Ads by Google Ads by Google

Tele Ofisa ma Matagaluega mumu Paketi o le Kuata Muamua

O le Ripoti mo Tupe Faaalu a Ofisa ma Matagaluega eseese a le malo mo le Kuata Muamua o le Tausaga Tupe 2013 lea ua tuuina atu i le Fono Faitulafono, o lo o atagia mai ai le tele o Ofisa ma Matagaluega ua ova tupe ua latou faaaoga mo le kuata muamua nai lo tupe sa fuafua e faaalu.

 

O ni isi o Ofisa ma Matagaluega a le malo ua ova la latou faaaoga i tupe sa fuafua e faaalu mo le kuata muamua, e ova atu i le ta’i $1 miliona le aofai o tupe ua sili ai la latou faaaoga.

 

O le vaiaso nei na tauaao atu ai e le Fono Faitulafono kopi o lenei ripoti, lea na tuu faatasia e le Faatonu tofia o le Ofisa o le Paketi a le malo ia Catherine D. Saelua, ma tuuina atu ai i le afioga i le kovana sili ia Lolo Matalasi Moliga.

 

I le otootoga o galuega ma ripoti mai Ofisa ma Matagaluega taitasi a le malo, o lo o faailoa mai ai le aofai o tupe na faaalu e ofisa ma matagaluega taitasi mo le kuata muamua o le tausaga tupe lenei, lea na amata mai ia Oketopa e oo mai ia Tesema 2012.

 

Na taua e Catherine e faapea, o Ofisa uma lava a le malo sa saunia a latou ripoti mo le kuata muamua, ma ua aofia ai i totonu o le ripoti tuu faatasi ua tuuina atu i le kovana ma le fono.

 

E 9 Ofisa o le malo o lo o taua i le ripoti ua mumu a latou paketi mo le kuata muamua ua tuana’i atu i lalo o polokalame faapitoa e aofia ai le Ofisa o Palota i le aofai e $646,500; o le VA Stadium i le aofai e $161,565; o le Ofisa o le IT i le aofai e $24,162; o le Ofisa o le Economic Stimulus Recovery Office i le aofai e $78,040; O le vaega e faaleleia le EOB i le aofai e $228,198; o le Vaega a le Property Insurance i le aofai e $365,550; ma le Fono Faitulafono i le aofai e silia ma le $1.5 miliona, o le vaega foi lea e pito tele le tupe o lo o mumu ai le latou paketi.

 

Na faamanino e le Ofisa o le Palota i le latou ripoti e faapea, o se tasi o mafuaaga o le mumu ai o le latou paketi mo le kuata muamua, ina ua le talia le paketi sa tuuina atu i le fono i le aofai e $440,000 mo le faiga palota na te’a nei, ae na o le $200,000 na talia ma sainia e le alii kovana.

 

I le fonotaga a le Kapeneta i le aso Faraile na te’a nei, na toe fautuaina ai e Lolo Faatonusili o Ofisa ma Matagaluega uma a le malo, ina ia taumafai e foia le toe tulai mai o le mumu o paketi a latou ofisa i le kuata lua o lo o lumana’i nei.

 

“E le mafai ona mumu ma ova le faaaoga a se matagaluega i tupe ua faatulaga mo kuata taitasi, pe afai e lelei le fesootaiga a le faatonusili ma lana aufaigaluega, e ala i le nonofo i lalo ma talatalanoa i soo se gaioiga o le a faia, ina ia silafia ai e le Faatonu tulaga uma o lo o agai i ai galuega a lona ofisa,” o le saunoaga lea a Lolo.

 

O se tasi o itu na manino ai le mumu o paketi a ni isi o Ofisa ma Matagaluega a le malo, o tupe ia sa totogi atu i Faatonusili o ofisa ma matagaluega i le faigamalo ua mae’a atu.

 

I faamaumauga na maua e le Fono na taua ai e faapea, e silia i le $1 miliona le aofai o le tupe na faaalu e le malo e totogi ai faatonusili o ofisa ma matagaluega a le malo o le nofoaiga ua mavae atu, lea foi e aofia ai le kovana ma le lutena kovana, ma o lea tupe e pei ona taua i molimau sa tuuina atu i luma o le fono, e le’i paketiina i totonu o le paketi o le tausaga tupe lenei 2013.