Ads by Google Ads by Google

Tele fa'asea tuai kilia pasese Lady Naomi taimi taunu'u mai ai

E to'atele le mamalu o le atunu'u na fa'aalia o latou finagalo fa'asea ma le le fiafia i le aso Tofi na te'a nei, ona o le fa'afitauli lea na tula'i mai ina ua silia ma le itula talu ona taunu'u le Lady Naomi mai lana malaga mai Samoa ae fa'atoa taunu'u sui o le Ofisa o Femalagaaiga.

 

Na taua e Fred Ulutonu, o se tama e 54 tausaga mai Fagatogo sa fa'atali pasese ai i luga o le uafu i le taeao lea, ua tatau ona fai se fuafuaga a le Ofisa o Femalagaaiga i se auala e foia ai le fa'afitauli lea ua maitauina le tupu soo, o le fiu e fa'atali sui o le Ofisa o Femalagaaiga e kilia le va'a i le taimi e taunu'u ai.

 

Saunoa le susuga a Mata'u Meafua Keniseli, o se Supavaisa a le Ofisa o Tiute e fa'apea, e le o se taimi muamua lea ua tula'i mai ai le fa'afitauli lenei, o le tuai atu o sui o le Ofisa o Femalagaaiga e kilia le pasese ae ua leva ona taunu'u le va'a.

 

E le i avanoa le Pulesili o le Ofisa o Femalagaaiga ina ua taumafai le Samoa News e fesiligia ananafi, i sona finagalo e fa'atatau i lea mataupu.

 

Saunoa le susuga ia Peseta Dennis Fuimaono ina ua valaau atu i ai le Samoa News i lana telefono, e toe valaau mai i se taimi o le aoauli ananafi pe a uma lana fonotaga, o lo o fai, peita'i e lomia lava lenei ripoti e le i toe valaau mai lava le afioga a Peseta.

 

Na taua e se ali'i e lata i le 20 tausaga o galue i le Ofisa o Femalagaaiga e fa'apea, e le tatau ona tupu so'o le fa'afitauli lenei o le tuai lea ona kilia le pasese a le va'a mai Samoa i le taimi e taunu'u ai, ona ua mae'a lava ona vaevae Vaega ta'itasi i totonu o le Ofisa fa'apea ai ma latou tiute tauave.

 

"O le tulaga tuai sa i ai le Ofisa i le tele o tausaga ua mavae, a o le i taunu'u le va'a ua leva ona i ai sui e gafa ma le kiliaina o le va'a, o le latou mafataioi lava lena, e le tatau la ona tula'i mai se fa'aletonu e pei o le tuai aua ua i ai lava tiute tauave a vaega ta'itasi", o le saunoaga lea a le sui lea e le i finagalo e fa'ailoa lona suafa.

 

E ui e le i finagalo le afioga i le Loia Sili e faia sana saunoaga e tusa ai o lenei mataupu ina ua fesiligia e le Samoa News o ia i le vaiaso nei, peita'i ina ua fesiligia pe talafeagai le tuai ona kilia o le va'a pe afai ua leva ona taunu'u, saunoa Talauega Eleasalo Ale, e le tatau ona tupu lea tulaga pe afai ua maea ona fa'atulaga galuega a le Ofisa.

 

Toeitiiti leai se isi o le mamalu o le atunu'u na fa'atali pasese i luga o le uafu i le taeao lea, e le i fa'aalia sona finagalo le fiafia i le tuai tele lea ona kilia o le pasese a le va'a, ae ua silia i le itula talu ona taunu'u le va'a.

 

O lo o fa'atali se fa'aiuga o le su'esu'ega a le Loia Sili o lo o fa'asaga e uiga i lenei mataupu.