Teena Feterale talosaga apili Paul Solofa

O le vaiaso na te’a nei na tuuina mai ai le poloaiga a le Fa’amasinoga Apili a le feterale i Uosigitone, ina ia fa’atumau ma aloaia pea le fa’asalaga fa’a falepuipui fa’asaga ia Paul Solofa, i le mae’a ai lea ona te’ena e le fa’amasinoga o le talosaga apili sa fa’aulu e le ua molia.

 

O le susuga a Solofa lea sa galue i le Matagaluega o Aoga a le malo o Amerika, o lo o tuli nei sona fa’asalaga fa’a falepuipui i le toese a le feterale i Honolulu mo le umi e 35 masina.

 

O le amataga o le tausaga e 2012 na ta’usala ai e se vaega iloilo iuga i luma o le fa’amasinoga feterale i le laumua i Uosigitone le susuga Solofa, i moliaga o le fa’aleagaina lea o mea molimau a le malo, atoa ai ma le fa’alavelave gaioiga a le fa’amasinoga.

 

I le amataga o le tausaga na te’a nei, na tuuina mai ai loa le faasalaga a le faamasinoga feterale, ina ia taofia i le falepuipui Solofa.

 

Na taua e le itu tete’e i le taimi o le fa’afinauina o lenei mataupu apili e faapea, e le gata sa le i maua e Solofa i le taimi o lana faamasinoga le fesoasoani talafeagai mai lana loia, e finau ai i auala e puipuia ai ona ‘aia i le taimi o le fa’amasinoga, ae sa i ai fo’i se sasi i le faaiuga a le faamasinoga sa tuuina mai, ona ua fai si tele o nei masina ua tuuina atu e taofia ai Solofa i le toese.

 

Ae na taua e le itu a le malo i le latou faafinauga e faapea, e leai se sasi i le faaiuga a le faamasinoga ua maea ona tuuina atu ia Solofa, i le taimi fo’i o le fa’amasinoga, sa lelei le auala na finauina ai e lana loia mataupu mo le puipuia o ona ‘aia tatau.

 

O faafinauga o le talosaga apili a Solofa i luma o le faamasinoga, sa tolaulauina i se iloiloga sa faia i le masina o Tesema 2013, i luma o fa’amasino e to’atolu e aofia ai Judge David B. Sentelle, Thomas B. Griffith ma Sri Srinivasan.

 

I le mae’a ai ona iloilo e ali’i fa’amasino nei o vaega uma o talosaga mo lenei mataupu apili, na tuuina mai ai loa la latou faaiuga i le vaiaso na te’a nei, ma latou taua ai lo latou faatumauina o le faaiuga ua maea ona tuuina atu e le faamasinoga mo Solofa.

 

O le mataupu lenei na faatoa alia’e mai i totonu o le matagaluega o aoga a le malo i ni tausaga ua tuana’i atu, ina ua tuuaia Solofa, o ia sa autu i ai le mataupu e faatatau i le faatauina mai o totoga o pasi aoga a le matagaluega o aoga.

 

faaliliu Ausage Fausia

Comment Here