Ads by Google Ads by Google

TELE SAO TAGATA MATUTUA TAUMAFAI FOIA FAAFITAULI FANAU AOGA

Ua faamaonia mai e le Faatonusili o le Ofisa o Tagata Matutua ia Ale Tifimalae le tele o se sao o tama ma tina matutua o lo o i totonu o le polokalame o le Toe Afua Mai Matua (TAMM), i le taumafai lea e saili ni auala e foia ai faafitauli o lo o tula’i mai i taimi o taaloga a fanau aoga i le atunuu.

 

O le polokalame lenei a le TAMM, o se vaega o tama ma tina matutua o lo o galulue e tuu atu fautuaga faamatua i fanau aoga, i auala e fesoasoani ai i o latou olaga.

 

O le valaauliaina e le Matagaluega o Aoga a le malo o le TAMM e auai i lenei polokalame, na afua mai ina ua tula’i mai ni isi o faafitauli i le va o fanau aoga i taimi o taaloga i le lua vaiaso talu ai, ma talosagaina ai loa le TAMM i so latou sao mo le tau foiaina o lenei faafitaul.

 

“E tele se sao taua sa mafai ona ofo atu e le TAMM ina ua tuu mai le manaoga a le Ofisa o Aoga, ma o le a faaauauina pea lea auaunaga e ala i le tofia o tui o le latou vaega e galulue i aoga taitasi i totonu o le atunuu,” o le saunoaga lea a Ale.

 

Na taua e Ifopo Sevaaetasi o se tasi o sui o le TAMM e faapea, o le mafuaaga e ala ai ona tutupu faafitauli i le va o fanau aoga, e le o malosi le pito laau a matua i le fautuaina lea ma le aoaoina o fanau i totonu o aiga.

 

“Afai e amio pulea le fanau i totonu o le aiga e amio pulea fo’i pe a o o atu i totonu o le aoga,” o le saunoaga lea a Ifopo.

 

Na taua e Ifopo e faapea, talu mai lava le uluai taimi na amata maia i le polokalame a le TAMM e o o mai i le taimi nei, ua tele suiga lelei ua vaaia i ni isi o fanau i totonu o aoga, ona o le isi lea matafaioi a le polokalame, o le fautuaina o fanau aoga i totonu o faleaoga ina ia naunau i le aoga ae le o le tafaovale.

 

O le lona lua ai lenei o vaiaso talu ona toe amata taaloga i le va o fanau aoga i le atunuu, talu mai le tolu vaiaso lea na tapunia ai ona o ni vevesi na tulai mai i le va o fanau aoga.

 

I le toe faagasolo ai o taaloga a le fanau aoga, ua amata ona galulue Toomaga a ni isi o itumalo e pei o le Toomaga a le Itumalo o Sua e saili auala e foia ai le toe tulai mai o ni isi faalavelave i le lumanai.

 

O ni isi o auala ua taumafai le Toomaga e uia e aofia ai le galulue faatasi o Alii Mautofi uma i totonu o nuu ma le Ofisa o Aoga, i so o se taimi e faatautaia ai taaloga a le fanau aoga i totonu o nuu ma aoga i le atunuu.

 

Ae i luma o le faamasinoga faaitumalo i le taeao ananafi, e toatasi se alii e 15 tausaga le matua ua molia e le malo i le faalavelave lea na tauai ai pasi aoga i Leone, ina ua maea se taaloga Volipolo sa faia ai i le va o le au a le aoga maualuga a Leone ma Tafuna.

 

Talu ona tulai mai lenei faalavelave i le va o fanau aoga, e toa 18 fanau aoga ua faamaonia e le Ofisa o Leoleo ua maua sa i ai lo latou sootaga i lenei faalavelave.