I le aloaia ai e le Ofisa o Mataupu tau Samoa o se fautuaga mai le Fa’amasinoga Maualuga, e fa’atatau i le tatau lea ona fa’anatinati le fa’atinoina o le latou pito laau e ala i le iloiloina o mataupu tau i fanua ma suafa o lo o fete’ena’i ai ni isi o aiga i le atunu’u, na fa’amaonia mai ai e le Failautusi o le Ofisa o Mataupu tau Samoa le mae’a lea ona latou iloiloina uma o talosaga sa fa’aulu atu i le latou ofisa e aunoa ma se mataupu o totoe.

“O le taimi nei ua leai ma se mataupu na faaulu mai i le Ofisa o totoe, ua mae’a uma ona matou iloiloina talosaga sa tu’uina mai i tulaga o suafa ma fanua o aiga”, o le saunoaga lea a le afioga i le Alo o Salamasina, o ia fo’i lea o le Failautusi o le Ofisa, afioga Satele Galu Satele.

“So o se faitioaga lava e faatatau i fanua ma suafa e fa’atoai mai i le matou ofisa, e le o toe i ai se faitioga e umi ona taoto iinei, o le taimi lava e taunu’u mai ai e faatulaga ai loa fo’i i le taimi lea a matou iloiloga, lea fo’i e i ai fa’atasi ma le sui o le ofisa o le loia sili lea ua tofia matou te galulue i le taulimaina o mataupu nei”, o le isi lea saunoaga a Satele.

Na pau mataupu e le o mafai ona iloiloina e le Ofisa o Mataupu tau Samoa e pei ona saunoa Satele, o mataupu o lo o taoto pea i luma o le fa’amasinoga maualuga i le taimi nei, e lei maua le avanoa e toe fa’afo’i mai ai i le Ofisa e pei ona fa’atonuina ai e le afioga i le fa’amasino sili ia Michael Kruse le Failautusi o le Fa’amasinoga, i le mae’a ai o se iloiloga sa faia i le masina na te’a nei, lea na poloaina ai e le fa’amasinoga le afioga Satele ina ia oo atu i le fa’amasinoga, e molimau i le mafuaaga ua ala ai ona tuai le iloiloina e le latou Ofisa o mataupu nei.

Na faailoa e Kruse ia Satele ma le loia sili lagolago ia Mitzie Jessop i le masina na te’a nei e fa’apea, e ui e leai se manatu o le fa’amasinoga e aia i le fatu aiga tausi a le faigamalo, ae a tuutaia loa le faatinoina o galuega a le fa’amasinoga ona ua lape le faigamalo i le faatinoina o lana fo’i pito laau, ona maua ai loa lea iina o se avanoa o le faamasinoga e fautuaina ai le faigamalo i auala e faaleleia ai a latou galuega fai faatasi.

Na taua e Satele ina ua fesiligia e le Samoa News i le vaiaso nei, o le fa’afitauli numera tasi sa tula’i mai i taimi ua te’a, o le leai lea o se loia mai le ofisa o le loia sili a le malo e fesoasoani i le Ofisa o Mataupu tau Samoa i le taimi e iloiloina ai mataupu nei.

“O le taimi nei la, o lea ua i ai le loia mai le ofisa o le loia sili ua tofia matou te galulue faatasi i le faia o iloiloga, ma ua sologa lelei la matou galuega fai faatasi i le taimi nei”, o le saunoaga lea a Satele.

O le masina na te’a nei na poloaina ai e Kruse le Failautusi a le Fa’amasinoga, ina ia tuu faatasi se lisi mo le aofa’i o mataupu o lo o taoto pea i luma o le faamasinoga e lei faia i ai se faaiuga, ina ia tuuina atu i le Ofisa o Mataupu tau Samoa mo le faia i ai o a latou iloiloga.