Ads by Google Ads by Google

TELE FAASEA FAASAGA KOMITI NA FAATAUTAIA TUUGA FAUTASI FU’A

E foliga mai o le komiti na faafoeina le tuuga fautasi o le sisigafu’a na mae’a atu nei, lea ua tele i ai faasea ma faitioaga a ni isi o auvaa sa auai i le tuuga, ona o faaiuga na latou faia ua mafua ai ona gugulu le toatele i le faatinoina o le tuuga fautasi.

 

Talu mai lava le taimi na faatoa maea ai le tuuga fautasi seia oo mai i le taimi nei, o lo o maua pea e le Samoa News ni isi o faasea mai le atunuu, i le le sa’o o le faatautaiga o le tuuga fautasi e pei o le toe suia o le vaega na amata mai ai le tuuga, atoa ai ma le le tausisia o tulafono a le komiti i le taimi o le tuuga, ona e le o vaa uma na liliu mai i le pine lea na faatulaga e mimilo mai ai le tuuga.

 

Ae ina ua fesiligia e le Samoa News le taitai komiti o le tuuga fautasi, le alii Lutena ia Eric Runyon o le U.S Coast Guard e faapea, ina ua maea le tuuga fautasi, sa maua le avanoa na te toe iloiloina ai le tape sa pu’eina e le fale ata o le KVZK-TV, ma o iina na faavae mai ai le faaiuga e pei ona i ai nei, o lo o sa’o lava le faatautaiga o le tuuga, e leai foi se mea na faaletonu.

 

I le tulaga o le vaega na amata mai ai le tuuga, na taua ai e Runyon e faapea, o le faaiuga sa faavae lea i luga o le tulaga leaga sa i ai le tau i le afiafi o le aso Lua lea na sosoo ma le taimi o le tuuga.

 

Na taua e le afioga i le matua ia Pulu Ae Ae Jr mai Pago Pago i le Samoa News e faapea, e le o toe manatu le afioaga i le faaiuga ua i ai le tuuga fautasi, pau le tulaga lea ua agai i ai faasea o le faiuga sa faia e le komiti na mafua ai ona sui le vaega e amata mai ai le tuuga.

 

Saunoa Pulu e faapea, e le iloa pe aisea na toe sui ai e le komiti le vaega e amata atu ai le tuuga, ae o lea lava sa tulaga lelei le tau i lea taeao, e le gata i lea, e lei maua se taimi o auvaa e faamasani ai i le liliuina o le vaa pe afai ae oo atu i le pine, ma o iina lea e talitonu o ia na mafua ai ona tulai mai le faaletonu i le tuuga, ma le oo uma ai fautasi i le pine sa tatau ona liliu mai ai, sei vagana ai vaa e tolu e i ai le Aeto, Satani ma Fagasa.

 

“Sa le tatau lava i le komiti ona sui le vaega sa masani ona amata mai ai tuuga fautasi mai le tele o tausaga, lea la ua latou suia le vaega e amata mai ai le tuuga e aunoa ma se vaa na faamasani i le auala e liliu mai ai a la latou vaa pe a oo i le pine e liliu mai ai i tai,” o le saunoaga lea a Pulu.

 

Fai mai Pulu, e le o iloa e le komiti o le latou faaiuga lea ua aafia ai le tautiga sa feagai ma le tele o auvaa ao taumafai mai lenei faamoemoe.

 

O se tasi o itu o lo o fesiligia e Pulu, pe aisea na le faaee ina ai le faailoilo i le taimi na tini ai le Fuao e pei ona masani ai i le tele o tuuga fautasi, ae na faatoa faaee ina ua tini le Aeto.

 

E fia faailoa atu e le Samoa News e faapea, e le gata na molimauina e le sui o le Samoa News sa i ai i le nofoaga na tini atu ai le tuuga le tulaga e pei ona saunoa i ai Pulu, ae faapena foi i le toatele o le atunuu sa tumutumu ai i le vaega lea, na o latou molimauina foi le tulaga e pei ona fesiligia.

 

Na maua le avanoa e fesiligia ai e le Samoa News le Sui Failautusi o le Ofisa o Mataupu Tau Samoa, le tofa ia Tuiagamoa Tavai e faatatau i lenei mataupu, aemaise ai o se auala e mafai ai e le latou Ofisa ona tali atu i faasea mai sui o ni isi o afioaga sa tausinio i le tuuga fautasi o lenei tausaga.

 

Na taua e Tuiagamoa e faapea, sa latou faatali i se ripoti e ono tuuina atu e le alii Lutena sa taitaia le komiti o tuuga faatasi, e faatatau i le tulaga sa i ai le tuuga fautasi a’o le’i maea sauniga o le sisigafu’a i le aso Lulu na te’a nei, ina ia maua ai se malamalamaaga a le Ofisa, ae talu ai e leai se ripoti sa tuuina atu e le alii Lutena, sa latou manatu ai loa e le’i i ai se faaletonu na tulai mai i le taimi o le tuuga.

 

“Ae na ou te’i ina ua ou fo’i atu i le fale ina ua mae’a le fu’a i le afiafi lea, ae faasau loa i talafou a le KVZK-TV faasea a ni isi o kapeteni o fautasi sa tausinio e faatatau i le faaletonu sa i ai le faatinoina o le tuuga fautasi, ma o iina na faatoa ou iloa ai loa sa i ai le faaletonu na tulai mai,” o le saunoaga lea a Tuiagamoa.

 

E le gata i talafou na maimoa i ai Tuiagamoa, ae sa maua foi le avanoa latou te faasoa ai ma ni isi o tagata o le atunuu lautele e faatatau i faaletonu na tulai mai i le taimi o le tuuga fautasi.

 

Na fesiligia Tuiagamoa pe na maua sona avanoa e silasila ai i le tuuga fautasi na mae’a atu nei, ae na tali le Sui Failautusi e le’i umi se taimi na matamata ai i le tuuga fautasi ae agai atu loa i le malae i Tafuna mo le tapenaina o isi fuafuaga o le sisigafu’a.

 

“O se tasi o itu na faateia ai a’u ina ua vaavaavi atu i le T.V, ua sui le vaega e amata mai ai le tuuga e aunoa ma le toe logoina mai o le matou Ofisa i lea suiga ae poo ai na faia le suiga,” o le saunoaga lea a Tuiagamoa.

 

Fai mai Tuiagamoa, o le tuuaga lava ia sa fuafua e amata mai i tai i le moana e pei ona masani ai, peitai e oo mai i le taimi nei na te le o iloaina poo ai na toe suia lea faaiuga. Sa ia taua foi e faapea, afai na mafua ona sui ona o tulaga o le tau, i lona talitonuga sa lelei lava le tau sa i ai le taeao na fai ai le tuuga, e le’i ono o’o atu lava i se tulaga e ono suia ai le vaega e amata mai ai le tuuga.

 

Na fai le tofa Tuiagamoa ma sui o le komiti ma le latou ofisa e faaleo le agaga faamaualalo i afioaga uma o lo o aafia o latou finagalo ona o le faaiuga o le tuuga. Sa ia taua e faapea, sa i ai lava le manatu o le a sao ma uli le tuuga fautasi o lenei tausaga, peitai o lea foi ua tulai mai ni isi o faafitauli e faatatau i le faaiuga a le komiti.

 

E ui i faasea e pei ona faailoa, o lea ua taoto le faaiuga a le komiti mo le tuuga fautasi o lenei tausaga, e pei ona avea ai le Fuao mai Vatia ma siamupini o le sisigafu’a o le 2013.

 

O le tuuga fautasi o le tausaga fou e pei ona taua e le Ofisa o Mataupu Tau Samoa ma le afioga i le kovana sili ia Lolo Matalasi Moliga, o le a vaavaai ai i le ono aumaia lea o se vaa mai Samoa e siamupini i le latou tuuga o le Teuila ia Setema o le tausaga nei, e tausinio i le tuuga fautasi o le tausaga fou pe a aulia atu i le ola ma le malosi, peitai o le fuafuaga o le a toe faamautu i le tausaga fou.