Ads by Google Ads by Google

TEPA I LA TATOU FAIGA MALO

SAUNI STAR KIST SAMOA FAAMANATU 50 TAUSAGA O LANA TAUTUA

 

O le vaiaso nei lea o lo o faagasolo ai le Liki Kirikiti i le va o Alii ma Tamaitai a tagata faigaluega uma a le kamupani i’a o le Star Kist Samoa, o ni isi o a latou tapenapenaga mo le faamanatuina o le 50 tausaga i i totonu o le malo o Amerika Samoa.

 

O le aso 17 Aokuso, 2013 lea ua faatulaga e le kamupani e avea ma aso e faamanatu aloaia ai loa lenei faamoemoe taua.

 

Na taua e Tuli Fruean, se sui o le StarKist Samoa e faapea, o le autu o polokalama e pei ona i ai taaloga o lo o faagasolo i le taimi nei, e le gata ia maua ai le malosi o le tino i tagata faigaluega, ae maua ai foi le avanoa e mafutaga faatasi ai tagata faigaluega, ona o le tele o taimi e galulue faatasi ai ae seasea maua se avanoa e taalo ma fiafia faatasi ai faapea.

 

O le liki kirikiti a tamaitai o lo o faagasolo i le malae i Pago Pago a’o alii i le malae i Fagaalu ma o le Aso Toona’i a taeao e sailia ai siamupini i le va o alii ma tamaitai i le malae i Fagaalu.

 

O au taaalo a alii ma tamaitai o lo o vaevaeina i vaega eseese o lo o galulue ai i totonu o le kamupani e pei ona saunoa Fruean.

 

“O le masina na tea nei na faatinoina ai la matou liki volipolo, lea ua oo i le liki kirikiti, ma ua i ai le faamoemoe o se taimi o i luma e faatinoina ai isi a matou liki e pei o taaloga ‘basketball’ ma soka,” o le saunoaga lea a Fruean.

 

Ua mae’a foi se tauvaga pese, lea na saunoa ai Fruean, sa mafai ona faailoa ai taleni ma meaalofa o lo o i ai i tagata faigaluega, e faatinoina ai so latou sao mo le faamoemoe e pei ona taumafai atu i ai le pulega ma le kamupani.

 

Na taua e ni isi o tagata faigaluega a le kamupani e faapea, o le taua o polokalama nei ua maua ai le avanoa e malolo mai ai i galuega ae faatino taaloga e faaafu ai le tino.

 

TAPUNI MO SE TAIMI LE TUMAU SE FALE’AIGA I TAFUNA

 

E tasi se fale’aiga i Tafuna ua tapunia e sui o le Matagaluega o le Soifua Maloloina, ina ua masalomia o iina lea o lo o gaosi mai ai le ‘sushi’ lea na mafua ai ona ‘onana tamaiti e silia ma le to’afitu i le amataga o le masina nei.

 

Sa saunoa le alii faatonusili ia o le Matagaluega o le Soifua Maloloina, o Motusa Tuileama Nua e faapea, o le pisinisi o lo o latou gaosia le ‘sushi’ lea o lo o mafai ona kiliva atu i ni isi o faleoloa eseese i le atunuu, ma e foliga mai o le umi o le taimi e taatitia ai meaai i luga o le fata o le faleoloa pe a maea ona kukaina, o le isi lea mafuaaga o le tulai mai o le faalavelave e pei ona ‘onana ai fanau laiti.

 

E talitonu le Ofisa o le Soifua Maloloina, o ni isi o meaai nei e eseese uma lava taimi na faatau ai e fanau na aafia, ma talu mai lea faalavelave, ua toe saga faamalosia e le Ofisa o le Soifua Maloloina le tatau ona aveesea meaai vela nei mai luga o fata o fale’aiga pe a tuana’i le aoauli, ina ia mautinoa e le toe tulai mai se aafiaga faapenei i le lumana’i.

 

“FAAFETAI ATU AMERIKA SAMOA I LOU LOTO FESOASOANI”

 

Ua faafetaia e le Pulesili o le Ofisa o le Sports Complex ia Toleafoa Henry Tavake le mamalu lautele o le atunuu na maua le avanoa e autovaa atu e maimoa i faafiafiaga ma sauniga o le sisgiafu’a i le Aso Lulu na te’a nei, ona o le loto fesoasoani i tagata faigaluega a le malo ma lona Ofisa, e ala i le lagolago e faamama le otaota ma le lapisi i totonu o le Stadiumu i soo se taimi o le aso.

 

Saunoa Toleafoa e faapea, o ripoti na tuuina atu ia te ia na taua ai e faapea, o le toatele o tagata sa vaaia le agai uma atu i kalone lapisi e tuu i ai a latou lapisi, o isi foi sa maitauina lo latou pikiina i luga o lapisi sa taatitia i luga o le mutia ma ave i kalone lapisi, ma o le ata vaaia lea o se atunuu e galulue faatasi e faatino galuega laiti mo le manuia o tagata uma.

 

Sa faafetaia foi e le alii Pule tagata uma sa fausia a latou pisinisi i le malae, ona o le tautua matagofie sa ofoina atu mo le atunuu, atoa ai ma le mama o vaega sa kukaina ai taumafa, seia oo atu lava i le taimi na toe tapena ese ai a latou faleie i o latou aiga.

 

Na taua e ni isi o le atunuu na fesiligia e le Samoa News e faatatau i ‘Food Voucher’ ta’i $5.00 sa mafai ona tufaina atu mo a latou taumafataga, o se sisigafu’a ese lenei i le tala faasolopito o Amerika Samoa, e le gata sa tali le sua a malo valaaulia ma taitai o le atunuu, ae na mafai foi ona maua le avanoa e aai faatasi atu ai ma le atunuu atoa na lolofi atu e molimauina lenei faamoemoe.