O le tele o le tupe lea e totogi e le atunuu e su’i ai a latou laei i falesu’isu’i i le taimi nei, e le gata o loo lafo i le atu Asia e pei o Filipaina, ae leai foi se aoga o tupe ia i le tamaoaiga ma le tau atina’eina o le atunuu i le taimi nei.

O se saunoaga manino lea mai le alii kovana i luga o lana polokalame i le faaiuga o le vaiaso na te’a nei, ina ua ia saunoa e faatatau i le Vasega Faauu i Aoga Su’isu’i lea sa faia i le vaiaso na te’a nei, i lalo o le taitaiga a le Matagaluega o Tupulaga ma Tama’ita’i.

Na foliga e faaataata lafoga le saunoaga a le afioga i le matua ia Togiola Tulafono peitai sa ia taua e faapea, afai e lelei ma iloa e le toatele o tagata su’isu’i, e le gata o le a sefe le soona alu o tupe e totogi ai fale suisui, ae o le a mautinoa foi le nofo o le tupe lea o loo maua i totonu lava o le teritori, nai lo le alu atu i fafo.

I le taimi nei, ua silia ma le 80 le aofai o laisene mo pisinisi Suisui ua i ai i le teritori, e pei ona saunoa Togiola, ma o se numera tele naua lea pe a fua i le tulaga o isi pisinisi o loo i ai.

Saunoa Togiola, i suesuega sa faia e le malo i pisinisi suisui nei o loo taua ai e faapea, o le tele o pisinisi suisui nei e i le va o le toa 7 i le toa 8 tagata faigaluega o loo galulue ai, ae o le toatele lava o i latou o tagata mai atunuu Asia e pei o Filipaina, Kolea ma Saina.

“E te fiu e saili ni Samoa e galulue i ni fale suisui e te le maua i ai, ae a i ai foi pe na o se toa tasi pe lua foi, lona uiga afai e faaopoopo aofai o tagata mai Asia o loo galulue i pisinisi suisui, e silia i le toa 800 le aofai ua i ai, ma o se fuainumera tele naua lea,” o le saunoaga lea a le alii kovana.

O le faauuga mo le vasega suisui lea na faia i le vaiaso na te’a nei e pei ona faauu mai ai le toa 23, ua ova atu ai i le toa 200 i latou ua faauu mai i aoaoga nei, ma o se tulaga lelei lea mo le alii kovana.

Saunoa Togiola, o le $1 lea e faataamilo i le tamaoaiga o le teritori, o le $1 lelei lea ma tutu’a, aua o loo sili atu i le faatolu ona taamilo ma aoga i le tamaoaiga o le atunuu, ae o le $1 lea e alu i le falesuisui, na ona avatu lava, tuu e le tagata mai Filipaina i le meli, Filipaina loa.

“E faapena foi le $1 lea e te faaaluina i faleoloa Kolea ma Saina, o le taimi lava e maua ai e faleoloa tupe ia, ona latou lafo lea i Asia ma tatou le toe maua ai,” o le saunoaga lea a Togiola.

E le tutusa la le $1 lea o loo lafo i Filipaina, Saina ma Kolea ma le $1 lea e lafo i Savaii, aua o le tupe lea e lafo i Savaii, o loo tele ina faaliu oloa e aiga, e fai uma le faatau iinei ona faatoa lafo lea o le atigipusa i Savaii, o lona uiga o loo maua lava le avanoa e faataamilo ai le tupe lea e fesoasoani ai i le tamaoaiga o le atunuu.

O le agaga autu o le fautuaga a le alii kovana, e tatau ona amata galulue le atunuu e saili auala e maua ai tupe e tausi ai aiga, ma ia aoao taleni ina ia faaitiitia ai le faaalu o tupe e tau totogi ai mea e mafai lava ona fai e tagata Samoa.

O le toatele o tagata suisui o loo i ai i le atunuu e pei ona saunoa Togiola, o tamaloloa mai Filipaina.

“Afai e lelei le suisui a tamaloloa Filipaina, aisea e le lelei ai foi le suisui a tamaloloa Samoa,” o Togiola lea.