Na teena e le afioga i le fa’amasino sili ia Michael Kruse i le aso Tofi na te’a nei se talosaga na fa’aulu e le loia a le malo o Mitzie Jessop, mo se poloaiga a le fa’amasinoga e tu’u fa’atasi ai mataupu a Hanipale Malae, o lona to’alua ia Asenati Malae faapea ai ma isi tama’ita’i o lo o tu’uaia fa’atasi i latou o Fa’aso’oso’o Sosaiete e fai fa’atasi a latou fa’amasinoga autu.

O le tama’ita’i loia ia Tiffany Oldfield na fai ma sui o le itu a le malo i le taimi na iloiloina ai lenei talosaga i luma o le fa’amasino sili, ona o lo o malaga i fafo ma le atunuu le tama’ita’i loia ia Mitzie o lo o tula’i mo le malo i le mataupu lenei.

Na taua e Oldfield i luma o le fa’amasinoga e fa’apea, o lo o talosaga le malo ina ia tu’u fa’atasi le mataupu a Hanipale, Asenati ma Fa’aso’oso’o, ona e tasi lava le mataupu na alia’e mai ai tu’uaiga fa’asaga ia te i latou.

Ae na taua e Kruse e fa’apea, o se tasi o fa’afitauli o lo o nofo ma ia i le mataupu lenei, ua umi tele o nofonofo le malo e aunoa ma lo latou failaina o lenei talosaga i luma o le fa’amasinoga.

Sa ia taua fo’i e fa’apea, o se tasi o itu o lo o ia maitauina, e fa’atoa fetagofi lava loia a le malo i a latou faila mo mataupu o le a iloiloina, i le taimi mulimuli ae ua oo i le aso e fa’atulaga ai le fa’amasinoga autu o lea mataupu.

Na taua e Oldfield i lana faafinauga e lagolago ai le mau a le malo ina ia tu’u fa’atasi mataupu a Hanipale, Asenati ma Fa’aso’oso’o, o le mataupu o lo o tu’uaia ai i latou nei e to’atolu, o lo o i ai mau e lagolagoina ai sa latou galulue fa’atasi e fai taumafaiga ina ia fa’aleaga ai mea molimau a le malo.

Na finau Oldfield e fa’apea, o se tasi o tama’ita’i e to’atolu i ai tama’ita’i na a’afia i le ulua’i mataupu o lo o tu’uaia ai Hanipale, ua molia fa’atasi ma Hanipale ma lona to’alua i le mataupu fou lenei, ma o ia lea o Fa’aso’oso’o.

Fai mai le itu a le malo, e le gata sa fa’afesootai e Hanipale ia Fa’aso’oso’o i se telefoni feavea’i a’o taofia ai o ia i totonu o le toese i Tafuna, ae sa ia fa’afeso’ota’iina fo’i lona to’alua o Asenati, ma galulue ai loa Asenati ma Fa’aso’oso’o e fa’atino gaioiga e pei ona tu’uaia ai i laua i le mataupu lenei.

O le tama’ita’i loia ia Sharron Racourt o lo o tula’i mo Hanipale, ae o loia mai le Ofisa o Loia Fautua a le malo ia Douglas Fiaui o lo o tula’i mo Fa’aso’oso’o ma Joel Shiver o lo o tula’i mo Asenati.

Na muta fa’afuase’i le folasaga a Oldfield ina ua fesili i ai Kruse po o fea le tama’ita’i loia o Jessop sa ia failaina le talosaga lea i luma o le fa’amasinoga, na tali Oldfield, “o lo o malaga i fafo ma le atunuu.”

Saunoa Kruse, pe fa’apefea ona tupu lenei mea o le faila e Jessop o le talosaga i luma o le fa’amasinuoga, ona malaga lea ae le nofo i le iloiloina o le mataupu, ae na toe tali Oldfield, o lo o malaga i tulaga fa’a pisinisi.

Na toe vave saunoa atu Kruse ma fa’apea, “e o o lava fo’i ia te a’u ua toe tolopo uma a’u malaga tau i pisinisi ona o le fa’amasinoga.”

O le taimi lea na fesilia loa Kruse i loia e toatolu o lo o fautuaina i latou ua molia pe latou te tete’e i le talosaga a le malo e fai fa’atasi le fa’amasinoga a i latou nei, ae na tali loia latou te le tete’e.

Na toe saunoa Kruse e fa’apea, o le isi ana fa’afitauli i le mataupu lenei, e na o le tasi le potu fa’amasino e faataunuu ai fa’amasinoga autu, ae ua silia i le 200 le aofa’i o faila o mataupu tau solitulafono mamafa e tatau ona fa’amasinoina, e le mafai fo’i ona iloiloina mataupu uma nei i totonu o le tausaga e tasi, a’o lea ua malaga i fafo Jessop ina ua mae’a ona ia faila le talosaga.