Ads by Google Ads by Google

Teena Faamasinoga le talosaga a se alii pagota

Ua te’ena e le Fa’amasinoga Maualuga se talosaga a se ali’i pagota, ina ia toe faia se isi ona fa’amasinoga fou, a’o faaauau pea ona tuli lona faasalaga faafalepuipui e lima tausaga, i le toese i Tafuna.

O Michael Agasiva, na ta’usala e le faamasinoga i le aso 15 Setema 2011 i moliaga e lua, e aofia ai le faaoolima i le tulaga lua, ma  le faatupu vevesi i nofoaga faitele.

O le aso 16 o Tesema 2011 na faila ai e Agasiva sana talosaga i le faamasinoga, tauala atu i lana loia fautua o Sharron Rancourt, mo se avanoa e toe iloilo ai e le faamasinoga lana faaiuga, po o le toe faia lea o se isi ona faamasinoga fou.

I le mae’a ai ona iloilo e le faamasinoga o faafinauga a itu a itu e lua ma mau uma e uiga i lenei mataupu, i le aso 6 Ianuari 2012, na tuuina mai ai loa lana faaiuga i le vaiaso na te’a nei, e teena ai le talosaga a le ua molia.

Fai mai le faamasinoga i lana faaiuga,  o nisi o mataupu sa finau mai le ua molia e tatau ai ona toe fai sona faamasinoga fou, ona sa i ai se sese o le faamatalaina faaletulafono e le faamasinoga o le naifi, fai mai, o se aupega mata’utia, aemaise ai foi, sa le fetaui upu na faaaoga e le malo e faaleo mai ai lana faafinauga faai’u e aofia ia mea molimau e le’i tuuina atu i le taimi o le faamasinoga.

Fai mai foi le ua molia, ua fai lava si mamafa o le faasalaga lea na tuuina atu e le faamasinoga ia te ia, aemaise ai foi e le’i iloga na tula’i mai lana loia sa fai ma ona sui i le taimi o lona faamasinoga iloilo, ae maise ai, o nisi o faaletonu i le taimi o lana faamasinoga na mafua ai ona le talafeagai le faataunuuina o lona faamasinoga.

Fai mai le faamasinoga i lana faaiuga, o le naifi sa faaaoga e Agasiva e faaoo ai manu’a i le alii na aafia, e talitonu le faamasinoga o se a’upega mata’utia lea, ina ua ia faaaoga le itu mafolafola o le agaese e sasa ai le tino o se isi tagata e aunoa ma se gaioiga a lea tagata e tete’e atu ai o ia, ma o lea gaioiga na mafua ai ona i ai ni manu’a i le tino o le alii na aafia.

Fai mai le faamasinoga, e le sa’o le faafinauga a le ua molia e faapea, o upu na faaaoga e le malo i lana faafinauga mulimuli, na mafua ai ona mulimulita’i le tofa a le faamasinoga, ma mafua ai loa ona tuuina mai le faaiuga e nofosala ai o ia.

E talitonu le faamasinoga ua lava mau e lagolagoina ai le faaaoga e le ua molia o le agaese e ta ai le alii na aafia e faailoa atu ai i le faamasinoga, o le mea moni lea sa tupu.

Na teena malosi foi e le ua molia tuuaiga o ia na faaaogaina le agaese e faaoo ai manu’a i le alii na aafia, fai mai le ua molia, o le tagata e igoa ia Pakalika Make na faaaogaina le agaese e faaoo ai manu’a i le alii na aafia, ae talu ai e aiga molimau a le malo ia Pakalika, o le mafuaaga lea ua pau ai le mamafa o tuuaiga ia te ia.

Ae fai mai le faamasinoga, e leai ma se molimau a le malo e aiga ia Pakalika, e leai foi se isi o i latou e taumafai e ufiufi pe puipui Pakalika, ae o  a latou molimau na manino mai ai, o le ua molia na faaaogaina le agaese e faaoo ai manu’a i le alii na aafia.

I le maea ai ona iloiloina e le faamasinoga o vaega uma o lenei talosaga, na tuuina mai ai loa lana faaiuga ina ia teena le talosaga a le ua molia.

O le afioga i le alii faamasino sili lagolago ia Lyle L. Richmond ma lana lagolagosua o Mamea Sala Jr na faafoeina le faamasinoga iloilo mo Agasiva, o i laua foi ia na iloiloina le faaiuga o lenei mataupu, ae o le tamaitai loia sili lagolago ia Cecila Reyna sa tulai mo le malo.