I se tusi na tusia e le susuga Ulugaono Waldie Allen lea na avea ma sui faatonusili o le Ofisa o Tagata Faigaluega a le malo (DHR), ma ua faaooina atu i le kovana sili, o lo o ia ta’ua ai e faapea, o le pasiaina o le sii i le totogi a le alii taitai leoleo o Cmdr Vaaomala Sunia, mai i le $38,000 i le $48,000, sa tuuina sa’o mai ia Evelyn Langord lea na avea ma faatonusili o le DHR, i lalo o se talosaga mai i le tofa Tuaolo Manaia Fruean, lea na avea ma Komesina o leoleo i le faigamalo ua tuana’i atu.

Ma o lea siitaga foi, na pasia e le kovana sa i ai i na tausaga, le afioga Togiola Tulafono ma Malemo Tausaga a’o avea o ia ma faatonusili o le ofisa o tupe a le malo.

Na taua e Ulugaono i lana tusi ia Lolo Matalasi Moliga e faapea, “o lou tuuaia o a’u i le taliaina o siitaga o totogi e aunoa ma le tuuina i pepa mo faamaumauga atoa ai ma le faia o auala faaalatua, o ni faamatalaga ua matua sese lava ma ua ta’uleagaina ai a’u o se tagata faigaluega a le malo o Amerika Samoa, atoa ai ma la’u tautua mo le malo i le 39 tausaga ma le 9 masina e oo mai i le taimi nei.”

O le talosaga e sii ai le totogi o le tagata faigaluega o lo o fesiligia e pei ona faamanino e Ulugaono ia Lolo, sa faavae lea i le umi o lana tautua aemaise ai o ona agavaa i totonu o le galuega, ma ua iai uma nei tulaga i totonu o faamaumauga a le malo ona faatoa ia sainia lea mo le taliaina.

“Sa sainia e le kovana ma le faatonusili o le Paketi pepa uma ma faamaumauga sa faia mo lenei gaioiga, ma ou te talitonu fo’i sa aloaia le auala na uia e le kovana ma le ofisa o le paketi,” o se vaega lea o le tusi a Ulugaono.

Na faailoa e Ulugaono ia Lolo e faapea, afai e fia talitonu i lana faamatalaga, e tele le avanoa e mafai ai ona ia iloiloina faila o lo o i ai faamaumauga a Sunia e faatatau i lenei mataupu.

“Ou te le o taumafai e faaufiufi sa’u gaioiga sa faia pe sa ou faia foi se mea sese i totonu o le malo aemaise ai o le silafaga a lo tatou Alii,” o le tala lea a Ulugaono ia Lolo.

O se tasi o gaioiga na faia e le faigamalo a Lolo ma Lemanu ina ua faatoa tofia i laua e fai ma taitai o le malo i le masina o Ianuari 2013, o le toe faafoi lea i tua o totogi o tagata faigaluega uma a le malo mai matagaluega eseese sa faia a latou siitaga i le faaiuga o le tausaga e 2012, e aunoa ma le uia o auala talafeagai.

Ma o lea suiga na aofia ai ma le alii taitai leoleo ia Sunia, lea e pei ona taua e UIugaono i lana tusi ia Lolo, e ui e le’i faalauiloaina i le ulua’i taimi na faatoa tulai mai ai lenei mataupu lona suafa atoa ai ma i latou sa aafia i lea faiga.

O le vaiaso na tea nei na faalauiloa ai e le alii kovana lona faia o se faatonuga i faatonusili o ofisa ma matagaluega e lima a le malo, ina ia saili auala e aveese mai ai i latou o lo o umia tofi sui faatonusili mai a latou matagaluega, ae saili atu i ai ni isi fou, ona o sui faatonusili o lo o i ai sa fesoasoani i le faia o gaioiga faaalatua e ala i le faia o siitaga o totogi o tagata faigaluega a le malo, e aunoa ma le uia o ala talafeagai.

O ni isi o Ofisa na taua e Lolo i lana saunoaga e aofia ai le Matagaluega o Tagata Faigaluega a le malo, Soifua Maloloina ma le Ofisa Piupuia Vaomatua ma le Gataifale.

O lea mataupu na faamanino e le alii kovana ina ua fesiligia e le Samoa News le mafuaaga ua toe tofia ai le faletua ia Eseneiaso Liu e avea ma sui faatonusili o le matagaluega o tagata faigaluega a le malo faatasi ai ma lona totogi e $60,000, ae o lea o lo o i ai le afioga ia Ulugaono i le tofiga o le sui faatonusili.

Saunoa Lolo e faapea, “Sa ou fautuaina Faatonusili o Matagaluega a le malo o lo o aafia i tulaga nei, ina ia saili auala e mafai ai ona aveese mai i latou nei mai tofiga o lo o latou tauaveina, ina ia aua ai ne’i o latou toe maua le malosi e toe faaauau ai mea pi’opi’o ma faiga fa’aalatua sa latou faia i le nofoaiga ua mavae atu.”

Na faailoa e Ulugaono ia Lolo e faapea, sa ia faatinoina ona tiute i le faamaoni ma lona malosi sa i ai, ae le pei o le sui faatonusili o le matagaluega o tagata faigaluega a le malo lea ua ia tofia, e le gata e faalua ona faamavae mai le tofiga o le Pule o Tagata faigaluega i le matagaluega, ae na toe faafaigaluega e ni isi o kovana ua mavae atu.

“E le gata na toe filifilia i le tausaga mulimuli o le nofoaiga a kovana Lutali ina ua maea ona faamavae, ae sa toe filifilia foi e toe galue i le tausaga mulimuli o le nofoaiga a Togiola, ma e tatau ona e fesili ane pe aisea,” o le isi lea vaega o le tusi a Ulugaono i le kovana.

“E faigata tele ia te a’u ona talitonu ina ua e alu faia sa outou fonotaga ma le Samoa News ma e taumafai e pupuni le faaiuga ua toe filifilia ai lau sui faatonusili fou, ma lona totogi e $60,000 ae lei pasia i le paketi o le tausaga tupe 2013 na pasia e le fono ma saini e le kovana,” o Ulugaono lea.

Sa ia taua foi e faapea, ina ua avanoa le tofiga lenei o le sui faatonusili i ni tausaga ua mavae, sa latou tusi talosaga uma i ai ma Liu faapea ai ma ni isi o tagata faigaluega, peitai ina ua maea le faatalatalanoaga sa faia, sa filifilia mai ai o ia e avea ma sui faatonusili.

Na faaiu le tusi a Ulugaono i lona faapea atu ia Lolo e faapea, e le faapea ua le faaaloalo ia te ia o le kovana, ae i lona talitonuga, sa tatau lava ona ia sailiili i le isi itu o lenei mataupu.