TOFIA KOMESINA TAITAI POLOKALAMA SAOGALEMU LUGA ALATELE

I se poloaiga na sainia e le alii kovana sili i le vaiaso na tea nei, ua ia tofia ai le komesina o le matagaluega o le Puipuiga o le Saogalemu Lautele ia William Haleck e gafa ma le faatautaia o polokalama mo le saogalemu i luga o le alatele, e pei ona unaia mai e le tulafono a le feterale.

Na taua e Lolo Matalasi Moliga e faapea, o polokalama nei na faamanuiaina ai Amreika Samoa i tausaga ua mavae ma o ni isi o vaega sa mafai ona faatinoina ai i nei vaega tupe feterale, sa totogi ai ni isi o leoleo ma faatau ai ni isi o taavale mo le matagaluega o leoleo.

Na saunoa Lolo, o le kovana o lo o i ai le malosi na te vaavaaia ma tulimata’i ai polokalama nei mo le manauia o le matagaluega ma le faigamalo, e pei ona taua i le tulafono na pasia i le 1980 (Federal Motor Carrier Act of 1980’).

Ua poloaina e le alii kovana faatonusili o matagaluega ma ofisa o le malo, ina ia galulue faatasi ma le komesina o leoleo lea ua fai ma sui o le kovana i le faatinoina o tiute tauave i lalo o le tulafono mo le manuia o le atunuu ma le faigamalo.

LAPATAIA AU FAI FALE’AIGA I LE STADIUM INA IA TAUSISI I LE TU MAMA

I le sauni atu ai o le atunuu ma le malo e faamanatu lana sisigafu’a i le taeao nei, ua tuuina atu ai e le pule o le Ofisa o Malae Ta’alo a le malo, se fautuaga i tagata faipisinisi uma o le a faia a latou fale’aiga i totonu o le Stadium, ina ia tausisi i le tu mama i taimi uma.

Na saunoa Toleafoa Henry Tavake e faapea, e le tatau ona alu atu fua le isi tagata e faamama le nofoaga fai ai galuega a le isi tagata, aua o le matafaioi lea a soo se tasi e fausia sana faleaiga i totonu o le stadium.

Sa ia taua foi e faapea, e ui sa faatapulaa le aofai o faleaiga na faamoemoe e faataga i totonu o le malae, ae talu ai o lea ua fuafua le malo e tufaina atu pepa ai ta’i $5 i tagata uma o le atunuu e ulufale atu e maimoa i le fu’a, ua manatu ai e toe faaopoopo le avanoa i isi fale’aiga.

E tusa ma le 2,500 le aofai o pepa taumafa ta’i $5 ua sauni le malo e tufatufa atu i le atunuu o le a mafai ona auai atu e molimauina lenei faamoemoe, ma o nei pepa taumafa e mafai ona faatau mai ai taumafa ma vaiinu i fale’aiga o le a fausia i totonu lava o le stadium.

O le faaiuga e tufa pepa taumafa i le atunuu, sa faia e le komiti sa gafa ma le polokalamaina o taumafataga mo malo ma le auvalaaulia o le a auai i le aso o le fu’a, ma o le fuafuaga e leai se tasi o le atunuu e autovaa atu i lea aso e maimoa i sauniga o le fu’a e le oo i ai se pepa taumafa.

TETE’E NI ISI O FAIPISINISI I TULAFONO OFISA SOIFUA MALOLOINA

Ua teena e ni isi o tagata faipisinisi mai Asia na mafai ona fesiligia e le Samoa News, ni isi o fuafuaga ua faailoa e le Matagaluega o le Soifua Maloloina e faamalosia mo le faatauina o taumafa vela i totonu o a latou fale’aiga.

O ni isi o ia faiga ua faamalosia ma o lo o faamalosia pea i soo se taimi, o le aveese mai o taumafa vela sa kuka i le taeao, mai luga o fata o faleoloa i le tuana’i ai o le itula e 12:00 i le aoauli, ona o se taumafaiga ina ia puipui i le soifua maloloina o tagata.

Na taua e se alii mai Asia e fai sana fale’aiga i Fagatogo o Kim i le Samoa News e faapea, o le tulafono lea ua manatu le Soifua Maloloina e faamalosia, o le a aafia atu ai ma pisinisi o lo o lelei le kukaina o a latou meaai ma faamalosi e tausisi i tulafono tau i le Soifua Maloloina.

Fai mai Kim, e tatau ona silasila totoa le Ofisa o le Soifua Maloloina i fale’aiga o lo o faatutu i ai faasea i le faaletonu o a latou meaai vela o lo o kuka ma faatau atu.

O le mataupu lenei na afua mai ina ua onana ni tamaiti se toafitu i le amataga o le masina nei ina ua latou aia le meaai o le ‘sushi’ ma faanatinati atu ai i latou i le falema’i i Fagaalu mo togafitiga.

I se pepa o faamatalaga na tuuina mai i le Ofisa o le Soifua Maloloina i le vaiaso na te’a nei, na taua ai le faaauau pea o tiute tauave masani a le Ofisa ina ia mautinoa o lo o tulaga saogalemu taumafa o lo o faatau atu i le atunuu.

Na taua e se foma’i i le Samoa News e le faataga ona talanoa i ni mataupu faapenei e faapea, soo se meaai vela lava e kuka ma le faamoemoe e faatau atu i faleoloa, e i le va o le 4 - 6 itula le umi e tatau ai ona tuu i luga o le fata, a tuana’i loa le taimi lea ona aveese loa lea ma ave e lafoa’i.

FIAFIA TAGATA FAI TAAVALE INA UA TOE PAU LE TAU O LE KESI MA LE SUAUU

E ui e le o se pau tele lea ua i ai le tau o le kesi mo taavale e pei ona faalauiloa mai i le taimi nei, peitai e le o avea lea ma itu na taofia ai le fiafia o le aufai taavale i le atunuu i le taimi nei, ona o lenei faamama avega ua maua, aemaise lava i ave pasi ma taxi la’u pasese.

I se pepa o faamatalaga na tuuina mai i le Ofisa e Pulea le Suauu ma le Kesi i le atunuu, na taua ai le faaitiitia o le tau o le suauu i le 4 e oo atu i le 5 sene i le kalone.

O le masina na tea nei sa molimauina ai e le atunuu le tau o le kesi taavale i le va o le $4.46 - $4.48 i ni isi o pamu kesi, peitai o le masina lenei ua maitauina ai le faaitiitia o le .21sene, tusa lea ua $4.26 i le kalone lea ua faatauina ai i ni isi o pamu kesi i le atunuu.

O le kalone o le kiso taavale ua faatauina i le $4.35 i le kalone, tusa lea e 7sene lea ua faaitiitia ai mai le tau tuai sa i ai.

Na taua e ni isi o alii ave pasi na fesiligia e le Samoa News ananafi, talosia ae faaauau ai lava ona faaitiitia le tau o le kesi taavale i isi masina o lo o muamua atu.

Na fesiligia poo talafeagai le maualuga ua i ai le tau o le kesi taavale ma tupe maua i a latou pasi ma taxi, na tali le susuga a Tunupo Lumana’i e faapea, e le o taitai talafeagai tupe o lo o alu i kesi o taavale ma tupe o lo o maua mai i pasese.