Ao aga’i atu ai ta’aloga lona XV a le Pasefika i Papua Niu Kini i lona vaiaso fa’ai’u, e foliga mai ai o loo tele pea le avanoa e toe maua ai ni isi pine mo Amerika Samoa.

O lea ua toe fo’i atu i Amerika Samoa se vaega o le au ta’aalo sa malaga mai mo ta’aloga a le Pasefika, ina ua mae’a a latou ta’aloga, se’i vagana ai se vaega o le ‘au ta’aalo o loo fa’agasolo pea a latou ta’aloga i le taimi nei.

O se otootoga lava lea o le tulaga o loo i ai tatou au taaalo o loo totoe i Papua Niu Kini i le taimi nei.

SOFTBALL

O le aso Lulu (taimi Amerika Samoa) fa’atoa fa’ataunuuina ai le ta’aloga a le au Softball a Amerika Samoa ma le ‘au a Papua Niu Kini. E na o le lua lava ‘au Softball o loo tausinio i ta’aloga a le Pasefika i le taimi nei, ae na o le tasi le pine e tausinio ai ‘au ia e lua, e na o le pine auro.

Afai ae manuia Amerika Samoa i lana ta’aloga, lona uiga e manumalo i latou i le pine auro, ae afai ae fa’atamala, o le a leai se latou pine e maua.

E tusa ai ma le saunoaga a le faiaoga a le ‘au Softball, ua tapena le latou ‘au mo le ta’aloga, ua leva fo’i ona latou sauni.

BEACH VOLLEYBALL

O le aso ananafi na amata aloaia ai le ta’amilosaga o ta’aloga “Beach Volleyball”, lea na tausinio ai ‘au uma e lua a Amerika Samoa i le vaega o ali’i ma tama’ita’i.

I le vaega o tama’ita’i, na ta’aalo ai Amerika Samoa ma Papua ma manumalo ai i seti sosoo e lua ia Papua (2-0).

Ae i le vaega o ali’i, sa manumalo fo’i i le latou ta’aloga ma Solomona i seti sosoo fo’i e lua (2-0), ma ua fa’amoemoe o le taeao nei e ta’aalo ai le vaega o ali’i ma le ‘au malosi mai Guam, ae o tama’ita’i e ta’aalo ma Tahiti.

VOLLEYBALL (INDOOR)

O loo tulaga lelei pea le ‘au volipolo a tama’ita’i i le taimi nei, ina ua manumalo uma i a latou ta’aloga sosoo e tolu talu ona amata mai le ta’amilosaga, se’i vagana ai le ‘au a ali’i ua lua a latou faiaina, tasi le manumalo.

O manaumalo a tama’ita’i na maua ia Fiti, Tahiti ma le latou ta’aloga i le aso ananafi ma le ‘au a Wallis ma Futuna, lea fo’i na sosoo ai seti a Amerika Samoa e (3-0).

O le taeao nei la lea ua fa’amoemoe e ta’aalo ai Amerika Samoa ma le ‘au malosi a tama’ita’i mai Niu Kaletonia.

I le vaega o ali’i, na sosoo a latou faiaina e lua ia Tahiti ma Fiti, ae na manumalo i le latou ta’aloga ma le ‘au mai Nauru, lea fo’i na sosoo ai seti e (3-0) a Amerika Samoa i le leai a Nauru, ma ua faamoemoe o le latou ta’aloga lona fa i le taeao nei, o le a ta’aalo ai ma le au mai Tuvalu

VAEGA TENISI

E toe toatasi lava le sui o le tatou Au Tenisi o loo maua pea lona avanoa e tausinio ai i le play-off i le vaiaso nei, ae o isi uma sui o le ‘au ua le manuia a latou taumafaiga, e aofia ai fo’i ma tatou ‘au fefiloi a ali’i ma tama’ita’i.

O le vaega lona lua o le play-off i le aso ananafi na le manuia uma ai taumafaiga a le tatou Au Tenisi, ina ua faiaina i ‘au malolosi mai Papua, Fiti ma Solomona.

O le tama’ita’i o Kalani Pisi Soli, toe pau lea o le sui o le tatou au tenisi ua ‘au atu i luga i le “quarterfinal”, ma ua fa’amoemoe o le taeao nei la te ta’aalo ai ma le tama’ita’i mai Papua Niu Kini.

O le aso ananafi na fa’ato’ilalo ai e Soli le numera #3 a le Pasefika mai Fiti, ma ua iloga fo’i le lelei o le taumafaiga a Soli ao fa’agasolo atu i vaega fa’ai’u o ta’aloga.

FUSUAGA

O le aso ananafi i Papua na amata aloaia ai ta’aloga fusuaga lea ua fa’amoemoe e tausinio ai le alo e to’atasi o le atunu’u ia George Tanoa Jr.

E amata le polokalame i le fuaina o pauna mo alii fusu uma o le a tausinio, ona fa’atulaga ai loa lea o le kalena mo le ta’amilosaga.

E tusa ai ma faamaumauga o ta’aloga a le Pasefika o loo fa’agasolo i le taimi nei, e to’a 65 le aofa’i o ali’i ma tama’ita’i fusu ua mae’a ona lesitala mo fusuaga o le vaiaso nei, o i latou ia o le a fusu i aupaga eseese e 11, lea e aofia ai aupaga e 7 mo ali’i ae 4 mo tama’ita’i.

Saunoa Tanoa Jr., i le Samoa News, e faapea, “Mai le tele o masina o koleni mai ma tapena mo lenei fa’amoemoe, o lea ua toe lava o ni nai itula ona amataina loa lea, ma ua ou talitonu i le fesoasoani mai o le Atua ia te a’u, ua ou sauni fo’i mo la’u ta’aloga,” o le saunoaga lea a Tanoa Jr.

VAEGA TAPOLO

O le vaiaso nei na taunuu ai i Papua Niu Kini sui e to’a 5 o le au Tapolo, lea ua fa’amoemoe e fa’ai’u ai lava ta’aloga o loo fa’agasolo i le taimi nei.

O sui e to’a 5 o le au Tapolo e aofia ai Faalialia Mauigoa, Pemerika Gillet, Tulele T. Laolagi, Faasoasoaagatumua Carl Viena ma Margret Tupito Ruth Walker Gadalla.

E to’a 11 atunuu o le Pasefika o le a tausinio i le ta’aloga Tapolo lea ua fa’amoemoe e amata i le taeao nei, ae o sailiga siamupini o le a fa’atautaia i le aso Tofi ma le aso Faraile, ao lumana’i ai le tapunia aloaia o Ta’aloga a le Pasefika i le po o le aso To’ona’i o le vaiaso nei, i le sauniga e amata i le itula e 7:00 e oo atu i le 9:00 i le afiafi lava lea.