Tele pasi la’u pasese e le o tusa latou fausaga ma le tulafono

O fonotaga a le aufai pisinisi pasi la’u pasese ma sui o le Vaega o le Highway Safety a le Matagaluega o le Puipuiga o le Saogalemu Lautele i nai vaiaso ua tuana’i atu, ua manino mai ai o le tele o pasi la’u pasese o lo o tautuaina le mamalu o le atunuu i le taimi nei, e le o tusa lo latou fausaga ma le tulafono e faatatau i pasi la’u pasese i le atunuu.

 

Na faamaonia mai e le Pule o le Ofisa o le Highway Safety ia Fred Scanlan i le Samoa News e faapea, talu ai e le o talafeagai fausaga o pasi la’u pasese uma o lo o i ai i le atunuu i le taimi nei, o lea e mafai ai ona faapea le latou Ofisa, “o pasi uma la’upasese o lo o i ai i le teritori e le o talafeagai lo latou fausaga ma le tulafono a le feterale e faatatau i pasi la’u pasese,” ma o le tiute a le Ofisa o lo o taumafai e fai, ia fausia se tulafono e faatatau i fausaga o pasi la’u pasese o lo o i ai, ina ia mautinoa e leai se feteenaiga e tula’i mai i le va o le tulafono ma pasi a le au faipisinisi pasi i le atunuu.

 

Mo se faataitaiga e pei ona saunoa Scanlan, o fausaga o pasi la’u pasese o lo o i ai i le taimi nei i le teritori, o lo o faaaoga e le aufai pasi afi o ta’avale e fausia mai ai a latou pasi la’u pasese i le laupapa, ma o lea faiga e le o mautinoa mai ai se tulaga saogalemu ma malosi mo pasi la’u pasese.

 

“Tusa lava pe malosi ma fou laupapa o lo o fausia ai tatou pasi la’u pasese, o le taimi lava e lavea ai e matua malepe lava, leaga e le o i ai se malosi i le fausaga o a tatou pasi la’u pasese,” o le saunoaga lea a Scanlan.

 

O le mamafa faatulafonoina mo so o se pasi la’u pasese e aofia ai loli la’u uta mamafa na taua e Scanlan o lo o faatulaga mai i lalo o le tulafono, e tatau ona 10,000 tane (tonne) le mamafa pe sili atu fo’i, pe afai ae fua i masini o lo o fua ai pasi ma ta’avale la’u uta, peitai o le tele o pasi la’u pasese pa’u fa o lo o tautuaina le atunuu i le taimi nei, e le atoa se ta’i 10,000 tane le mamafa, ae o isi fo’i pasi e le atoa se ta’i 7,000 tane le mamafa.

 

Na taua e Scanlan e faapea, o se tasi o faafitauli o lo o maitauina e le latou Ofisa i le taimi nei, o le tipi mai lea e ni isi o le aufai pisinisi pasi o le afi o se pikiapu e na o le toa’a lima le pasese e mafai ona ave ai, ae ave ma fausia ai se pasi pa’u fa e la’u ai tagata e ova ma le to’a sefulu.

 

O iina tonu lava lea e mafua ai ona avatu se fautuaga a le Ofisa i auala e tatau ona fausia ai pasi la’u pasese i le teritori, ina ia talafeagai ma le tulafono ma mautinoa e saogalemu mo le tautuaina o le atunuu,” o le saunoaga lea a Scanlan.

 

Na taua e le alii fai pisinisi pasi pa’u fa ia Tanuvasa Malua e faapea, “talu lava ona feoa’i pasi pa’u fa i le atunuu i le tele o tausaga ua mavae e lei tulai mai ai lava ni fa’alavelave matuia e pei o le gau o se pasi i luga o le auala pe mafuli foi ona o le mamafa o le pasese ma maliliu ai ni tagata, na pau faalavelave tau taavale o lo o aafia ai pasi la’u pasese ua ou iloa ua tutupu o pasi e lavevea ona o le soona o saoasaoa.”

 

O le pasi la’u pasese lea na tofu i le sami i gatai o Laulii i le tausaga na te’a nei ma manunu’a ai ni isi o le pasese, o se tasi lea o faataitaiga lelei na faailoa e Scanlan i le Samoa News i le tulaga e o o i ai se pasi la’u pasese e fau laupapa pe a lavea, e le gata e malepe ese le fale i luga ae vaiti fo’i fa’amalama e faigata ona ofi mai ai tagata o le pasese.

 

O fausaga o pasi o lo o faaaoga e tautua ai le atunuu i le taimi nei, o fausaga o lo o fausia lava i totonu o le atunuu e ni isi o tufuga fau pasi ua lava lo latou tomai e faatino ai nei ituaiga galuega.

 

Na taua e Olosega Brown, o se ali’i e i ai sona laisene i le fausiaina o pasi, lea fo’i sa i ai i le fonotaga sa faia e faapea, e ese laisene kamuta e ese le laisene fau pasi, e le faapea fo’i ua maua e se tagata le laisene kamuta ona otomeki lea ona avea o ia ma tufuga fau pasi.

 

O lana fautuaga sa tuuina atu i le fonotaga i le aso lea, e tatau ona i ai ni sui o tufuga fau pasi i totonu o Komisi o le a tofia e le Ofisa ma le Matagaluega o Fefaatauaiga ma Alamanuia, ina ia mautinoa o fausaga o pasi o lo o mulimuli mai e malolosi ma atoatoa lo latou saogalemu e puipuia ai soifua o le atunuu.

 

O popolega a ni isi o tagata o lo o i ai a latou pasi pa’u fa, ina ne’i avea alaga tupe mai le feterale o lo o faamalosia ai e le Ofisa o Leoleo tulafono o le saogalemu i luga o auala, ma itu e faasa ai le toe fa’a la’u pasese o pasi pa’u fa, ae o nai pisinisi laiti nei o lo o maua ai tupe a ni isi o aiga lima vaivai.

 

Comment Here