Tele polokalame ua tatala e le DYWA mo tupulaga talavou
E tele naua polokalame mo ta’aloga eseese ua ofo fuaina atu e le Matagaluega o Tupulaga ma Tama’ita’i a le malo (DYWA) mo soo se tupulaga o le atunu’u o lo o i ai le naunau e fia maua le malosi poo le poto e a’oa’o ai i soo se ta’aloga.
I se fa’atalatalanoaga ma le Komesina o Ta’aloga a le malo ia Ethan Lake i le vaiaso na te’a nei, na fa’amaonia mai ai e Lake le tele o polokalame ua mafai ona ofo fuaina atu e le Ofisa mo tupulaga talavou.
O ni isi o ia polokalame e aofia ai ta’aloga fusu, fa’amalositino, pi’i, volipolo, fa’apea ai ma le anoano o isi ta’aloga o lo o fa’agasolo pea ona fa’atula’i e le Ofisa.
I le lua vaiaso talu ai, na amata ai se polokalame a le DYWA mo le ta’aloga fusu, lea e pei ona galue ai se ali’i mai Filipaina i le fa’atinoina o lea polokalame e aunoa ma se totogi, le susuga ia Timothy Manzano.
O le ali’i o Manzano, ua 54 tausaga o lona soifua, e fa’alua ona ia umia le siamupini a Filipaina i le aupaga o le Junior Welterweight, i totonu o tausaga e 8 sa avea ai o ia ma tama fusu i lona atunu’u.
Na taua e Manzano i le Samoa News lona fiafia tele e ofo mai lana taleni e fesoasoani ai i tupulaga a Amerika Samoa e fia iloa fusu, ina ia tapena ai i latou mo le ulufale atu i totonu o le mae’a.
O le polokalame lea e galue ai Manzano ma le DYWA, e tatala mo soo se tasi, e o o lava fo’i i Kalapu Fusu ua mae’a ona lesitala i lalo o Asosi Fusu i le atunu’u, e mafai fo’i ona aga’i atu e auai i lea polokalame e aunoa ma se totogi.
Na taua e Lake i le Samoa News e fa’apea, o le agaga atua o le DYWA, ia mafai ona fa’ataunu’u le moemitiga a le afioga i le ali’i kovana ia Lolo Matalasi Moliga, mo le tatalaina lea o avanoa i tupulaga talavou e a’oa’o ai i latou i so o se ta’aloga i totonu o le atunu’u.
Na taua e le Fa’atonusili o le Ofisa o le DYWA ia Jonathan Fanene i le Samoa News e fa’apea, e leai se isi itu e pito sili ona fiafia le Ofisa e vaavaai i ai, nai lo le manuia o tupulaga talavou i soo se ta’aloga, ina ia maua ai lumana’i lelei mo latou olaga ma aiga, ae maise ai o le ta’uleleia ai o le igoa o Amerika Samoa.