Ads by Google Ads by Google

Teena Senate le pili a le Kovana lea na pasia e Faipule

Na teena e le Senate i le faitauga lona lua i le taeao ananafi, le pili a le maota o sui lea na pasia i le vaiaso nei, e sii ai lafoga i oloa ma laisene pisinisi, ina ia mafai ai ona maua se tupe e faatupe ai le polokalame e auina atu ai gasegase i fafo a le falemai o le LBJ mo togafitiga.

E pei ona silafia, o le pili tupe lea na pasia e le maota o sui, na faaulu e le kovana i lana fono faapitoa, e faasoasoa atu ai le aofaiga e 10 miliona mai le tupe e maua i lafoga o oloa ma laisene pisinisi, e faatupe ai le polokalame lea e auina atu ai gasegase a le falemai o le LBJ i fafo mo togafitiga.

Na sui uma e le maota o sui totogi mo laisene o pisinisi ma le pasene o le lafoga e faaopoopo i le ava malosi ma le pia, lea e maua ai na o le $2.3 miliona mo le falema’i.

E to’afa Senatoa na lagolagoina le pili a le maota o sui, ae toa 9 na palota ina ia teena. O afioga i Senatoa na paloga ioe e aofia ai Alo Dr. Paul Stevenson, Paogofie Fiaigoa, Lualemaga E. Faoa ma Fuamatu J.V Fuamatu, o Senatoa na palota leai e aofia ai Asuega Faamamata Lauvai, Mauga Tasi Asuega, Velega Savali Jr, Levu T. Solaita, Lemanu Peleti Mauga, Avegalio Aigamaua, Tiumalu Scanlan, Malepeai Setu ma Fuata Dr. I’atala.

O lea faaiuga a le Senate na tulai ai le afioga i le taitaifono o le komiti o le falemai a le maota o sui ia Puleleiite Tufele Li’amatua Jr ma faaleo lona agaga faanoanoa, ona o le tofa ua sasa’a e le maota o tupu ma tamalii o le atunuu e teena ai le pili a faipule, a’o lea o loo nonofo tapua’i le atunuu mo se tali a le Fono i le faafitauli o loo tulai mai i le falema’i.

“Sa tapua’i lava le maota a’o alo le Senate i lana sailiga tofa, peitai o le faaiuga lea ua latou faia i le taeao nei (taeao ananafi), ua manino mai ai, atonu o tulaga tonu ia e taua o faigamalo faatemokarasi, e ui foi e le’i manatu mama le maota o sui i le mataupu lenei, ae o lea ua faaali le tofa a le maota o tama ma tina o le atunuu, o le a tatou alu ai fo’i faapea,” o le saunoaga lea a Puleleiite ina ua maea ona tauaao e le maota o sui le faaaliga a le Senate, ua latou teena le pili a le maota o sui.

A’o le’i faia le palota e teena ai e le Senate le pili a le maota o sui, na faia se iloiloga i le taeao ananafi e saili ai le tofa a afioga i Senatoa e uiga i lenei mataupu.

Na manino i le iloiloga lea le lagolagoina lea e afioga i alii Senatoa ia Paogofie, Fuamatu ma Lualemaga o le pili a le maota o sui.

Saunoa Paogofie e faapea, ina ua tuuina mai e le kovana lana pili e 10 miliona i luma o le maota, sa faalogo ai i nisi o manatu fai mai, ua fai si mamafa o le pili, peitai o lea ua sui e le maota o sui ma ua talitonu ai lona  sui, ua maua se faamama avega mo le atunuu.

Sa ia faamanatu foi i afioga i Senatoa e faapea, afai e tausisi le maota i le upu o le alofa, e tatau foi ona faatino le alofa, e ala i le pasia o le pili e auina atu ai gasegase i fafo mo togafitiga, oi latou tonu ia o loo manaomia le fesoasoani.

“Ou te alofa i tagata o loo fia maua se fesoasoani e ala i togafitiga i fafo, o le ala foi lena ou te lagolagoina ai le pili, e tatau foi ona tatou faatino le upu o le alofa e pei ona tatou tautatala ai i le tele o taimi,” o le saunoaga lea a Paogofie.

Na lagolagoina e Fuamatu ma Lualemaga le finagalo o Paogofie ina ia tuu atu le pili i luma o le maota e pasia.

I le saunoaga a le tofa Velega sa ia taua ai e faapea, na te le toe lagolagoina lava se pili e toe faaee ai nisi lafoga i le atunuu, ae o lona manatu, saili muamua se fesoasoani e ala i tupe a le malo o loo i ai i le taimi nei, afai loa e uma tupe ia ae le maua lava se fesoasoani mo le falema’i, ona talanoa loa lea o le fono i se auala e maua mai ai se fesoasoani mai tagata lautele.

Saunoa Velega, e tele isi tupe e le o maninoi le taimi nei i le maota, aemaise ai foi e i ai le isi pili tupe e $2 miliona na pasia e le Senate mo le falemai, lea lava o loo taoto i le maota o sui.

O isi saunoaga mai isi sui o le maota na manino ai lo latou finagalo ina ia aua nei pasia le pili a le maota o sui.

Saunoa le alii peresetene o le Senate ia Gaoteote Palaie Tofau e fapaea, na aumai le pili a le kovana e 10 miliona, peitai o lea ua fa’i fa’i e faipule toetoe lava a le atoa se miliona, ma o lona talitonuga, e sili ai pe a ave le $2 miliona lea na pasia e le Senate ae o loo taoto i le maota o sui, e fesoasoani ai i le gasegase o le falemai.