FAAILOA KOVANA OFISA MALO SILIMUSA LE LE USITA’I TULAFONO TA’AVALE AFI

E lima matagaluega a le malo na taua e le kovana sili ia Lolo Matalasi Moliga le silimusa ona le usita’i i le tulafono lea na ia faatula’i, e faasa ai le toe soona faaaoga o taavale a le malo i le tuanai ai o aso ma itula faigaluega i vaiaso taitasi.

O ia matagaluega e pei ona saunoa Lolo e muamua ai lava le Matagaluega o Tupe, sosoo ai le Ofisa o Aoga, Soifua Maloloina ae faaiu e le Ofisa o Tautua Lautele (DHSS) ma le Puipuiga o le Saogalemu Lotoifale (DHLS).

Saunoa Lolo e faapea, afai e faaauau pea ona le usita’i ofisa o le malo i le faamalosia o le tulafono lea, ae tula’i mai ni faalavelave i taavale a le malo ae aafia ai fanau a i latou o lo o faafoeina taavale a le malo, e pau le mamafa i luga o le malo.

Sa ia fautuaina foi faatonusili ina ia fautua i tagata faigaluega e soia le faitio soo i le galuega a le Masela o le Auala (Street Marshall) o lo o faia, e le o sona loto na mafua ai ona ia faia lea galuega ae o le tofiga sa tuuina atu e le malo ia te ia na te faia, i le vaavaaia lea o taavale a le malo e le o usitai i le tulafono ina ia loka ma taofia.

“Afai tatou te le tutu faatasi e faamalosi lenei tulafono, e ta’u mai ai iina e le o tatou o se vaega e tasi,” o le saunoaga lea a Lolo.

SAUNI MALO E FAAEA MALULU FALE TAALO I AOGA MAUALULUGAA

O se tasi o suiga ua faalauiloa e le alii kovana o le a faia i fale taalo (gym) a aoga maualuluga uma i le atunuu, e le gata o le a sui lona fausaga i totonu ae o le a faaea malulu uma foi ina ia faa faigofie ai e fanau aoga ona faaaoga fale taalo i taimi o taaloga atoa ai ma le suesueina o a latou mea aoga.

O le faafitauli o fale taalo o lo o i ai nei e pei ona saunoa le alii kovana sili ia Lolo Matalasi Moliga, e le gata o lo o faaaoga e fanau aoga ma le atunuu, ae oo lava foi i iniseti e pei o namu ma meaola e pei o ta’ifau o lo o fai fo’i ma latou totonu o fale taalo nei, ma ua le foliga mai ai o ni fale taalo mo fanau ae ua avea ma fale mo iniseti ma ta’ifau.

O le ata faataoto a le Matagaluega o aoga e pei ona talia e le alii kovana, o le a toe faafouina ai fale taalo uma i aoga maualuluga, ae o le a amata mai i le fale taalo a le aoga maualuga i Leone.

NAUNAU KOVANA IA FAAOPOOPO POLOKALAMA MO FANAU I LE SUMMER

O le faaopoopoina o polokalama ina ia maua ai e fanau aoga le avanoa e auai ma faaaoga i ai o latou taimi, a’o feagai ai ma malologa o aoga i le taimi o le Summer, o se tasi lea o manulauti na taua e le alii kovana ia Lolo Matalasi Moliga e tatau i le malo ona ave i ai lana faamamafa, e pei ona vaaia i le polokalama o lo o galulue ai fanau i ofisa o le malo, atoa ai ma le polokalama o lo o aoaoina ai e fanau i le aganuu faa Samoa, lea e pei ona faamaeaina i le Aso Faraile na te’a nei i le nofoaga autu o le Ofisa a le Arts Council.

Na faatumulia le nofoaga autu o le Arts Council i matua, uo ma aiga na lolofi atu latou te fia molimauina le faaiuga o galuega sa faatinoina e le silia i le to’a 50 tama ma teine na aoaoina mo le fa vaiaso, e pei o le lalaga o mea taulima e faaaoga i ai le laufala, o le vane faatagata e faaaoga ia i ogalaau, pusa le umu ma faatino uma gaioiga i le taimi e fai ai le suavai faa Samoa, siva Samoa, tala faa Samoa ma le ta ukulele.

“Ou te iloa o le toatele o i latou nei o le taimi muamua lenei faatoa latou aoaoina ai ituaiga gaioiga faa Samoa nei e pei o le pusaina o le suavai (umu), valu le ulu, o’a le popo ma valu, e o o foi i le lalagaina o fala, ili, ato ma isi lava galuega taulima, ma e tiga lava ona le iloa faatino ae vaaia lava lo latou naunau e a’oa’o, ma o le matafaioi tonu lena a le matou ofisa, ia faatula’i polokalame faapena ina ia mafai ai ona aoao fanau ia iloa faatino galuega faa Samoa,” o le saunoaga lea a le Faatonusili o le ofisa, le tofa Dr. Uta Laloulu Tagoilelagi.

“O isi tamaiti papalagi e tiga lava ona le iloa valu le ulu ma le popo, ae mana’o lava e avatu galuega latou te faia, ma ua lagona ai le fiafia o le loto ina ua i’u manuia le polokalame a le fanau i lenei tausaga, ao lumanai ai e toe fo’i atu i faleaoga mo le toe amataina o aoga,” o le saunoaga lea a Dr. Uta.

Ua i ai se fuafuaga a le alii faatonu afai e lava le taimi ma i ai se isi vaega tupe faaopoopo a le ofisa, e fia faia ni isi polokalama faapea i le taimi e tuua ai le aoga i le masina o Tesema, ina ia mafai ai ona toe sosoo aoaoga sa aoaoina ai fanau i le masina lenei.

Na taua e ni isi o matua lo latou fiafia ina ua maea ane le fa vaiaso ua iloa e a latou fanau ta le ukulele, iloa siva atoa ai ma le malamalama i auala e faatino ai galuega taulima.

“O lo’u atali’i sa le iloa ta se ukelele ae o le taeao nei (taeao aso Faraile na te’a nei) na matua faateia ai maua ma le tina ina ua ma molimauina ua iloa e le ma tama ta le ukulele ma usu le pese,” o le molimau fiafia lea a le susuga a Abraham Lupe, le tama o le ali’i o Jason Lupe sa auai i le polokalame.

Na taua e Lolo e faapea, o le taimi o le faauuga a le fanau i le masina na te’a nei na ia molimauina ai lea faaletonu, ina ua toulu timuga a’o faia le faauuga, sa ia maitauina ai le pule lava o le timu i soo se itu o le fale e ui atu ai ma susu uma ai fanau ma matua.

Sa ia taua, o faatonusili uma sa auai i le faauuga a Leone latou te faamaonia lana tala lea, ma ua ia manatu foi o le a leai se faatuiese a le malo i le faaleleia o fale taalo mo le lumana’i o fanau aoga.