Ads by Google Ads by Google

Tepa i lau Faigamalo

TATALA ALOA’IA SISIGA FU’A I SE SAUNIGA LOTU

 

Na autu le lauga e tatala aloaia ai sauniga o le fu’a a le atunuu i lenei tausaga i le manatu e faapea, “e manuia Amerika Samoa pe afai e galulue ma faalagolago ona ta’ita’i i le Atua”, e pei ona taitaia e le susuga Tiakono Malaki Timu o le Puleaga Samoa Pago Pago.

 

Na taua e Malaki e faapea, e mafai ona taunuu fuafuaga uma a le malo o lo o manaomia ona fai, pe afai e vavalalata le mafutaga a taitai o le atunuu ma le Atua.

 

Sa ia taua e faapea, o faamanuiaga e tele e pei ona faatusa i le susu ma le meli ua faamanuiaina ai Amerika Samoa, e mafua mai ona o le mafutaga vavalalata a ona taitai ma le Atua, o lea e tatau ai i tagata o le atunuu ona faaaoga tatau faamanuiaga a le Atua.

 

“Afai ua faamanuiaina i tatou i faamanuiaga mai le Atua e pei o taumafa, tatou faaaoga tatau ma le fiafia,” o le saunoaga lea a Malaki faatasi ai ma lana fautuaga, e lelei le ‘ai ia ola ae le o le ola i le ‘ai.

 

O le sauniga lotu sa faatasi uma i ai taitai o Samoanalua e aofia ai le Ao mamalu o le malo o Samoa ia Tui Atua Tupua Tamasese Efi ma lana masiofo, faapea ai taitai o le tafatolu o le faigamalo a Amerika Samoa.

 

O le afiafi ananafi na fa’aauau ai polokalama a le Fu’a i fa’aaliga pese ma siva a le Arts Council.  (Faitau i tala o lea polokalama i le lomiga a taeao).

 

TALI LE MV SILI I MANAOGA O TAGATA MANU’A

 

E le’i mafai e upu ona faamatala lagona o le fiafia ma le faagaeetia i le toatele o tagata o lo o aumau i Manu’a i le taimi nei, ina ua taunuu atu le ulua’i malaga a le vaa o le MV Sili i le taeao o le Aso Toona’i na te’a nei ma le anoano o uta o mea sa manaomia e aiga ma tagata o le motu.

 

Na faamatala fiafia e le susuga a Filoialii Ale le faafetaia o le malo, faipule ma senatoa ona o le manatu alofa atu i Manu’a.  “O le lua vaiaso talu ai ona alalaga ai tagata Manu’a i le manaomia o se fesoasoani ona ua amata ona leai ni meaai ma mea e moomia e aiga, peitai o lea ua tali mai le malo mo Manu’a, e faafetaia ai le Atua ona o lenei fesoasoani,” o le saunoaga lea a Filoialii i le Samoa News.

 

Na taua e Analisa Lopesi na malaga i le vaa i Manu’a e faapea, o uta sa la’uina i le vaa e aofia ai oloa tuu apa, oloa pusaaisa atoa ai ma le anoanoa’i o isi ituaiga oloa e moomia e aiga i aso fai soo.  “Ou te iloa o uta ma faamomoli ua maua e Manu’a i le taimi nei o le a ola atu ai mo le isi 3 vaiaso.”

 

O le itula e 10:00 i le po o le Aso Faraile na te’a nei na malaga ese atu ai le MV Sili mai le uafu i Fagatogo mo Manu’a, i lalo o se faatanaga mai i le U.S. Coast Guard e toe fa’aauau ai ana faigamalaga.

 

O le afiafi o le aso Sa na toe taliu mai ai le vaa mai Manu’a, e le o mautinoa mai i le taimi nei po o afea le isi malaga a le vaa.

 

TOFIA ALU FAAMASINO E FAI MA ‘STREET MARSHALL’

 

O le fonotaga a le Kapeneta i le vaiaso na te’a nei, na faalauiloa ai le tofiga o le susuga ia Alu Faamasinoga, e avea ma “Street Marshall” po o se tagata e mata’ituina soo se mea e tatau ona faaleleia e le malo, o le a taula’i fo’i lana vaai i mataupu e pei o tagata faigaluega a le malo e le o usitaia le poloaiga a le kovana e faasa ai ona toe soona faaaoga taavale a le malo pe a tuana’i taimi faigaluega, atoa ai ma fale a le malo e moomia le faaleleia.

 

Talu ona filifilia e le alii kovana sili ia Lolo Matalasi Moliga ia Alu e avea ma Masela o le Auala, ua ova i le 5 taavale mai ofisa eseese a le malo ua ia taofia ona o le le usitaia o le poloaiga a le alii kovana, ae o isi taavale sa fautuaina ma toe tuuina atu i ai le avanoa.

 

O Ofisa o le malo na taua e Alu sa ia taofia a latou taavale e aofia ai le Kolisi Tuufaatasi; Ofisa o Leoleo; Soifua Maloloina ma le Ofisa Puipuia Gataifale ma le Siosiomaga.

 

O se tasi o mataupu na maofa ai le Samoa News, ina ua faailoa atu e se tasi o Faatonusili totonu o lona faletaele (tulou) o lo o i ai le masini ea malulu, o lana molimau, o le masini sa fausia e le faatonusili na muamua atu ia te ia, ae ina ua tofia o ia e le kovana e avea ma faatonusili o lea ofisa, sa faia ai lana faaiuga e tape ai le masini ea malulu e le faaaogaina.