Ads by Google Ads by Google

TEPA I LA TA FAIGA MALO

MALAGA LE ALII KOVANA I AMERIKA

 

Ua faamaonia mai e le afioga i le alii kovana sili ia Lolo Matalasi Moliga, lona sauni e malaga faatasi atu ma le Faatonusili o le Matagaluega o Aoga a le malo, ia Vaitinasa Dr. Salu Hunkin Finau i Amerika i le aso 10 ma le 11 o Iuni, mo se fonotaga tau aoaoga (Governors Education Symposium).

 

Na faamaonia mai e le tofa Iulogologo Pereira i le Samoa News e faapea, o le ulua’i fonotaga lea o le a faatasi atu i ai le kovana i mataupu tau aoaoga, talu ona avea o ia ma kovana filifilia o le teritori o Amerika Samoa.

 

O ni isi o mataupu o le a talanoaina i lenei fonotaga e aofia ai auala e faaleleia ai aoaoga mo fanau amata mai i vaega o le K-4 e oo atu i le vasega 12, ma faasolo atu ai i aoga e pei o kolisi ma Iunivesite i totonu o setete ma teritori o le malo tele.

 

Na taua e le alii kovana i luma o le fono a le kapeneta i le vaiaso na te’a nei e faapea, faatoa alu le latou faigamalaga pe a maea faauuga a aoga maualuluga i totonu o le atunuu, ona e taua tele ia te ia faauuga a le fanau.

 

O le aso 6 o Iuni o lo o faamoemoe e toe taliu mai i le aso 14 o Iuni, 2013.

 

FUAFUA LE TOE FAAULU O SUAFA O FAATONU NA TEENA E LE FONO

 

Ua faamaonia mai e le Ofisa o le alii kovana le sauni o le kovana sili ia Lolo Matalasi Moliga, mo le toe tuuina atu o suafa o alii faatonusili e toalua sa teena e le fono i lana nofoaiga ua mavae atu, mo le toe faia i ai o se isi iloiloga a le Fono Faitulafono.

 

O le a toe tuuina atu suafa o Pa’u Fuiavailili Roy Ausage lea ua filifilia e avea ma Faatonusili o le Matagaluega o Tupulaga Talavou, Tina ma Tama’ita’i, ma Timothy Jones lea ua tofia e avea ma Faatonusili le tumau mo le Ofisa o le Enetia a le malo (Energry Office) lea na pasia e le Maota o Sui ae na teena e le maota maualuga.

 

E ui ina sa teena e le Fono suafa o i la’ua nei, ae peita’i o lo o fa’aauau pea ona o la tauaveina tofiga Faatonusili mo ofisa ia e lua, i le taimi nei.

 

TUSI GLEN LEFITI I LE KOVANA MA LE TEUTUPE FAATATAU MATAUPU OVATAIMI

 

A’o fefaloa’i ai le kovana sili ma matagaluega o le malo e faatatau i le mataupu e taofia ai le toe faia o ni ovataimi i tagata faigaluega a le malo, na tuuina atu ai e le Pule o le Ofisa o Tiute ia Glen Lefiti sana tusi i le afioga i le kovana sili ia Lolo Matalasi Moliga atoa ai ma le Teutupe a le malo ia Falema’o ‘Phil’ M Pili, i aafiaga tau tupe e oo i ai le malo ona o taumafai e faamalie le tulafono i ovataimi e pei ona finagalo ia i le kovana mo le Ofisa o Tiute.

 

Na taua e Lefiti i lana tusi e faapea, e tusa ma le $484,481 le tupe e totogi e le malo mo le toe faatulagaina o sifi a le Ofisa o Tiute, ina ia alofia ai le toe tulai mai o ni ovataimi i tagata faigaluega.

 

Sa ia taua foi e faapea, afai e toe faatulaga galuega a le Ofisa o Tiute i sifi, e manaomia le tolu o vaega e vaevae i ai, ina ia mafai ai ona faatino lana tautua i vaega taitasi e pei o le vaavaaia o tuaoi a le atunuu, tautuaina o vaa ma vaalele, tautuaina o le falemeli aemaise ai le tautua a le K-9.

 

Mo se faataitaiga e pei ona taua e Lefiti i lana tusi o lo o taua ai le tulaga lea, mo le tautuaina o le malae vaalele i Tafuna, e manaomia tagata faigaluega e to’a 18 e galulue ai mo sifi e lua, ae mo aso o le vaiaso e tatau ona toe faaopoopo ni isi tagata faigaluega se toafa pe toalima foi ina ia mafai ai ona gafatia le faatinoina o galuega.

 

Ae afai e toe faatulaga sifi mo taimi faigaluega ina ia usitaia ai le taofia o ovataimi, e manaomia ni isi tagata faigaluega se toa 43, ina ia gafatia ai le faatinoina o le galuega, ma o i latou faaopoopo nei e toa 43 e ono alu ai le tusa ma le $484,481 e totogi ai.

 

O isi vaega a le Ofisa o Tiute e pei o le K-9, e le o lava ana tagata faigaluega i le taimi nei, ma o lo o taumafai e faia feutanaiga e faapaleni ai tagata faigaluega ma taimi e galulue ai.

 

O Lefiti o lo o ave ni ona livi faapitoa i le taimi nei, ona o se faaiuga na faia e le Faatonusili o le Matagaluega o Tagata Faigaluega a le malo ia Le’i Sonny Thompson, e faatatau i le mataupu lea le vave faia ai sana faaiuga faasaga i le tagata faigaluega a le Ofisa o le Tiute le na alu atu ma piki mai se afifi mai le Falemeli, ae o lea afifi sa masalomia e ta’ifau faapitoa a le Tiute o lo o i ai ni vaega o fualaau faasaina i totonu.