TEPA I LAU FAIGA MALO
“SOO SE FAAMATALAGA E LE UI MAI I FAATONUSILI E LE ALOAIA”
“Soo se faamatalaga lava e faatatau i ofisa ma le malo, tou te maua mai i Faatonusili uma lava. Ae afai e i ai ni isi faamatalaga e liki mai solo i tua, o tala la na e le aloaia e le malo. Ua uma ona ou tuuina atu le malosi i faatonusili e tali atu ai i soo se fesili tou te manaomia, ae afai e le faamalieina ai outou, talanoa mai ia te a’u,” o le saunoaga lea a Lolo i tusitala.
O ni isi o mataupu e talitonu le Samoa News o lo o faavae ai le finagalo o le alii kovana, o ripoti e faatatau i le faaaogaina o tupe sa liki mai i le Samoa News i le vaiaso nei, ma mafua ai loa ona lomia ni isi o ana ripoti i lomiga o le vaiaso na tea nei ma le vaiaso nei.
O ni isi o ia mataupu e aofia ai ripoti i le faaaogaina o le $1miliona mo le Falelima i Sisifo faapea ai ma le faaaogaina o tupe a le Fono Faitulafono.
FUAFUA LISI ATU SEGAULA I LE INTER ISLAND AIRWAYS
O lo o faagasolo i le taimi nei feutanaiga a le ofisa o le alii kovana ma le pulega o le kamupani vaalele a le Inter Island Airways, mo le faamautuina o se maliliega e lisi atu ai le vaalele a le malo, le Segaula e faaaoga mo femalagaaiga i le va o Tutuila ma Manu’a.
I se feiloaiga ma tusitala i le vaiaso nei na faamautu mai ai e le tofa Lolo Matalasi Moliga lea mataupu ina ua fesiligia ai o ia.
Na taua e Lolo e faapea, e ui e le i faamautuina mai i le taimi nei feutanaiga o lo o faia ma le kamupani vaalele a le Inter Island Airways, ae o le agaga maualuga na mafua ai ona faia e le malo lea auala, ina ia mautinoa e saogalemu femalagaaiga mo Manu’a i soo se taimi e faaaogaina ai le vaalele.
O le taimi nei e pei ona saunoa Lolo, e le o inisiua le vaalele mo le faatinoina o ana malaga mo Manu’a, ae afai e mautu talanoaga o lo o faia ma lisi atu le vaalele i le kamupani vaalele, o le a mafai ai loa ona inisiua le vaalele ma faigofie ai loa feuiaiga uma, ina ne’i tulai mai se faalavelave ma aafia ai le malo i se taimi ae le o inisiuaina le vaalele.
O le Segaula na faatau mai e le nofoaiga a Togiola ma Faoa ma le faamoemoe, e fealuai i le va o Tutuila ma Manu’a, peitai o le tele lava o taimi e le mafai ai ona fealua’i le vaalele ona o le faaletonu i nisi o ona vaega.
O le masina na te’a nei na talosagaina ai e tagata o lo o alala i Manu’a o latou sui i le Fono Faitulafono, ina ia saili ni auala e faaleleia ai femalagaaiga i le sami ma le ea mo Manu’a.
SAUNI MALO E FESOASOANI ATINA’E ‘AMERIKA SAMOA COMMUNITY BANK’
E ui e lei tuuina atu lava se talosaga a i latou o lo o galulue e tuu faatasi gaioiga mo le faavaeina o le Faletupe e faatupe e tagata Amerika Samoa, ‘Community Bank Amerika Samoa’, mo se fesoasoani tau tupe mai le malo, peitai ua faalauiloa e le alii kovana sili e faapea, ua sauni le malo e tuuina atu lana fesoasonai tau tupe i soo se taimi e manaomia ai e i latou nei.
Ina ua toe fesiligia le alii kovana ia Lolo Matalasi Moliga, pe le o i ai se manatu i le inivesi atu o tupe mai teugatupe a le Litaea a le malo i totonu o taumafaiga e faavae lenei faletupe, na saunoa Lolo, o le faaiuga lea e faia e i latou ma taitai o le fono.
“Pau le tulaga lea ua mafai ona tuuina atu i le taimi nei o tusitusiga e lagolagoina ai le faamoemoe mo le faatuina o se faletupe i Amerika Samoa,” o le saunoaga lea a le alii kovana i se fonotaga ma tusitala i le vaiaso nei.
Na taua e Avamua Dave Haleck ina ua fesiligia e afioga i faipule i le masina na te’a nei, e le o i ai se manatu a i latou o lo o tuu faatasia lenei faamoemoe mo le faavaeina o se faletupe, e talosagaina se fesoasoani tau tupe mai le malo, ona o le latou talitonuga o lo o i ai, o le faletupe o lo o faamoemoe e faatuina, e faatupe mai lava e tagatanuu o Amerika Samoa.
O le faletupe o le ‘Community Bank of Amerika Samoa’ o le a sui tulaga i le Bank of Hawaii lea ua faamoemoe e faamuta lana tautua i le ogatotonu o le tausaga fou 2014.