Ads by Google Ads by Google

Tele suiga i polokalama o faauuga i lenei tausaga

Eseese manatu o matua i suiga a le Ofisa o Aoga

 

O le fuafuaga lea ua faalauiloa e le Matagaluega o Aoga a le malo, i le taumafai e faapupu’u o fa’auuga a fanau aoga i le vasega 12 mo le tausaga nei, e aofia ai ma le taofia o le tufatufaina o faailoga ma lauga a sui faai’uaso, ua faaalia ai lagona le fiafia o ni isi o matua na o latou fesiligia ai le atamai o lenei faaiuga.

 

O le faaiuga ua autasi i ai le Faatonusili o Aoga a le malo ia Vaitinasa Dr. Salu Hunkin-Finau i se fonotaga sa faia ma puleaoga atoa ai ma peresetene o PTA a aoga maualuluga uma i le atunuu i le lua vaiaso talu ai.

 

Na taua e le susuga a Malota Meleisea o Aua ma Tafuna e faapea, “Ou te matua teena lava e a’u lea fuafuaga ua faalauiloa e le Ofisa o Aoga, afai ua latou manatu e faapupu’u polokalame o sauniga mo faauuga a le fanau, saili ni isi polokalame e taofi ae aua le taofia polokalame e patino i le faua o le a faauu”.

 

Saunoa Meleisea e faapea, e toatasi lona atalii ua sauni e faauu i le Vasega 12 i le aoga maualuga a Tafuna, ma ona nieces e toatolu i le aoga a Samoana ua sauni foi e faauu i le tausaga nei.

 

“Leiloa pe te’i ua avea se tasi o nei fanau ma Valedictorian poo Salututorian fo’i i le latou aoga, a’o lea o le a taofi a latou lauga e le toe faia, ae o le vaega pito sili lena ou te fia faalogologo ma vaai i ai, o le lauga mai i se tasi o le fanau pe afai ae faapale i tulaga lelei faapenei,” o le isi lea saunoaga a Meleisea.

 

Na taua e le tina o Margaret Finau-Ale o Pago Pago ma Fagaima e faapea, afai ua finagalo le Ofisa o Aoga e faapupu’u sauniga o faauuga a le fanau, e tatau ona taofi saunoaga a le kovana ma le lauga faapitoa o le aso, a ia tuu pea le avanoa i le vasega faauu e faatino ai fuafuaga uma mo le latou aso fiafia.

 

Na toe saunoa lenei tina, “O se tasi o vaega o faauuga ou te fiafia e faalogologo i ai o lauga a le fanau ua faauluulu i ai le vasega faauu, o iina e iloa ai le tulaga loloto ua i ai o latou mafaufauga aemaise ai o le latou faafetai i matua ma faiaoga ona o le aoaoina o i latou.”

 

O le isi popolega e pei ona taua e Margaret, ina ne’i mafua suiga nei ona o le faatonusili ua tula’i mai ma lana taupulega, ae oo i le taimi e tula’i mai ai le isi faatonusili fou i le lumana’i ona toe sui fo’i lea, o iina e atagia mai ai le le manaia o lenei faaiuga.

 

E toalua isi matua e galulue i ni Ofisa o le malo na o la taua e faapea, pau lava le itu taua o lo o fia silasila i ai matua o le vasega faauu, o gaioiga uma o le a faia i le taimi o le faauuga o le fanau, ae afai o le a taofia ia tulaga, lona uiga ua aveese atu ai ma lagona fiafia o matua i le fia molimauina o le taunuuga o aoaoga a le fanau.

 

I le fuafuaga ua taofia ai lauga a sui o faai’uaso (valedictorian) na fa’aalia ai manatu eseese o ni isi o taitai o PTA.  E pei ona sa saunoa le Peresetene o le PTA a Leone ia Leseiau Laumoli lona lagolagoina o le fuafuaga ua faia e le Ofisa o Aoga ina ia faapupu’u sauniga mo faauuga o fanau aoga.

 

Na taua e Leseiau e faapea, o le tele o finagalo mai matua o le latou PTA i tausaga uma lava pe a maea faauuga, e manaia le sauniga ma tapenaga a le aoga ma nai fanau faauu, “pe ana faapea e puupuu le sauniga, ma o le faaiuga ua faia e le Ofisa o Aoga ou te lagolagoina, ina ia mafai ai ona foia faasea ia ma le toe tula’i soo mai i le lumana’i.”

 

Sa faapena foi ona lagolago e le peresetene o le PTA a Samoana ia Fuimaono Tone Tamalii lea foi fuafuaga a le ofisa o aoga a le malo e pei ona faalauiloa i lenei tausaga.

 

Ae na saunoa le Peresetene o le PTA a le aoga maualuga i Tafuna ia Milton Taufa’asau e faapea, e tatau ona tuu pea le avanoa i Valedictorian e fai ai a latou lauga i taimi o a latou faauuga, aua e na o le 5 minute le umi o a latou lauga.