Ads by Google Ads by Google

Tepa i le Tuana’i, Tapena ai le Lumana’i

O le ulua’i avanoa ua maua e le pa’ia o le Autalavou a le Ekalesia Metotisi i Leloaloa e fa’atino ai lo latou sao matagofie i galuega tapena a le Amerika Samoa Humanities, ina ia avea le “Tagata o Ananafi ma le Aso e Fa’atamaoaigaina le Tagata o a Taeao,” na matua latou faia ai le measili.

Ole latou manulauti, sa fili fa’apitoa e fa’apea: “Tepa i le Tuana’i, tapena ai le Lumana’i!” Ona latou saunia lea o le sauniga lotu e amatalia ai le latou fa’atinoga o lea manulauti i le afiafi o le aso Gafua i le latou malumalu lava, ma sa foliga o se lotu a tamaiti lea afiafi, i le latou toniga papa’e atoa sa lae’ia.

Ina ua tutula’i le Fa’afeagaiga Falefia Tupu, ma ia folafola le upu apoapoa’i a Paulo i lona atali’i fa’aleagaga o Timoteo lea sa ia fa’apea ai, “Ua ou manatua le fa’atuatua fa’amaoni ua ia te oe, sa mua’i i ai ia Loi le tina o lou tina, atoa ma Eunike lou tina, ma ou te iloa o lo’o ia te oe fo’i. O le mea lea, ou te toe fa’amanatu atu ai ia te oe, ia fa’amumu le meaalofa mai le Atua, o lo’o ia te oe lea, i le fa’ae’e atu o o’u lima!” 2 Timoteo 1:5,6.

O le toe fa’atepa o le Autalavou a le Leloaloa i le matati’a sa fa’atula’ia e o latou tupu’aga, ua taumafai pea e fa’atumu tulaga a’ao na, e fa’ailo ai, o lo’o latou maua le ulua’i alofa sa i ai i o latou tua’a mo le galuega a le Atua mai le amataga o le o’o mai i laufanua o Amerika Samoa.

“O le malumalu Metotisi lenei i Leloaloa, o le ulua’i malumalu lea na fa’atuina mo lea Ekalesia i Tutuila atoa nei. Na fa’ato’ai mai le Metotisi i le tausaga e 1905, ma ua atoa nei le 105 tausaga o lo’o mumu pea lea sulu!” O se fa’amatalaga lea a Rev. Falefia Tupu le failauga.

“O le a se pine fa’amau o lo’o i ai le Metotisi i Amerika Samoa?” O le tali sa tu’u mai ai se tala’aga o tautua a le Aufaigaluega Paia e afua atu o latou tupu’aga i Amerika Samoa.

“O lea e le’i toe fa’aluaina lava le auaunaga ua loa ona taoto mai mo tupulaga galulue o le Autalavou ma le Ekalesia Metotisi i Leloaloa ma Amerika Samoa atoa, o lo’o ua tamau i le tu’ugamau o lo’o autafa o lenei malumalu.”

I lea tu’ugamau ua tusia ai suafa nei: “Rev. Venitura Taeao Tauanu’u ma Mrs. Epi Ioane Tauanu’u.” I le tala na fofola mai i le polokalama fa’atino, ua fa’ailoa mai ai, “O le ulua’i Sea lea ua tofia i ai se alo o Amerika Samoa i le Ekalesia Metotisi. O le ulua’i Peresetene Aoao fo’i lea o le Ekalesia Metotisi e tupuga atu i Amerika Samoa! Peita’i, e le’i toe fa’aluaina lea tulaga e se tasi Failauga mai le Motuosalaia nei!”

Ina ua pa’u lea fa’amaumauga, o se mea e tatau ona fa’amau e avea ma “toe tepa i ai” a le tupulaga o le aso ma a taeao, ina ia fai ma fa’amanatu e ola ai le tupulaga o a taeao. O le toe fafagu fa’aleaganu’u, ua latou suati mai ai i luga le olaga fa’asamoa i le va o le tama ma lona tuafafine, le va o matua ma le fanau, le va o le matai ma lona aiga! “Ia so’o le pa lea i le alofa ma le fa’aaloalo e pei ona tapui mai ai e matua i aso ua tuana’i, ia manatua e tupulaga o le aso, ae ia fa’a’au’upegaina ai le fanau o a taeao!”

Na saunoa le Failauga, “O le gagana a Samoa o lana manulauti lea e ao ina matua ‘ave i ai le fa’amamafa ma le fa’ataua, ae o le tomua fo’i o galuega uma! E le mafai ona fa’ao’o telenoa le fe’au, se’i tulou, e afifi ma malutia i lana gagana!”

“Ua matele aso nei, i failauga, ua amata i le fa’asamoa, ae fesuia’i mai kia i le gagana peretania, ae sa le fa’apena le tuana’i i Samoa na atoa!”

Ua vaivai le tautala, ua vaivai le malamalama ai, ua vaivai atili fo’i le tusitusi i le gagana Samoa. “Ua le teuloto lau lea fa’asao mai anamua i ou ulua’i matua, ua mautinoa, ua amata ona tafea i le auau lea ulua’i tofi, ulua’i alofa ia te oe lava le Samoa moni!”

Ona o le amataga lea o le latou poloketi fa’atulaga, ua taoto ai le fa’aauauga o le latou sao, mo le latou aotelega i le fa’ai’uga o le latou tapenaga, ae lua ni a latou fa’atinoga e ala i le pese ma le fa’aevagelia sa fa’atino, ma ua fa’ailoa mai, o le fa’atoa fa’aalia lava lea o latou sao nei, i le afiafi o le aso Gafua mo le maimoaga a sui mamalu o le ASHumanities Council sa pa’au atu.