Ua teena e le Fa’amasinoga Maualuga le talosaga na faaulu e le loia a le malo o Amerika Samoa, ina ia teena le tagi ua faila e le Komiti Faafoe a le Vaega o le Litaea faasaga i le kovana sili, le tofa Lolo Matalasi Moliga, ona o le faaiuga ua ia faia e tofia ai le Komiti Faafoe fou latou te vaavaaia tupe a le litaea.

Na taua e le loia a le malo o lo o tula’i mo le alii kovana ia Michael Iosua i lana faafinauga i le vaiaso na te’a nei e faapea, faatoa aloaia tofiga a le kovana mo le Komiti Faafoe fou pe afai ae faamaonia e le Fono Faitulafono.

E tasi le itulau o le faaiuga a le faamasinoga na tuuina mai faasaga i lenei mataupu, lea na saini e le afioga i le faamasino sili ia Michael Kruse, atoa ai ma ali’i faamasino lagolago ia Fa’amausili Pomele ma Muasau T. Tofili

Na taua ai e le fa’amasinoga i lana faaiuga e faapea, i le mae’a ai ona o latou iloiloina o le faafinauga a le malo e faatatau i tofiga a le kovana mo sui o le Komiti Faafoe fou a le Litaea, lea faatoa mafai ona aloaia ma latou tauaveina le galuega pe afai ae faamaonia e le Fono, ona manatu ai lea o le faamasinoga, o le talosaga a le itu tagi mo se faaiuga le tumau a le faamasinoga e taofia ai le tauaveina e le Komiti Faafoe fou o le galuega, e laititi lava sona taua faasaga i lenei mataupu i le taimi nei.

Ma, talu ai ona o lea faaiuga, ua manatu ai le faamasinoga ina ia faatulaga se iloiloga e iloiloina ai mau faamaonia o lo o faamanino mai e le tulafono.

“O le talosaga la a le malo ina ia teena le tagi a le itu tagi ua teena e le faamasinoga mo le taimi nei,” o le faaiuga lea a le faamasinoga.

O le mataupu lenei na tofu atu i le faamasinoga ina ua faila e totino e toafa o le Komiti Faafoe tuai a le litaea o lo o i ai i le taimi nei sa latou tagi faasaga i le kovana sili, i lona le tausisia lea o aiaiga o le tulafono mo le tofiaina o totino mo le Komiti Faafoe a le litaea.

O sui e toafa o le komiti faafoe tuai a le litaea o lo o saini i le tagi ua i luma o le faamasinoga e aofia ai le ta’ita’ifono ia Aleki Sene Sr; Faoa Aitofele Sunia; Fanene Morris Scanlan ma le afioga i le alii Senatoa ia Magalei Logovi’i. O le sui e toatasi o le komiti faafoe e le o auai i le tagi faasaga ia Lolo, o Brandt ‘BJ’ Judy lea ua toe tofia e le kovana i totonu o le komiti faafoe lea ua tuuina atu i le Fono mo le faamaoniaina.

Na taua e Iosua i le faamasinoga i lana faafinauga i le iloiloga sa faia i le aso Lua o le vaiaso na te’a nei e faapea, o le tiute tauave o le alii kovana, o le tofia lea o le komiti faafoe fou e pei ona ia faia i le komiti a le Litaea.

Fai mai Iosua, sa uia e le alii kovana ta’iala e pei ona taua i le tulafono, e pei o le latou feutana’i lea ma le komiti faafoe tuai a le litaea o lo o i ai mo le filifilia o se komiti faafoe fou, ma sa tuuina atu foi e le komiti tuai a le litaea i le kovana o latou igoa ina ia toe filifilia i le komiti faafoe a le litaea.

Ae ina ua maea ona iloilo toto’a e le kovana suafa o le komiti tuai o lo o i ai, aemaise ai o lea ua silia i le ta’i 30 tausaga le umi talu ona maea o latou taimi e avea ai ma totino o le komiti, sa faia ai loa e le alii kovana lana faaiuga ma tofia ai lana komiti faafoe fou lea ua tuuina atu i luma o le Fono mo le faamaoniaina.

Ae na finau le loia a le litaea ia Marcellus Talaimalo Uiagalelei e faapea, o lo o manino i le tulafono e faapea, e tatau ona nonofo i lalo le kovana ma le komiti tuai a le litaea e talanoa ma soalaupule se komiti faafoe fou e tatau ona i ai, ma e talitonu Uiagalelei, e le’i faatinoina e le alii kovana lea tulaga e pei ona faamanino i le tulafono.

O le aso 19 Iuni 2013 i le itula e 9:00 i le taeao lea ua faatulaga e faia ai le iloiloga faapitoa o lenei mataupu i luma o le faamasinoga.