Ads by Google Ads by Google

Tele faalavelave tau taavale na tulai mai i le vaiaso o le fu’a

E lata i le 20 faalavelave tau taavale na tula’i mai a’o alo atu le atunuu i le faamanatuga o le Sisiga Fu’a.  O nei faalavelave, e pei ona faamaonia mai e le Taitai o le Vaega o Taavale Afi a le Ofisa o Leoleo ia Taaloloioufaiva John Cendrowski e aofia ai taavale e oso i tua ma le auala, ave taavale e momoe ao alu le taavale, ave taavale ‘onana ma ave taavale e sosola i le taimi e tutupu ai faalavelave.

 

Na saunoa Taaloloioufaiva e faapea, e sili atu ona matuia faalavelave na tutupu i le fu’a o le tausaga lenei nai lo le vaitaimi o le fu’a o le tausaga na te’a nei.

 

O le taeao foi ananafi na tulai mai ai se faalavelave i le afioaga o Pago Pago, ina ua oso ese ma le auala se taavale na sau mai le itu i tai o Pago Pago e aga’i atu i Fagasa, ma o lo o tau sailia e leoleo le ave taavale o lea taavale.

 

Na taua e ni molimau sa i ai i le taimi na tupu ai le faalavelave i le Samoa News e faapea, pe tusa o le tea laititi o le 7:00 i le taeao na tupu ai le faalavelave, ina ua saoasaoa le taavale ma ave atu e se tamaitai ma oso aga’i i se auvai lea e kolosi i le pioga o lo o i lalo tonu ane lava o le pa o le malumalu a le Ekalesia Metotisi i Pago Pago.

 

Na taua e se molimau i le Samoa News e faapea, o ia na ma isi alii na latou toso ese ina maia le tamaitai na aveina le taavale mai totonu o le taavale.

 

“E leai ma se vaega o le tino o le tamaitai na ou vaaia o leaga, e oo lava foi i se maosia e  leai ma se mea na ou vaai i ai,” o le tala lea a le isi molimau na talanoa mai i le Samoa News.Na taua foi e le molimau, o lana vaai e le’i taitai te’a le ‘ona o le tamaitai na alu atu i le taavale.

 

“Na ona maea lava ona toso mai i fafo, sau loa ua tu tu i le moa o le auala ma pei e ataata i le mea sa tupu, ma savalivali atu ai lava i le itu i gatai ma le toe vaaia atu ai lava lona tino,” o le isi lea faamatalaga a le molimau.

 

Na taua e se tina, o le 7:00 na tupu ai le faalavelave, ae o le 9:20 na faatoa taunuu ai le taavale a leoleo, ae e taunuu atu le taavale leoleo, ua leva na i ai se taavale toso e saili se auala e mafai ona si’i mai ai i luga lea taavale.

 

Na taua e ni isi o le nuu o Pago Pago e faapea, o le lua ai lea o taavale ua lavevea i le auvai lea.

 

FAALAVELAVE A’O LUMANA’I LE FAAMANATUINA O LE FU’A

 

E tolu faalavelave tau taavale na tulai mai i le aso na sosoo ma le aso o le sisigafu’a, ma o ia faalavelave uma na sosola ave taavale ina ua tuana’i le faalavelave.

 

Saunoa Taaloloioufaiva e faapea, “E tasi lava le mafuaaga e ala ai ona sola le ave taavale, sa ‘ona ma e le mana’o e loka o ia e leoleo.”

 

Na taua e le alii kapeteni e faapea, afai e mumusu ave taavale e loka i le falepuipui, aisea e fiafia ai e feoa’i ‘onana i luga o taavale.

 

FAALAVELAVE TAU TAAVALE I LE ASO O LE FU’A

 

E lima faalavelave tau taavale na tutupu i le Aso Lulu, na aofia ai faalavelave e lima lea na sosola ese ai ave taavale ma na fa’aalia e Taaloloioufaiva, e tasi lava le mafuaaga e sola ai se ave taavale i le taimi e tupu ai se faalavelave, ona o lo o ‘ona.

 

O se tasi o faalavelave e pei ona faamaonia mai e le alii Kapeteni na mafua ai ona taofia se tamaitai i le potu tigaina i le falemai i Fagaalu, ina ua moe ma i’u ina lavea ai lana taavale.

 

“E le’i ‘ona le tamaitai na aveina le taavale, ae na mafua ona moe ona ua vaivai mai glauega, ma o se tasi lea o itu e tatau ona lapataia ai le atunuu, o le faaauau ona e fealua’i i le taavale ae o lo o lagona le vaivai o lou tino, o se tulaga e le saogalemu tele lea tulaga,” o le saunoaga lea a Taaloloioufaiva.

 

O le aso ananafi na toe tula’i mai ai foi seisi faalavelave tau taavale i Utulei.  O le isi faalavelave na tula’i mai i Leone ina ua oso i tua ma le auala se taavale pikiapu lanumoana, ma sola ese ai le ave taavale mai le nofoaga na tupu ai le faalavelave, ma o lo o taofia pea e leoleo lea taavale e faatali le tagata e alu atu e piki mai.

 

O le tutupu mai ai o faalavelave laiti nei i vaega eseese o le atunuu, ua toe lapataia ai e  Taaloloioufaiva le atunuu o lo o faafoeina taavale i luga o le alatele, ina ia faaeteete i soo se taimi latou te faafoeina ai taavale, aua le tagofia le ava malosi ma ia manatua, e maliu le tagata i le ave taavale saoasaoa ma le faatautala atoa ai ma le fealua’i ‘ona i le taavale.