaga ua molia ma fa’asalaina ai le ali’i foma’i o Shakil Afridi, e le tatau lea tulaga ua faia e le fa’amasinoga a Pakisitana.

Ua faia lana fa’amatalaga lea aua ua mae’a ona faia se fa’ai’uga a le Senate i la latou Komiti ina ia fa’aagaaga e le Malo o Amerika le $33miliona po ’o le 21miliona Pauni mo le Malo o Pakisitana.

O le ali’i foma’i na saisaitia lava i sona moliga o le fa’alataina o se tasi o ona tagatanu’u, ona o le ala sa fa’aaogaina ai o ia e Amerika o le avea lea o ana asiasiga ia Osama bin Laden ma ala e o’o atu ai se tasi ia te ia, ma iloa patino ai le nofoaga o i ai, ae maise o ana togafitiga o Osama, ua avea lava ma mea e iloa patino ai gasegase i le ali’i ta’ita’i ‘au a le ‘al Qaeda’.

Na mafai ai e Amerika ona fa’ao’o le oti ia Osama i Abbottabad, Pakisitana ia Me 2, 2011. ìUa le talitonu Amerika o le a saisaitia fua fa’apenei le ali’i foma’i,  Peita’i e fa’anoanoa tele Amerika i lenei mea ua alia’i mai, ua saisaitia ma o le i’uga o le a nofosala ai ma le silia ma le 30 tausaga i le To’ese.

Ua le manofonofo ai la i’ina le tama’ita’i Failautusi a Meleke, ae ua ia fa’ailoa mai, o le a ia taumafai lava e fa’amatu’u mai e ta’ita’i o le malo o Pakisitana lea fo’i fa’ai’uga ua latou faia i le ali’i foma’i. O le fasiotia fo’i o Osama bin Laden, ua i ai sona afaina i le va o Amerika ma Pakisitana e o’o mai i le taimi nei.

Ua fa’ailoa mai e Pakisitana, ua foliga mai ua maasiasi i latou i le o atu lava o Meleke aumai lea toa o le latou atunu’u mai o latou 'ele'ele, ae le o i latou e i latou o i ai o ia i lo latou malo. Ua fa’ailoa mai e Islamabad, e foliga mai o le ali’i foma’i lea sa avea e pei se sipai i totonu o lo latou malo mo Amerika ma e le ’i sasi lava le fuafuaga o lea osofa’iga, o le ala lea ua molia ai le ali’i foma’i ona ua ia fa’alataina lona atunu’u.

E le ’i i ai lava se va i le maua o bin Laden ma le saisaitia loa e leoleo a Pakisitana o le ali’i foma’i a Osama mo tausaga e tele. Ua latou iloa lelei, o ia lea sa uia atu ni isi o fa’amatalaga maumaututu ia Amerika i le nofoaga o i ai Osama.  I se fa’amatalaga mai, ìI so ’o se malo lava, e faia lava fo’i lea faiga ia i latou ua masalomia sa sipai i ituaiga osofa’iga pea i ni isi o lo ’o alaala tumau i o latou laufanua, e fa’afalepuipuia ma e o’o lava i le fa’asalaga i le oti pe afai e tu’u i isi malo.î

Na mafai ona fa’amaonia moliga o le ali’i foma’i o Dr. Afridi i Khyber  ma sa fa’asalaina loa i le $3,500. Ana fa’apea e le mafai ona ia totogia lea tinoitupe i le taimi lea, e toe fa’aopoopo fo’i le isi 3 tausaga i le fa’asalaga i le falepuipui.î

I le taimi nei o lo ’o lokaina le fomai i le falepuipui i Peshawar, ae le ’i i ai fo’i si foma’i i lona iloiloga, ina ia mafai ona faia sana finauga i lona fa’amasinoga.  I le masina o Iuni i le tausaga ua te’a, sa fa’ailoa mai ai e sui iloga o Pakisitana  ua mae’a lokaina e la latou vaega 'au ni isi ua masalomia sa fesoasoani ia Amerika i la latou osofa’iga e saisaitia ma fa’ao’o le oti ia Osana bin Laden. O ni isi sa saisaitia ona o le latou fa’apaina a’e o ni felea e mafai ai ona va’aia e 'ave va’alele a Amerika le nofoaga tonu e tulau ’ele’ele ai i le taimi o le osofa’iga.

 saunia: Leua Aiono Frost