Ads by Google Ads by Google

Teena Fa’amasinoga Maualuga talosaga Eliota Siaumau Sr

O le talosaga a Eliota Siaumau Sr ina ia faaavanoa e le faamasinoga lana tupe e $100,000 lea sa totogi e tatala ai o ia i tua, a’o faagasolo le mataupu na tuuaia ai o ia e le malo i le 2009, ua teena e le Faamasinoga Maualuga.

Na taua e le faamasinoga e faapea, ua faamalieina le faamasinoga ina ua maea ona iloiloina mau o lenei mataupu, sa le usitai Siaumau Sr i poloaiga na tatala ai o ia i tua ao faatalitali ai taualumaga o lana faamasinoga.

O le tamaitai loia ia Sharron Rancourt sa tulai mo Siaumau Sr i lenei mataupu, ae o Mitzie Jessop Folau na tulai mo le malo, ae o le alii faamasino sili ia Michael Kruse ma Mamea Sala Jr sa iloiloina le faaiuga o lenei mataupu.

Na taua e le faamasinoga maualuga e faapea, e faa 6 ona tuua e Siaumau Sr le atunuu i le taimi ao i ai o ia i lalo o poloaiga e faasa ai ona ia tuua le teritori, ma o se tasi o ia malaga e aofia ai lana malaga mo Honolulu ia Mati 21, 2011.

Ina ua manino le malo i le mea o lo o tupu, na faila ai loa se talosaga i le aso 29 Mati 2011 e talosagaina ai le faamasinoga ina ia faaleaoga lana poloaiga na tatala ai Siaumau Sr i tua.

Na taua e le loia a Siaumau Sr e faapea, o le mafuaaga na poloaina ai e le faamasinoga le totogi e Siaumau Sr o le tupe, ina ia mautinoa e auai o ia i soo se taimi e valaauina ai lana mataupu, ma o taimi uma lava na valaau ai mataupu a Siaumau Sr sa auai o ia e aunoa ma le misia o se aso

Na taua e le faamasinoga i lana faaiuga e faapea, i le Vaega 46 o Tulafono mo le faaavanoaina o tupe totogi i le faamasinoga, e le na o le le auai i taimi e valaau ai le faamasinoga o lo o aiaia mai ai i le tulafono.

Na taua e alii faamasino e faapea, e talitonu le faamasinoga o le mafuaaga autu o le totogi e se tagata molia o se tupe, ina ia mautinoa e auai o ia i soo se taimi e valaau ai lana mataupu, peitai e le talitonu le faamasinoga, e na o le pau lea o le mafuaaga e ala ai ona le toe maua e le tagata o lo o molia lana tupe sa totogi e tala ai o ia i tua

Na taua foi e faapea, i faamasinoga feterale ma isi foi faamasinoga o lo o aiaia ai le tulaga lea e faapea, e mafua ona le toe maua e le tagata molia lana tupe sa totogi, ina ua ia le usitaia tuutuuga a le faamasinoga e ese mai le le auai i taimi e valaau ai lana mataupu.

O le auai o Siaumau Sr i taimi uma na valaauina ai lana mataupu e le afaina i le faamasinoga e pei ona taua i le faaiuga a alii faamasino.

Na taua e alii faamasino e faapea, i mau faamaonia sa latou maua o lo o taua ai malaga e 6 a Siaumau na ia tuua ai le teritor,i ao tatala o ia i tua e aunoa ma se faatanaga mai le faamasinoga, ma o lea gaioiga ua atagia mai ai lona le manatu e usitaia poloaiga a le faamasinoga na tatala ai o ia i tua.

I le maea ai la ona iloilo e le faamasinoga o faamaumauga uma e uiga i lenei mataupu, na faaiuina ai loa e le faamasinoga e faapea, sa malamalama lelei le ua molia i tuutuuga na tatala ai o ia i tua, atoa ai ma le ono le toe maua lea o lana tupe sa totogi pe afai na te le usitaia se poloaiga a le faamasinoga.

O le masina o Me 2009 na tofu atu ai i luma o le faamasinoga maualuga le mataupu na tuuaia ai e le malo Siaumau Sr, ma tatala ai loa o ia ina ua totogi le $100,000 i lalo o poloaiga e ao ona usita’i i ai, ma o ni isi o ia poloaiga e aofia ai le le mafai lea ona ia tuua le atunuu e aunoa ma se faatonuga a le faamasinoga, auai i soo se taimi e valaauina ai lana mataupu, fesootai vavalalata ma lana loia, aua nei ona toe taumafai e faafesootai molimau a le malo, ma aua foi nei ona toe umia ni aupega mamafa poo ni fana.

Na solofua e le vaega iloilo iuga moliaga uma na tuuaia ai Siaumau Sr i le mataupu lea.

saunia e Ausage Fausia