Na manino i le taimi o le iloiloga a le komiti o le Soifua Maloloina a le Senate ma totino o le Komiti Fa’afoe o le LBJ, le tele o le sao o le vaega tupe lea e maua mai e le falema’i i le lafoga e 2%, lea ua fa’atupe ai se vaega o le polokalame lea e ave ai gasegase i fafo mo togafitiga.

Ina ua fesiligia e sui o le komiti a le senate sui o le Komiti Fa’afoe a le LBJ e uiga i le ‘off-island referral program’, na taua ai e Leilua Mase Akapo le toe tatala o le polokalame talu ona tapunia mai i le 2008.

Na saunoa le afioga i le alii senatoa ia Galea’i M. Tuufuli e fa’apea, e tumau pea le manatu o le senate e puipui le vaega tupe lea e maua mai i le lafoga e 2%, e fesoasoani ai i le faagaioiga o le falema’i, e ui o lea ua taoto se faaiuga mai le maota o sui e faamuta loa le toe faaauauina o le lafoga lea.

“E tatau foi ona silafia e le komiti faafoe, e le na o tagata faigaluega a le malo o lo o totogiina le lafoga lea, ae o lo o tipi mai i totogi o tagata faigaluega uma i le atunu’u, e tatau fo’i la ona fa’aaoga lelei le tupe mo le falema’i”, o le saunoaga lea a Galea’i.

Na faamanino e Leilua i le komiti a le senate e faapea, i tausaga ua mavae ao tulaga lelei le polokalame lenei, e le gata sa totogi e le polokalame le pasese o le tagata gasegase e auina atu ai i fafo mo togafitiga, ae sa aofia ai fo’i ma le totogiina o le taotoga ma talavai.

“O le taimi nei, e na o le pasese o le tagata gasegase o lo o mafai ona gafatia i lalo o le polokalame”, o le saunoaga lea a Leilua, atoa ai ma lana tautinoga e faapea, o lo o taumafai pea le falema’i ina ia toe fa’afo’i le tulaga sa i ai le polokalame i aso ua mavae, e le gata e totogi le pasese ae toe totogi atu ai foi le talavai ma le taotoga.

Ae ina ua fesiligia le tulaga o le tagata tausi ma’i o lo o alu e momoli le tagata gasegase i fafo, na saunoa Leilua e fa’apea, e mafai ona totogi ma le pasese o le tagata e to’alua ma le gasegase, pe afai e iloilo atu e le komiti e talafeagai ona malaga se tasi o le aiga.

Saunoa le afioga i le alii senatoa ia Mauga Tasi Asuega, o ia foi lea o le taitaifono o le komiti o le soifua maloloina a le senate, e le tatau ona faatamala le komiti faafoe i le faaauauina o le polokalame lenei, pau lea o le auala o lo o maua ai e nai aiga lima vaivai o le atunuu se fesoasoani, e auina atu ai a latou tagata i fafo mo togafitiga.