O se tasi o fa’afitauli e feagai pea ma le malo i vaitau a’o lumana’i ai le fa’amanatuina o le aso na sisiina a’e ai le fu’a a le malo o Amerika i laufanua o Amerika Samoa, o le tau sailiina lea o ni afioaga latou te taliina aumalaga mai Samoa, ia o loo valaaulia e faafiafia i lona aso fa’apitoa.

Na taua e le afioga i le matua ia Togiola Tulafono e faapea, ua avea le mumusu o afioaga e toe fa’aauau lea auaunaga sa masani mai ai i le tele o fatia ua sola ma itu ua aapa atu ai loa le malo i aiga, ina ia fesoasoani mai i le tausoaina o lea fo’i pito laau.

Saunoa Togiola, tusa lava fo’i pe tuuina atu i ai e le malo lana fesoasoani fa’atauva’a e $10,000 e fesoasoani ai i nu’u ma afioaga mo le taliina o aumalaga mai Samoa, e tumau pea le le toe talia e nu’u o le tuuina mai o lea fesoasoani.

O lea mataupu na saunoa i ai le alii kovana ina ua fesiligia e se tootoo o ia i luga o lana polokalame i le faaiuga o le vaiaso na te’a nei, i le mafuaaga ua le tuu ai aumalaga mai Samoa e tali e nuu ma afioaga e pei ona masani ai i aso ua mavae.

Na taua e le tootoo e faapea, e foliga mai i lana vaavaai atu i le auala lea ua faafoe ai e le malo polokalame o le fu’a i lenei talutalufou, ua amata ona tau ese le paega lea ua pae ai nu’u o loo valaaulia mai Samoa.

“O le uiga o la’u tala, i aso ua te’a e saili nuu e talia faalaua’itele malaga mai Apia, o le aoga o lea faiga, e le gata e faaolaola ai pea aga ma tu a le atunu’u i tulaga o alii taeao ma fealoaloaiga faa Samoa, ae o se avanoa lelei lea mo matai laiti faatoa tau amata latou te molimauina ai gaioiga uma nei,” o le saunoaga lea a le tootoo.

Na faailoa e le tootoo i le kovana e faapea, e leai ma se mea o faaletonu ai fuafuaga uma a le malo mo le faamanatuina o lana fu’a i tausaga uma lava, e o’o i le sisigafu’a lea faatoa mae’a atu, sa selau pasene mea uma, ae o lana fautuaga e aoga mo le aga’i i luma.

Na faaigoa e le alii kovana le fautuaga a le tootoo, “o se fautuaga lelei, poto ma atamai” ma, o le agaga fo’i lea o le malo o lo’o i ai, ia faaauau pea ona faia tulaga ia i le taliina lea o aumalaga mai Samoa, e pei ona masani mai ai le atunuu i le tele o tausaga ua te’a.

“Ae o le mea ua tupu, ua fiu e toe talosaga atu i nuu ua leai ma se agaga fia talimalo ua i ai i alalafaga, o le manaia ma le matagofie lena o fealoaloaiga faa Samoa, ae o le mea ua maitauina, ua teena mai lava e afioaga talosaga a le malo e tuuina atu,” o le saunoaga lea a le alii kovana.

E ui e le’i taua e le alii kovana se igoa o se afioaga i lana saunoaga, peitai na ia taua e faapea, e i ai nuu talu lava ona ia nofo mai i le nofoa, e na o le faatasi lava ona latou talia aumalaga mai Samoa, ma ua toe fiu le malo e toe talosaga atu i ai ae ua mumusu, o isi foi afioaga, ua ta’i faatolu fa’afa talosaga sa tuuina atu i ai ae ua leai lava se agaga fia talimalo, e tete’e mai lava talosaga a le malo.

“E o’o lava fo’i i le fuafuaga a le malo mo le tuuina atu lea i ai o seleni e fesoasoani ai i le taliina o malo, ua le toe suia ai lava faaiuga a afioaga,” o le isi lea saunoaga a le alii kovana.

Saunoa le alii kovana, sa le’i masani ai ona tuu atu e le malo fesoasoani tupe tai $10,000 i afioaga e fesoasoani ai i le taliina o aumalaga mai Samoa, ae ina ua nofo mai i le nofoa ma ia maitauina le faigata o le galuega, sa lagona ai le alofa ona e fai lava si mamafa o le galuega, ona o aso ia, o isi au malaga e ta’i lua vaiaso o tali e nisi o afioaga, peitai ina ua taumafai le malo e tuu atu i ai lea fesoaosani, ua le toe mafai lava ona talia e nisi o afioga.

“O le mafuaaga lena ua saili ai loa e le malo le fesoasoani a aiga, e pei ona maitauina ai e le atunuu le tumutumu o Pava’ia’i i le maota o le afioga i le alii Senatoa ia Paogofie i le tele o tausaga, faapea ai ma le maota o le tofa ia Galoia a’o le’i tuua le malo, ona o nisi ia o tulafale sa tua lava i ai le maloa i le 10 tausaga talu ai mo le taliina o aumalaga mai Samoa,” o le saunoaga lea a le alii kovana.

Soo se taimi lava e le talia ai e afioaga talosaga a le malo, e aapa ai loa i nai tulafale ia ma o la aiga mo sa laua fesoasoani, ma o nisi o taimi e lagona ai lava le mumusu o nai toeaiina, ae tali mai lava ona o le fia fesoasoani mai i le malo, e pei ona saunoa Togiola.

Ae mo le tausaga lenei, na taua e Togiola le faigata foi ona tau saili o ni afioaga latou te taliina aumalaga mai Samoa, ma saili ai loa i aiga i tua, lea na tali mai ai le afigoa i le Fofoga Fetalai ia Savali Talavou Ale ma lona aiga, ma latou taliina ai le afioaga o Saleaumua, ae o le afioga ia Vui Seigafolava Saulo ma lona aiga na taliina le  afioaga i Lano, ae o le tofa ia Vaimaona na taliina le aumalaga a le Failipu a Leoleo.

Fai mai le alii kovana, talosia e tele le faakerisiano o le atunuu, ina ia toe faaolaola  ia lagona ma faataua ai le manulauti faakerisiano, “o le alofa i lou tuaoi ia pei o oe lava ia te oe”.

Na faai’u le saunoaga a le alii kovana i lona faafetaia lea o i latou uma sa ofoina atu la latou sao mo fuafuaga a le malo mo le fu’a o lenei tausaga.