IOE KOVANA E TATAU ONA SIAKI LELEI TAGATA MAI FAFO O LE A GALULUE FAAKONEKARATE

Na faailoa e le afioga i le kovana sili ia Lolo Matalasi Moliga i le Samoa News, lona matua lagolagoina o le siaki ina o tagata mai fafo o lo o ulufale mai i le teritori e galulue faakonerate ai, ina ia mautinoa e le o i ai ni vaega tau solitulafono o aafia ai i latou i setete ma teritori o le malo tele sa galulue muamua ai.

“E leai se mea ou te iloa e ono taofia ai le faia o siaki mo tagata uma nei, aua o lea tulaga o le a manino ai talaaga o i latou nei ma taofia ai le ono tulai mai o ni faaletonu mulimuli e ono alia’e mai i se taimi muamua,” o le saunoaga lea a le alii kovana.

Fai mai le alii kovana, afai e faamaonia i suesuega o lo o i ai ni faamaumauga sa aafia ai se tagata mai fafo ua galue faakonekarate i le teritori, e mafai ona faia le faaiuga e toe faafo’i ai lea tagata.

“Soo se tasi e aumai e galue i le teritori ae faamaonia sa i ai ni ana solitulafono i vaega sa galue muamua ai, tusa lava pe tele lona agavaa i le galuega, e faamuamua e le malo le faia o le faaiuga sa’o,” o le saunoaga lea a le alii kovana.

FAAOPOOPO ISI VAEGA FOU MO LE FALETALIMALO I UTULEI

O le lua ai lenei o vaiaso talu ona faagasolo galuega mo le toe faaopoopoina o ni isi o vaega i le Faletalimalo Samoa a le malo i Utulei, i lalo o le faatautaiga a le Ofisa o Mataupu Tau Samoa.

O le masina o Mati o le tausaga nei na faailoa mai ai e le afioga a Muliagatele Sanele Tuiteleleapaga i le Samoa News e faapea, “Pau lava le galueg lea ua finagalo le alii kovana sili e toe faaopoopo i le galuega, o le faapipii lea o taumata faataamilo atoa i le fale ina ia taofia ai le pisi mai i totonu o le timu pe a oo i taimi e leaga ai le tau, aemaise ai e puipuia ai pou o le fale mai le aafia i le susu”.

O lenei galuega o lo o faatupeina i le vaega tupe e $28,000 o lo o totoe mai i le vaega tupe lea na tuuina mai e le Ofisa o le Initeria i le tausaga na te’a nei e fausia ai lenei galuega.

E le gata la i le toe faaleleia ai o le Fale Tele i le vaega tupe lea, ae o lea foi ua fesoasoani e faaleleia ai faleoo uma o lo o i ai i le Malae o le Su’igaula a le Atuvasa i Utulei, ina ia matagofie i le maimoa a le atunuu aemaise ai turisi tafafao mai fafo.

SAUNI NI ISI O MATAGALUEGA E FAA FAIGALUEGA FANAU AOGA

Ua faalauiloa mai e ni isi o Faatonusili o Matagaluega ma Ofisa a le malo lo latou sauni e talia fanau aoga o le a galulue i le polokalama o le ‘summer youth employment program’ mo lenei tausaga, ina ia mafai ai ona latou maua le avanoa e aoaoina ai tomai faa faigaluega a’o tapena ai o latou olaga e avea ma tagata faigaluega i le lumana’i.

“Ua sauni le matou ofisa e talia fanau aoga o le a maua le avanoa e galulue ai i le polokalame,” o le saunoaga lea a Lealao M. Purcell i le Samoa News, e ui na te le’i faailoaina mai le aofai o avanoa faigaluega ua ofo atu e le latou ofisa mo fanau aoga.

Na faamaonia mai fo’i e Faleosina Voight le faatonusili o le Matagaluega o Galuega a le malo, ma Ruth Matagi lea o lo o avea ma faatonusili o le Matagaluega o le Puipuiga o le Vaomatua ma le Gataifale, le sauni o la ofisa e talia fanau aoga o le a talia i le polokalame.

E lima avanoa faigaluega na taua e Iulogologo Pereira o lo o fuafua le ofisa o le kovana e tuuina atu mo fanau aoga e galulue ai i le latou ofisa.

O le ulua’i tausaga lenei ua oo atu ai i le 500 avanoa faigaluega ua tuuina atu e le malo mo fanau aoga e galulue ai i lalo o lenei polokalame, pe a faatusatusa i le na o le ta’i 150-200 sa masani ona maua i tausaga ua mavae, e pei ona faamaonia mai e le Faatonusili o le Matagaluega o Tagata Faigaluega a le malo ia Le’i Sonny Thompson.

I fonotaga a le kapeneta ua mavae atu, na faatonuina ai e le afioga i le kovana sili ia Lolo Matalasi Moliga faatonusili o matagaluega uma ma ofisa o le malo, ina ia saili avanoa faigaluega e galulue ai le silia i le to’a 1,000 ua maea ona tusi talosaga atu mo le polokalama.

Saunoa le alii kovana e faapea, e tatau ona ta’i lima pe sili atu foi avanoa e mafai ona ofo mai e matagaluega taitasi ma ofisa a le malo e galulue ai fanau aoga nei i o latou ofisa, sei vagana ai ofisa ma matagaluega tetele a le malo e oo lava i ofisa tumaoti e tatau ona tele ni avanoa latou te ofoina mai mo fanau aoga.

E ui na faaalia e faatonusili o ni isi o matagaluega ma ofisa a le malo o latou atugaluga poo fea e maua mai ai se tupe totogi ai fanau aoga nei pe afai e tuuina atu e galulue i o latou ofisa, ona o aiaiga i le faaaogaina o tupe feterale mai fafo o lo o faatupe ai tautua a latou ofisa, ae na faaalia e le alii lutena kovana ia Lemanu Peleti Mauga e faapea, o le mafuaaga tonu lea na ala ai ona tofia i latou e avea ma faatonusili, o le saili lea o auala e maua ai tupe e faatino ai auaunaga lelei mo le atunuu.