FAATALIA SE FAAIUGA MAI I LE FAAMASINOGA

I se pepa o faamatalaga na tuuina mai i le Tamaitai Faipule filifilia o le itumalo o Tualauta #15, o Vui Florance Vaili Saulo, e faatatau i le tagi lea ua faila e ni isi o sui sa latou tauva i le palota, i luma o le Faamasinoga Maualuga, o le tagi e leai se fa’avae.

Na taua e Saulo le faateia o ia i tagi ua faaulu e Esther Wall, Lucia Bartley ma la loia.

“Sa tele lava le taimi a’o lumana’i le palota la te fesiligia ai nei fesili faasaga ia te a’u ma lo’u agava’a, atoa ai ma o la manatu e uiga i le palota, ae sa na o le la nonofo lava e leai se tala e fai mai,” o le saunoaga lea a Saulo.

“A lea ua maea le palota, ua faailoa foi leo o tagata, ma ua le faamalieina i laua i leo o tagata ua faaalia, ma la faaulu ai loa lenei talosaga e leai se faavae ma lo la manatu, o le a mafai ona tuu atu ai e le faamasinoga le avanoa la te nofoia ai nofoa o le itumalo,” o le saunoaga lea a Saulo.

Na taua e Saulo e faapea, o le isi itu o lo o faateia ai o ia, mai le toatele o tagata sa tauva, o isi foi tamaitai sa latou tauva faatasi i le tofi o le itumalo lea ua la fesiligia tulaga o le palota.

Sa ia taua e faapea, i le talutalu fou o le soifuaga lenei ua tatou soifua ma ola ai, e tutusa tagata uma i le atinaeina o latou tagata ina ia ausia galuega ma tulaga e pei foi o tina, e manatu ai ni isi o i laua nei o le a avea i laua ma sui e ausia lenei tulaga, peitai o le tagata loto maualalo e faaeaina i le palota.

O le mea ua tupu e pei ona saunoa Saulo, ua taumafai Bartley ma Wall e toso o ia i lalo o le palapala, ma toso faatasi atu ai ma le Komesina o Palotaga faapea ai ma tagata palota.

Na taua e Saulo lona mitamita i lona tupuaga, o ia o se tina Samoa moni, e i ai foi ona aiga i Amerika Samoa nei ma Samoa i Sisifo.

“Ou te le teena le mea moni lenei, o o’u matua e o mai uma i malo tutoatasi o Samoa, ae o la tupuaga ma tuaa o Amerika Samoa.”

“Ou te le teena foi le mea moni sa i ai le taimi o lo’u olaga na ou ola ai i Samoa ma ou aoga ai, peitai o lo o tumau pea ona o matou fesootai ma o’u aiga i Samoa faapea ai ma o’u aiga i Amerika Samoa nei, ou te mimita fo’i e faailoa o a’u o le Nesionale o le Iunaite Setete o Amerika, le atunuu na ou fanau mai ai, o le atunuu foi na soifua mai ai lo’u to’alua ma la’u fanau, lea o lo o matou nonofo ai, ma ofo atu ai lo’u ola e tautua lo’u atunuu,” o le saunoaga lea a Saulo.

Na faaiu le saunoaga a Saulo i lona faailoa atu lea i lona itumalo o Tualauta, e i ai lona talitonuga e sau le taimi e faamanino ai lenei mataupu, o le a le mafai foi ona ia faavaivai e saili le mea moni e uiga i lenei mataupu, ina ia faamama lona igoa atoa ai ma le igoa pele o lona itumalo o Tualaua.

TAGI NA FAAULU I LE FA’AMASINOGA

O le amataga o le vaiaso nei na faila ai i luma o le faamasinoga maualuga tagi mai sui sa tauva i tofi faipule o le Itumalo #15 o Tualauta, faasaga i le Komesina o Palotaga ia Soliai Tuipine Fuimaono, faapea ai ma le isi sui tauva ia Florence Saulo, i le faia lea o faiga tau faasese.

O Larry Sanitoa ma Saulo, o i laua ia na manumalo mo nofoa e lua o le itumalo i le maota o sui o le Fono Faitulafono, ina ua maualuga a la palota sa maua mai sui e to’a 8 sa tauva.

O le tagi na faaulu e isi sui e toalua sa tauva i le palota, o Lucia Bartley ma Esther Wall, ma ua tulai ai le alii loia o Mark Ude mo i laua nei.

I se vaega o le tagi o lo o taua ai e faapea, o Saulo o se tagatanuu o Samoa, ma e le agavaa ona avea o ia ma se sui tauva mo le Itumalo o Tualauta.

E talitonu sui o lo o tagi i lenei mataupu, e lei tuuina atu i le Ofisa o Palota le pepa fanau o Saulo, e pei ona faatonuina ai isi sui sa tauva mo nofoa o le Maota o Sui.

Fai mai le talosaga, e foliga mai e lei poloaia e Soliai ia Saulo e tuu atu lana pepa fanau ina ia faamaonia ai lona avanoa e avea ai o ia ma sui tauva. O lo o taua foi le taumafai o Wall e fesiligia Soliai i le masina o Oketopa e uiga i lenei mataupu, ae sa faailoa atu i ai e Soliai, pei lava Saulo o se tasi o ona matua sa fanau i Amerika Samoa (one-parent).

E talitonu la Wall ma Bartley e faapea, o le faatamala o le Komesina o Palotaga e ausia aiaiga mo sui tauva i le palota na maea atu nei, ua atagia mai ai lona le tausisia o vaega o le tulafono tau palota.

Fai mai i laua nei, sa faaaoga le sootaga ma le malosi o Soliai ma Saulo faatasi ai ma isi ina ia faatinoina ai le gaioiga lea ua la taua nei, o gaioiga ua soli ai vaega o tulafono tau palota.

I le isi vaega o le tagi sa faaulu e Wall ma Bartley o lo o taua ai e faapea, o se tasi o vaega e talitonu i laua o lo o soli ai tulafono tau palota, e foliga mai sa le malamalama ni isi o tagata palota i le tulafono, ma mafua ai loa ona latou palota mo le sui e toatasi, ae o isi sa palota i sui e sili atu i le toalua.

Fai mai sui o lo o tagi, o le gagana sa faaaoga i pepa palota o lo o taua ai e faapea, e tatau palota tagata i sui e toalua, peitai i le gagana o lo o faaaoga i le tulafono tau palota, o lo o manino mai ai e faapea, e le tatau ona sili atu i le toalua tagata e palota i ai le tagata palota.

Ona o mafuaaga uma e pei ona taua, ua talosagaina ai e Wall ma Bartley le faamasinoga mo sana poloaina ina ia faatino ai tulaga nei; ia faaleaogaina uma palota sa maua e Saulo; ma ia faaleaoga le isi nofoa o le itumalo lea ua ia manumalo ai.

Ua taoto atu nei i le faamasinoga lenei mataupu ma le faamoemoe, o se taimi o i luma o le a faailoa mai ai se aso e fofogaina ai lenei mataupu i luma o alii faamasino.