Ads by Google Ads by Google

TEPA I LE TA MALO

FA’ASEA PEA LE ATUNU’U I LE LEAI O NI LAISENE AVE TA’AVALE FOU

 

E to’alua ni tagata ave ta’avale i le atunu’u na o la fa’aalia i le Samoa News i le faaiuga o le vaiaso nei o la lagona le fiafia, ona ua avea le tuai ona maua o laisene ave ta’avale ma itu ua pala so’o ai i laua e leoleo i luga o le alatele.

 

Na taua e se tina e 43 tausaga mai Futiga e faapea, ina ua taofia o ia e se ali’i leoleo i le masina na te’a nei, sa ia faailoa i ai i le leoleo le lisiti mo lana laisene ave ta’avale ua uma ona totogi i le Ofisa o Ta’avale Afi a le malo (OMV) i Tafuna, ae le’i pu’eina ona e le’i taunuu mai le oka mai fafo.

 

I le vaiaso na te’a nei, na toe taofia ai fo’i o ia e le leoleo ma toe fesiligia e uiga i lana laisene ave ta’avale, lea fo’i na ia fa’amatala i ai le tala lava lea e tasi, ae na aea ma itu na tetele atu ai saunoaga a le leoleo ia te ia.

 

O le molimau fo’i lea a se ali’i ave taxi na tuuina mai i le Samoa News e tusa ai o le faafitauli na la fetaia’i i le vaiaso na te’a nei, ina ua otegia o ia e le leoleo i le leai o sona laisene aveta’avale.

 

Na taua e le ali’i komesina o Leoleo ia William E. Haleck i le Samoa News e faapea, e leai se mea o le a aafia ai fua le atunuu i le le maua o laisene ave ta’avale, ona e le o se faaletonu o le atunu’u, ae o le faaletonu a le latou matagaluega.

 

Na taua e se sui o le ofisa o le OMV e faapea, ua silia ma le fa masina o fa’atali le to’atele o le atunuu mo le pu’eina o a latou laisene ave ta’avale, ae ua i ai le faamoemoe o le masina fou e tatau ona taunu’u mai ai le latou oka mo laisene.

 

Na i ai le latou oka na aumai muamua peita’i na toe fa’afo’i ina ua aumai vaega mo laisene ave ta’avale e le o faapipi’iina mai ai le pine a Amerika Samoa.

 

FA’AMANINO FAATONU O AOGA LE FA’AIUGA E TU’UFA’ATASI AI AOGA I MANU’A

 

Na teena e le Fa’atonusili o le Matagaluega o Aoga a le malo ia Vaitinasa Dr. Salu Hunkin Finau fa’asea ma ni isi o tagata o le itumalo o Manu’a, i le faaituau lea o le faaiuga ua faia ina ia tu’ufaatasi le Aoga Tulaga Muamua a Faleasao ma Fitiuta i le faleaoga i Fitiuta.

 

Na taua e le fa’atonusil o aoga i le vaiaso na te’a nei e faapea, o le fa’aiuga ua faia ina ia tu’ufaatasia aoga tulaga muamau nei e lua i se nofoaga e tasi, e le gata na vaavaai i auala e faasaoina ai tupe mo le matagaluega o aoga ma le malo, ae sa vaavaai fo’i i le saogalemu o ola o fanau aoga i nofoaga o lo o i ai faleaoga i le taimi nei.

 

Na taua e se tasi o tama matua mai Manu’a e faapea, e ui e taua le finagalo o le malo e fa’atatau i le fa’aiuga ua faia, ae ao fo’i ona silasila le malo i le tulaga tau mamao o le a savalia nei e fanau mai Faleasao mo le aga’i atu i le aoga i Fitiuta, e le iloa fo’i ni fa’alavelave e tutupu i luga o le auala i aso uma o le a momoli ai fanau i le aoga, aemaise ai fo’i e i ai le vaega o le auala e latalata i le sami, ina ne’i tula’i mai se fa’alavelave e pei o se galulolo ma a’afia ai le pasi aoga a’o pisi i le momoliina o fanau i le aoga.

 

“Atonu e atugalu le matagaluega o aoga i le tulaga i tupe ina ia faasao mo le malo, ae o a’u nei o le matua ou te atugalu i ola o fanau ina ne’i tula’i mai ai se fa’alavelave, ona le aoga lea o nei mau tupe e taumafai e faasao ae ua le aoga ua ma’imau se soifua,” o le saunoaga lea a se tasi o tama mai Manu’a e le’i finagalo e faailoa lona suafa.

 

I le tausaga aoga na mavae atu nei, e sili laititi ma le 50 le aofa’i o fanau aoga na aooga i Fitiuta, ae o Faleasao pe a ma le to’a 80 tamaiti aoga.

 

Na faaalia e le afioga i le kovana sili ia Lolo Matalasi Moliga ina ua ia asia aoga i Manu’a i le masina o Me na te’a nei, e le taua le tofu o le nuu o Manu’a ma le aoga ae fa’aletonu faiaoga ma vaega o lo o a’oa’oina ai fanau aoga, ae lelei pe a tasi le aoga ae mautu vaega uma e a’oa’o ai fanau toe lelei fo’i ma faiaoga.