E le i pasia e le maota o sui i le taeao ananafi tofiga a le kovana mo Magalei Logovi’i ma Aleki Sene Sr, e avea ma totino o le Komiti Fa’afoe o le Litaea a le malo, se’i vagana ai isi sui e to’afa sa latou pasia.

E 5 palota ioe ae 14 palota leai na teena ai e le maota o sui ia Magalei, ae o Sene e 10-9 le palota na teena ai fo’i o ia.

O sui na pasia e le maota o sui e aofia ai Sonny Thompson ma Beaver Ho Ching e ta’i 16-3 a la palota, o Maaelopa Bob Tuiasosopo e 19-0 lana palota, ma Dr. Falema’o Phil Pili i le 18-1. (Sa teena e le Senate tofiga o Pili).

Mai sui fou e to’aono o le komiti faafoe a le Litaea a le malo na tofia e le kovana i lana Fono Faapitoa lea na tapunia aloaia i le taeao ananafi, e na o le to’atolu ua aloaia le avea ma totino o le Komiti Faafoe ina ua pasia uma e le Fono, o i latou ia e aofia ai Thompson, Tuiasosopo ma Ho Ching, ae o le to’atolu ua le pasia e aofia ai Pili, Magalei ma Sene Sr.

O le vaiaso na tea nei na iloilo e le komiti o le litaea a le maota o sui sui e toalima o le komiti faafoe na tofia e le kovana, ae o ananafi na faatoa latou fesiligia ai le susuga a Ho Ching, ina ua mae’a fo’i se iloiloga a le komiti o le litaea a le Senate na ulua’i fesiligia ai agava’a o le susuga Ho Ching e tusa ai o tofiga a le alii kovana.

ILOILOGA A LE SENATE

E le i atoa se 20 minute o le iloiloga a le komiti o le litaea a le senate e fesiligia ai agavaa o le susuga a Ho Ching. Ina ua fesiligia e le afioga i le alii senatoa ia Faumuina Tagisiaaii le molimau poo lava lona malosi e tautua ai i le komiti a le Litaea, na saunoa Ho Ching, o lo o lava lona malosi,  ma ua leva foi ona ia fia maua se avanoa e tautua ai mo le malo

Na faailoa e Faumuina i le molimau e faapea, pau le agaga o afioga i senatoa, ia i ai se tagata e lava sona iloa i tulaga tau pisinisi e galue i le komiti a le litaea, ina ia fesoasoan ai i auala e faaleleia ai lea teugatupe aoga o le atunuu.

Na faafetaia e afioga i senetoa ia Laolagi F.S. Vaeao ma Mauga T. Asuega, le susuga a Ho Ching i lona taliaina o tofiga a le kovana.

Na vivii e le afioga i le alii senatoa ia Alo Faauuga le molimau, i le lelei o lana tautua ua mafua ai ona manuia le kamupani a le CBT o lo o tautua mo le atunuu.

Saunoa Ho Ching, o le 44 lenei o tausaga talu ona auauna le CBT i le atunuu, ma o le 1/3 o meatotino a le pisinisi o lo o ia umia, ae o le isi 2/3 o mea totino o loo umia e isi ona uso e toalua o lo o latou galulue faatasi i le puleaina o le pisinisi.

I le faaiuga o le iloiloga, sa faafetaia ai e le afioga ia Avegalio Aigamaua o le taitai komiti le susuga a Ho Ching e tusa ai o le iloiloga i le taeao ananafi, faatasi ai ma le tuuina atu o faamanuiaga a le maota i le molimau, ina ia manuia lona tulai mai i le faatinoina o ona tiute i le komiti a le litaea.

ILOILOG A LE MAOTA O SUI

E le i atoa se 10 minute o le iloiloga a le komiti o le litaea a le maota o sui i le taeao ananafi ae mae’a, ina au aloaia e afioga i faipule le mau ina ia faaagafua le molimau, ae alo le maota i sana faaiuga e tusa ai o tofiga a le alii kovana mo Ho Ching.

E leai se faipule na fai sana fesili i le molimau, sei vagana ai faamanuiaga atoa ai ma lo latou faafetaia o le molimau i lona taliaina o tofiga a le kovana.

Pau le fesili na tuuina atu e le sui fofoga fetalai ia Talia Faafetai Iaulualo i le molimau pe le faalavelave ona tiute i le Ekalesia i tofiga a le kovana ua tuuina atu mo ia, ae na tali le molimau, ana ia iloa e le avanoa, semanu na te faailoaina i le kovana le tulaga lena, peitai ua ia sauni e ofo atu lona malosi o lo o totoe e tautua ai mo le malo i le vaega a le litaea.