Ads by Google Ads by Google

Tete’e Fagatogo ia Charlie

E silia ma le 600 ni tagata Fagatogo ua mae’a sainia se pepa e fa’aalia ai lo latou tete’e i se taumafaiga a le malo ma le StarKist Samoa, ina ia fau se fulisa tele e teu ai i’a, i le fanua lea o lo o i le va o le ofisa i le uafu tele a le malo ma le uafu lea o lo o taula ai le Lady Naomi.

O le amataga o le vaiaso na fa’ao’oina atu ai lenei tusi tete’e mai i le afioga Afoa L. Su’esu’e Lutu ia Brett Butler, le pule sili a le StarKist Samoa, ma kopi mo le afioga Togiola Tulafono, ta’ita’i o le Fono fa’apea le sui o le Interia i totonu o Amerika Samoa, ia Lydia Faleafine-Nomura.

Na ta’ua i lenei tusi le lagolagoina e i latou na sainia, ia le kamupani a le StarKist Samoa ae le gata i lea, o le agaga fa’afetai e tusa ai ma la latou vaega i le siitia o le tamaoaiga a Amerika Samoa.  Ae peita’i, e latou te le lagolagoina le fausia o lenei fulisa tele e teu ai i’a i le uafu i Fagatogo.

O lo o ua taofi i latou nei, e tatau lava ona fa’amautu i le nofoaga o lo o i ai nei le StarKist, ia so’o se fale po o so’o se tulaga e mana’omia e le kamupani i’a.  A le o lea, ona ave lea i le paka i Tafuna lea ua ma’oti mo pisinisi tetele (Industrial Park).

Ua ioe tasi i latou na sainia lenei lava talosaga, ina ia le a’afia ia le Fagaloa i manogi leaga, o asu e ono a’afia ai le soifua maloloina o tagata fa’apea le pisi o ta’avale i luga o le alatele.  Ma na latou ta’ua le i ai o ni isi nofoaga e mafai ona fa’atu ai lenei fulisa tele a le StarKist.

Na fa’aalia atu e Afoa ia Butler, le to’atele o i latou ua mae’a ona sainia o latou suafa i lenei tusi tete’e ma o lo o i ai se fa’amoemoega maualuga o Afoa, o le a fa’ao’oina atu e Butler lenei fe’au taua i le pulega a le StarKist i Kolea i Saute.

O i latou ua mae’a ona sainia lenei tusi, e aofia ai i latou mai i afioaga o Vatia, Pago Pago, Leone, Tafuna, Fagasa, Nu’uuli, Futiga, Matu’u, Faga’alu, Aua ma Taputimu.

Na fa’aalia e Afoa, e ui i le agaga fa’afetai ona o le tele o fa’amanuiaga ua maua e le teritori mai i le StarKist, ae peita’i, e le mafai ona o latou ioe i lenei fuafuaga mo le fa’atuina o se fulisa tele e teu ai i’a a lenei kamupani i Fagatogo, ae o lo o i ai isi nofoaga e mafai ona fa’atino ai lea fuafuaga.

Na ta’ua e Afoa, i se la talanoaga ma le tofa Taeaoafua Dr. Meki Solomona, se tasi o taitai i le StarKist, ua mae’a ona fa’ata’atia ni isi o fuafuaga mo le atina’eina o le Fagaloa.

Na fa’aalia e Afoa, e ui lava o le sini autu a le StarKist o le tupe fa’asili, ae peitai, o lo o i ai sona talitonuga maumaututu, o le alofa fa’amaoni o le StarKist i le atunu’u, o le a taliaina ai le latou talosaga.

Na fa’ao’oina atu fo’i e Afoa ia Butler, sana tusi na tusia i le aso 18 o Ianuari, na fa’ao’oina atu i le kovana, e fa’aalia ai lona tete’e i lenei fuafuaga.

I le lua vaiaso ua mavae, na fa’aalia ai e le peresetene ma le pule sili a le Starkist, o In-Soo Cho, ia le i ai o se fuafuaga mo le fa’atuina o le latou fulisa tele i le va o uafu e lua i Fagatogo ma na ta’ua e In-Soo, ona e na’o le pau lava oloa o le a teuina i lea nofoaga, o oloa tu’u ‘aisa, ua i ai so latou talitonuga, o le a le tele se fa’alavelave i isi galuega a uafu e lua, ma e le a’afia ai fo’i le siomaga.

I se ripoti ua fa’ao’oina mai i le Samoa News, o lo o ta’ua ai le fa’aauau ai pea ona aoina suafa o tagata i luga o le latou tusi talosaga ma se fa’amoemoega, e fa’ao’oina atu lenei tusi ia Butler i le vaiaso fou.  O lo o ta’ua e i latou o lo o  sainia lenei talosaga, e ui i saunoaga a In-Soo, e na’o se fulisa e teu ai oloa tu’u ‘aisa, ae peita’i, o lo o i ai so latou talitonuga, o lo o i ai se fa’amoemoega a le StarKist e amata ona aga’i mai i’i a latou va’a fagota e la’u sa’o mai ai lava i’a mai i le uafu ma teu i totonu o le fulisa, atonu o le mafua’aga lea o lo o mana’o ai le StarKist e fa’atu le fulisa i luga o le uafu.

Na lomia i le lomiga a le Samoa News o le aso 20 Ianuari, 2012 le tusi a Afoa na fa’ao’oina atu i le Kovana.  O le aso 19 o Ianuari, na lomia ai saunoaga mai i le peresetene ma le pule sili a le StarKist.

Ae o le aso 13 Tesema, 2011, na ulua’i lomia ai e le Samoa ia se maliliega na sainia i le va o le kovana ma le StarKist, e lisi ai e le StarKist ia se vaega o le fanua a le malo i luga o le uafu a le malo i Fagatogo.