Ua faalia e ni isi o le atunuu lo latou faafetaia o le pulega fou a le Ofisa o Femalagaaiga ua i ai nei, ona o le tele o suiga lelei ma talafeagai ua latou faia e tusa ai o le latou tautua i le atunuu.

O ni isi o ia suiga e aofia ai le tasi o le aso e valaau ai le fono mo le toe faafou o pepa nofomau a i latou mai fafo ma pu’e ai lava ma le ID, faigofie tulaga o le iloiloina o fono mo le faafouina o pepa nofomau, aemaise ai o le suiga ua i ai le tautua a le aufaigaluega mo le atunuu i le taimi nei.

Na taua e le tina o Finau Viliamu o Tafuna e faapea, “O le suiga lea ua i ai nei, o le aso lava na valaau ai la’u fono, o le aso fo’i lea na toe pu’e ai ma lo’u ID, ma o se fiafiaga lea mo a’u, ua le tele ni aso faigaluega e ma’imau ona o le tau faafouina o lona ID, ae o lea ua tasi lava le aso ua faataunuu ai vaega taua nei.

Ae na taua e le tama o Apelu Lelevaga o Utulei e faapea, o se tasi o faafitauli sa ia maitauina i tausaga ua mavae, e te’a ane lava le 8:00 i le taeao e na o le to’atasi lava pe to’alua tagata faigaluega a le ofisa, o le isi to’atele e nofonofo solo mai i latou kesi, peitai ua faateia o ia ina ua alu atu i le vaiaso na te’a nei e saini mai lana pemita, ua tau le ofi luga o le counter i le toatele o alii ma tamaitai faigaluega a le Ofisa o lo o galulue mai ai, ae o isi o lo o feoa’i i fafo ma fesilisili solo i le atunuu o lo o faatalitali pe i ai se fesoasoani e fia maua mo i latou.

“Ua te’i la’u vaai ina ua ou maitauina lea tulaga, sa ou tutu mo sina 20 minute ma tulimata’i gaioiga a tama’ita’i e to’alua na o mai i fafo ma fesili i isi tina sa nonofo i luga o le nofoa, ona sa ou mana’o e vaai pe moni lea tulaga, peitai ina ua ou fesili atu i le isi alii Sinia o le Ofisa, sa ia faamaonia mai ai ia te a’u, o ni isi nei o suiga ua faia e le latou pule fou ua i ai, ma o se faafetaia ai le alii pule ona o nei suiga lelei ua faia mo le atunuu,” o le saunoaga lea a Lelevaga.

Na maua se avanoa e fesiligia ai e le Samoa News le alii pule o le Ofisa o Femalagaaiga ia Peseta Dennis Fuimaono Lutu e tusa ai o suiga ua pisapisao ai le atunuu, ma na saunoa Peseta , ina ua faatoa tofia o ia e le alii kovana i le masina na te’a nei ma ulufale atu ai loa i totonu o le Ofisa, sa ia maitauina ai le tele o “tulaga faaletonu o lo o faia i totonu o le Ofisa e mana’omia ona taofia.”

O ni isi o faaletonu, o se tagata e fia faafou lona ID, e ese le aso e faia ai le fono, ae ese fo’i le aso e pu’e lona ID.  “O nai tagata nei, soo se taimi lava e faatonu ai e le Ofisa e alu atu i le fono ma toe alu atu e pu’e lana ID, e faanoi ma lana galuega, lona uiga e le o maua sona totogi, ma o se faiga le alofa lenei faiga sa faia e le Ofisa i nei tagata i le tele o tausaga,” o le saunoaga lea a Peseta atoa ai ma lona faia o le faatonuga ina ia taofi lea faiga, ae o le aso lava e valaau ai le fono a le tagata mai fafo, o le aso fo’i lena e pu’e ai ma lana ID.

“O le faanaunauga ia amata aga’i atu le atunuu mo a latou mataupu ae ua leva ona laulaututu mai le aufaigaluega i luga o le counter, ma sauni e tautua le atunuu, ma ia maua le laufofoga ataata i soo se taimi, ua ou faatonuina foi ina ia agai isi i fafo o le ofisa e fesili i nai tagata o lo o nonofo ai pe manaomia se fesoasoani, poo ai e fia alu e vaai, poo a foi pepa e fia faatumu, o lea tulaga, e le o ni mea fou ae o mea tuai sa le’i mulimuli i ai le Ofisa, lea la ua ou taumafai e toe faamalosia,” o le saunoaga lea a Peseta.

O isi tulaga ua amata foi ona faamalosia, e le toe iloiloina e le Komiti Faafoe a le Ofisa o Femalagaaiga le faafouina o ID a tagata ua leva ona iinei, sei vagana ai lava ID a i latou faatoa talia i totonu o le teritori.

“O le tiute lava ia o le komiti faafoe, o le iloilo o talosaga a tagata fou faatoa talia i le teritori, ae o le tiute a le Vaega Iloilo, o i latou ia e iloiloina fono a tagata mo le toe faafouina o a latou ID, ona ripoti atu lea i le Komiti faafoe mo le latou faaiuga faai’u,” o le saunoaga lea a Peseta.

Talu ona tofia e le kovana le Komiti Faafoe fou a le Ofisa o Femalaaiga, e le’i maua lava sa latou fonotaga muamua e pei ona faamaonia mai e Peseta, ona o lo o i ai ni isi o tulaga e ao ona faamautu muamua ao le’i alo atu le Komiti e faatino ana galuega.

Na faamanino e Peseta e faapea, o lea ua faataoto e le alii kovana ia Lolo Matalasi Moliga ni isi o suiga i le Ofisa o Femalagaaiga, e faasa ai ona toe sponsor e se tagata faigaluega a le Ofisa se tagata mai fafo, peitai i lona talitonuga faata’ita’i, e tatau fo’i ona aofia ai ma sui o le Komiti Faafoe i le tulafono lea.

“Ua ou maua tala e i ai sui o le Komiti o lo o latou sponsor ina tagata mai fafo, peitai afai ua faamalosia le tulafono lea i tagata faigaluega a le Ofisa, e tatau fo’i ona aofia ai ma le Komiti Faafoe,” o le saunoaga lea a Peseta.

O lo o i ai le faamoemoe o le a faia se fonotaga a le Vaega o Femalagaaiga ma le kovana pe afai ae toe faaolatia mai i fanua le faigamalaga a le alii kovana sili i le vaiaso fou.