O se tasi o itu taua na mafai ona fa’ailoa e ni isi o Matua o Faiva o lo o latou fa’asoaina mataupu eseese i le Fonotaga lona 28 a le Pasefika i mataupu tau i le Siosiomaga o loo talimalo ai Amerika Samoa i le vaiaso nei, o le mataupu e fa’atatau i le tele lea o a’afiaga o fa’atoaga eseese i le Pasefika, e mafua mai i le fesuisuia’i solo o le tau i lea taimi ma lea taimi.

Na taua e le ali’i faiaoga o lo o ia a’oa’oina mataupu tau i Fa’atoaga i le Iunivesite o le Pasefika i Saute (USP) i Alafua, Samoa i lana saunoaga e fa’apea, “Fa’apei ona fetaia’i o le tagata soifua ma fa’alagona eseese ona o ma’i o le tino e mafua mai i meaai, e fa’apena fo’i ona fetaia’i le laau ma ma’i eseese o le tino e mafua mai i le fesuisuia’i o le tau mai lea taimi i lea taimi.”

Na taua e le susuga Dr. Rashmi Kant i lana folasaga i le taeao ananafi e fa’apea, o le tele o suiga i le tau i lenei vaitau o le senituri ua i ai le lalolagi ma le Pasefika, ua mafua ai ona fetaia’i laau eseese ma lu’itau tetele o le olaga.

“Afai e tele le palapala e tafea aga’i i le sami, ona ola lau tagi tagi fo’i lea o laau toto ina ua le lava le palapala e fa’amoemoe i ai lo latou ola lelei,” o le isi lea saunoaga a Kant.

O le susuga a Kant, sa fa’apitoa lana saunoaga i a’afiaga o fa’atoaga ona o le fesuisuia’i o le tau i le Pasefika.

“O le tele o fa’ama’i eseese ua a’afia ai fa’atoaga e pei o manu nini’i, manu fa’alafua o loo ta’atele i laueleele o Samoa, aemaise ai le le mautonu o le timuga poo le la i lea aso ma lea aso, o ‘auga uma nei o loo fesoasoani i le fa’atupulaia o ma’i eseese e a’afia ai laau toto e pei o le talo o loo lagolago i ai Samoa, ma fualaau ‘aina e pei o le kapisi lapotopoto, aemaise ai fo’i isi laau e pei o le esi,” o le isi lea saunoaga a Kant.

Na taua e Kant e faapea, afai e tetele le mugala mo se taimi e sili atu i le 3 masina, o le a le ola lelei laau toto, ae o le a avea fo’i lea ma auala e fa’atupulaia ai isi manu nini’i latou te fa’atamaia le ola lelei o le laau toto.

Mo se fa’ata’ita’iga o le iniseti fa’alafua o le “tama’i pepe” lea e fai ma fili o nisi o le aufai fa’atoaga, na taua e Kant e fa’apea, e fiafia tele le iniseti lea e tau tuufua i taimi o mugala, ma fesoasoani i le fa’aleagaina o lau o laau toto e aofia ai le taro ma le kapisi.

“O le manu o le avi’ivi’i lea e tupuga mai i le afato, e mafua mai i ogalaau pala i aso mugala, o le isi lea fili o fa’atoaga i aso nei, latou te fa’atamaia aano o laau toto e pei o ta’amu, toe fiafia fo’i e fa’aleaga lau niu,” o le saunoaga lea a le ali’i faiaoga.

I le silia ai i le to’a 80% o tagata Samoa e fa’alagolago lo latou tamaoaiga i fa’atoaga, na taua ai e Kant e fa’apea, a oo i vaitau e fa’aletonu ma fesuisuia’i ai le tau i le atunu’u, ona a’afia fo’i lea o le tamaoaiga o i latou nei.

O afa e oso fa’afulifao ma faatamaia ai fa’atoaga, o tafega e tafe tele ma tafea ai le palapala i le sami, o nisi nei elemeni e fesoasoani fa’atasi i le faaleagaina o fa’atoaga.

“O le fautuaga, ia fa’atiitia le ta tatipiina i lalo o laau o loo tutu i luga o au vai, o i latou ia e fesoasoani i le taofiofiina o le palapala mai le tafea atu i le sami, ia toaga e fa’amama fa’atoaga ma le tele ai o manu fa’alafua e nonofo ai,” o le isi lea fautuaga a le ali’i faiaoga.

I le fa’aiuga o le saunoaga a Kant, sa ia taua ai e fa’apea, e taua le malamalama o le fai faatoaga i fesuisuiaiga o le tau, ina ia fuafua ai fo’i ituaiga fa’atoaga na te totoina.