Ads by Google Ads by Google

Tele fesili a faipule e le o mafai e le LBJ ona tali

I se tusitusiga ua tauaaoina e le Taitaifono o le Komiti Faafoe a le Falemai ma lana Pulega i le vaiaso na tea nei, o loo faailoa atu ai e le Sui Fofoga Fetalai nisi o fesili e lei mafai ona o latou taliina, i le iloiloga lea sa valaauina e le Komiti o le LBJ/Soifua Maloloina a le maota o sui i le vaiaso na tea nei, ina ua fesiligia le falemai i tulaga o a latou siitaga ua fuafuaina nei.

O se tasi o fesili e lei mafai ona taliina e le pulega a le falemai, poo fea e oso mai ai le $15 miliona lea ua latou taua, e nofoaitalafu ai le falemai pe a maea le tausaga tupe lenei 2012, ma o le isi lena mafuaaga o a latou siitaga i totogi, e tau saili ai se  tupe e faatumu ai le pu lea.

E lei mafai foi e le pulega a le falemai ona faamanino i luma o le komiti, pe na faapefea ona fuafua a latou siitaga ua faalauiloa mai nei mo le atunuu, e le o mafai ona faamanino pe fia se tupe o le a maua mai i le siitaga fou lenei, a’o a foi auala o le a faaaoga i ai lenei tupe.

“Pau le mea lea ua matou maitauina, ua outou talosaga mai i tagatanuu o Amerika Samoa ina ia o latou talitonu ma le faatutua, o siitaga i pili a le falemai o le a manuia ai le falemai,” o se vaega lea o le tusi a Talia Faafetai Iaulualo na ave i le taitaifono o le komiti faafoe a le falemai ia Moananu Va.

Na taua e Moananu ma le pule a le falemai o Michael Gerstenberger i le la molimau i luma o le maota o sui i le vaiaso na tea nei na la taua ai, ina ua le mafai e le malo ona tali atu i le faafitauli tau tupe lea ua feagai nei ma le falemai, na manatu ai loa le pulega, e leai lava se isi auala e mafai ai ona maua e le falemai se isi alagatupe, ua na o le aapa loa i le atunuu e ala i le sii o a latou pili.

Peitai na taua e nisi o sui o le komiti, e le o se faaiuga sao lea ua faia e le pulega a le falemai e foia ai le faafitauli tau tupe lea ua feagai ma i latou, o le faatamala o le malo e totogi ana aitalafu ae faaee ai fua le avega mamafa i le atunuu.

O le tusi lea na tuuina atu e le Sui Fofoga Fetalai i le pulega a le falemai i le aso Faraile na tea nei, o loo ia talosagaina ai le falemai ina ia toe iloilo a latou siitaga lea ua fuafua e amata i le po o le kerisimasi o loo lumanai nei.

Saunoa Iaulualo, e le o pogisa le atunuu ma le malo i le tulaga pagatia o loo feagai ma le falemai ona o le itu tau tupe, peitai e le avea lea ma itu e soona faia ai nei siitaga i se auala e le gafatia ai e le atunuu ona totogi.

“Ou te popole ina nei avea siitaga nei ma itu e taofia ai le agai atu o nisi o le atunuu e vaai le fomai, ma iu ai i se isi tulaga matuia o latou gasegase,” o le saunoaga lea a Iaulualo i lana tusi ia Moananu.

Saunoa le afioga i le alii Senatoa Malepeai Setu i le vaiaso na tea nei, e le tatau ona faia faapea siitaga a le falemai mo le atunuu, pe afai ua faatamala le malo e totogi ana aitalafu.

“Afai ua le mafai e le malo ona totogi ana aitalafu, talosaga mai le falemai i le fono sei avatu se isi fesoasoani, ae le o le aapa e faaee le avega mamafa i luga o tauau o le atunuu, lea o loo pagatia ona o pili a le ASPA ma le taugata o le soifuaga ua i ai i le taimi nei,” o le saunoaga lea a le afioga i le alii Senatoa ia Malepeai.

Saunoa Iaulualo, ua manino i ripoti ua i luma o le komiti le mafuaaga ua ala ai ona feagai le falemai ma le faafitauli tau tupe, ina ua le mafai e le malo ona totogi atu tupe ia ua maea ona faatulafono e fesoasoani ai i le falemai.

Talu ona faalauiloa mai e le falemai a latou siitaga mo ana tautua, e lei toe nofonofo lelei le lautele o le atunuu mai le faaalia lea o latou finagalo e teena ai lea fuafuaga.

O le itula e 3:00 i le aoauli nei ua faamoemoe e faia ai se iloiloga faalauaitele a le pulega a le falemai ma le atunuu, mo le talanoaina lea o a latou siitaga lea ua fuafuaina nei.

O lenei iloiloga o le a faia lea i le malumalu a le falemai i Fagaalu, e tatala mo soo se tasi e fia faaali sona finagalo i lenei mataupu.

Saunoa Iaulualo, o le avega lea o le a faaee mai i le atunuu pe afai ae faamamaluina siitaga a le falemai, e le gata o le a pagafia ai tagata o loo nonofo i Tutuila nei, ae faapena foi i Manu’a, aua afai e fia malaga mai se tasi e vaai le fomai, e totogi muamua le pasese e sau ai ma toe foi atu i Manu’a e $160, ona faatoa alu atu ai lea i le falemai, ona totogi foi lea o le $50 e vaai ai le fomai, ae ese ai le totogi o talavai ma isi togafitiga e manaomia.

Ua tutu faatasi taitai o le fono ma sui o itumalo taitasi e fautuaina le pulega o le falemai ina ia toe silasila totoa i a latou siitaga ia ua fuafua e tuu mai i le atunuu.