Ua i luma o le Fono Faitulafono se tusi mai le afioga i le kovana sili ia Togiola Tulafono, e faailoa ai lona teena o le pili a le Senate 32-20 na pasia e le Fono i le tauaofiaga na mae’a atu nei, lea e taua ai le tulaga lea, afai e sili atu ma le 90 aso talu ona maea le taimi e galue ai se totino o le Komiti Faafoe a le ASPA, ae le’i toe tuuina atu i luma o le Fono e toe pasia mai, o le a le toe aloaia ona galue lea sui i totonu o le komiti.

I lana tusi i le Peresetene o le Senate ma le Fofoga Fetalai o le Maota o Sui, o loo taua ai e Togiola e faapea, o le pili lea ua ia teenaina nei, e tutusa lelei lava ma le pili 31-45 lea foi na ia teena i le tausaga e 2010, ina ua finagalo foi le Fono e toe faia se teuteuga i le auala e tofia ai totino o le Komiti Faafoe a le ASPA.

Saunoa Togiola, e tutusa lelei lava mafuaaga ua ala ai ona ia teena pili ia e lua, e ui o le pili muamua o loo taua ai le 60 aso, ae o le pili fou lea ua ia teena nei o loo taua ai le 90 aso.

Na taua e le alii kovana e faapea, o le 90 aso lea o loo taua i le tulafono e tatau ona toe tuuina atu ai le igoa o se totino mo lona faamaoniaina, e le o talafeagai ma aso fono a le Fono Faitulafono, aua e fa ma le afa masina e va ai le isi tauaofiaga mai le isi tauaofiaga, o lona uiga ua le talafeagai la le taimi lea ua tuuina mai i le tulafono ma le va o tauaofiaga ia e lua.

O le isi foi tulaga e pei ona taua e le alii kovana i lana tusi, o le tulafono o loo i ai nei, e  mana’omia ai le fono faa fa o le komiti faafoe a le ASPA i le tausaga, peitai o le pili lea ua pasia mai e le fono e le o aiaia mai ai tulaga taua ia e pei ona taua i le tulafono o loo i ai nei.

Fai mai foi le tulafono lea ua pasia e le fono, o totino ua maea taimi e tautua ai ae le’i toe tuuina atu o latou igoa e faamaonia mai e le fono, e le toe mafai ona toe galulue i le komiti faafoe i le tuanai ai o aso e 90 aso mai le taimi na mae’a ai la latou tautua, ma o se tasi lea o popolega i le tulafono lea e pei ona saunoa Togiola.

“Afai ae sainia le tulafono lea 32-20 ma aloaia loa i le aso, o lona uiga o le a le atoa le kalama e mafai ai e le komiti faafoe ona faatino ana galuega, o le a le toe mafai foi ona toe galulue totino ua maea taimi na faatulaga e galulue ai, o lona uiga o le a tulaga faaletonu le komiti faafoe a le ASPA mai le faatinoina o ona tiute,” o se vaega lea o le tusi a le alii kovana.

Ae ui ua teena e le alii kovana le pili na pasia e le Fono, ua ia talosagaina i latou i se avanoa latou te galulue faatasi ai, i le tau sailiina lea o se auala e foia ai lenei faafitauli.

I le tino o le tulafono na pasia e le fono o loo taua ai e faapea, o le fausia faaletulafono o komiti ma komisi, e taua tele lea mo le pulea lelei o ni vaega o tautua a le malo, lea foi e aofia ai ma le vaega a le ASPA.

E taua tele matafaioi o loo gafa ma le ASPA mo le manuia o le atunuu, ma ua alaga tatau ai ona toe tofia nisi sui fou, poo le toe tuuina atu foi lea o suafa o sui ua maea taimi na tautua ai i totonu o le komiti faafoe, pe a tuana’i aso e 90 talu ona mae’a le aoga o lea tautua.

O le agaga o le Senate na mafua ai ona faaulu lenei suiga i le tulafono, ina ia mautinoa ai o faaiuga uma o loo faia e le komiti faafoe a le ASPA, o loo faavae mai lea i luga o faaiuga maumaututu ina ia tusa ai ma ala o le tulafono.

O le tele o taimi e faia ai iloiloga a le ASPA ma le Fono, e fesiligia ai lava le malosi o faaiuga o loo faia e le komiti faafoe a le ASPA, ona e talitonu le Fono, o nisi o totino o le komiti faafoe o loo faia faaiuga ua leva ona maea aso e tatau ai ona avea ma totino o le komiti faafoe.

O lenei tulafono na faaulufaleina lea e le afioga i le alii Senatoa ia Velega Savali Jr, o ia foi lea o le taitaifono o le komiti a le ASPA/TEO a le Senate, o Galea’i M. Tuufuli, Alo Dr. Paul Stevenson, Lualemaga E. Faoa ma Lemanu Peleti Mauga.