Ads by Google Ads by Google

Teena Lolo faamatalaga fai mai e fa’asalalau avanoa Loia Sili

Na teena e le afioga i le kovana sili ia Lolo Matalagi Moliga fa’amatalaga o lo o salalau solo e faapea, o le a ia faasalalauina le avanoa Loia Sili mo se tasi e agavaa, pe afai e tula’i ese le afioga i le Aloalii ia Afoa L. Su’esu’e mai le nofoa e pei ona taua i ni ripoti i le masina o Setema na te’a nei.

 

O lea mataupu na fesiligia ai e le Samoa News le afioga i le kovana sili i le vaiaso na te’a nei, i le mae’a ai lea ona maua e le Samoa News o le tele o telefoni mai nisi o le atunuu, lea sa latou fesiligia pe moni o lo o fuafua le kovana e faasalalau le avanoa o le Loia Sili a le malo.

 

Na taua e Lolo i le Samoa News, na te le faasalalauina le avanoa o le Loia Sili, ona o lo o i ai nisi o lo o i lona manatu e talafeagai mo le galuega.

 

O le masina o Setema na te’a nei na talia aloaia ai e le afioga i le Aloalii le valaau mai lona itunalo, tauala mai i le afioga i le Tapunu ia Tiumalu Telesia Scanlan, na te faaauauina ai le tofi senatoa na amata mai e le afioga i le Tapunuu ia Faagata Mano Faagata ua tuumalo.

 

Ina ua fesiligia Afoa e le Samoa News i le taimi lea, sa ia faamaonia mai ai lona taliaina o le faaaloalo na lafo atu ia te ia e le afioga Tiumalu, ma ua ia sauni e nofoia le nofoa o le itumalo o le Maoputasi, mo afioaga o Fagatogo, Fagaalu ma Utulei.

 

O le afioga ia Afoa, lea fo’i sa avea o se tasi o sui tauva mo le palota o le Kovana ma le Lutena Kovana na mae’a atu nei, na tofia e le alii kovana ia Lolo na te tauaveina le tofiga o le Loia Sili, o ia fo’i le ulua’i tofiga a le alii kovana na faalauiloa i le aso na faatauto ai le kovana ma le lutena kovana mo le taitaiina o le malo.

 

I se faatalatalanoaga ma le alii kovana ia Lolo, sa ia taua ai i le Samoa News e faapea, o lo o la vaavaai toto’a pea lava ma le afioga i le Lutena Kovana ia Lemanu Peleti Mauga, mo le sailia o se tagata e talafeagai ma le tofiga.

 

E ui e le’i taua e Lolo suafa o i latou o lo o ia mafaufau i ai mo le tofi, peitai sa ia taua, o i latou nei o lo o i ai le agavaa mo le tauaveina o le galuega.

 

Na taua e le Faufautua a le alii kovana ia Iulogologo Pereira e faapea, o le sailia o se tasi e sui tulaga ia Afoa mo le tofi, o se tasi lea o mataupu o lo o laualuga i le finagalo o le kovana ma le lutena kovana.

 

Ua le gata i lea, o le tofiga o le loia sili, e ese mai ai lava i isi tofiga uma o le kapeneta a le kovana, e le gata e tatau ona i ai se tagata na te ausia uma vaega o lo o moomia mo le galuega, ae o se tagata foi e tatau ona tuu atu uma i ai le faatuatuaga a le kovana ma le lutena kovana.

 

O le Tauaofiaga lona Tolu o le Nofoaiga lona 33 a le Fono Faitulafono, lea ua faamoemoe e usuia i le aso Gafua lona lua o le masina o Ianuari, 2014, o le a amata tauaveina ai e Afoa le tofiga a lona itumalo.

 

faaliliu Ausage Fausi