Ads by Google Ads by Google

Te’ena ona Moliga - fasiotia faia’oga NZ

O se ali’i lanu mai Amerika, ua molia o ia i le fa’amasinoga i le a’ai o Seattle, Uosigitone, ona ua masalomia ua ia fasiotia lona to’alua, o se tama’ita’i faia’oga mai Niu Sila, peita’i ua te’ena e ia ona moliga na.

O le tama’ita’i o Prudence Hockley, 55 ona tausaga, na maliu i le aso Kerisimasi tonu lava, ina ua mae’a fasia o ia e lana uo tama, Johnnie lee Wiggins, o se tasi sa mua’i ‘avea fo’i ma pagota ma e tele ona moliga i lona fa’aaogaina o vaila’au o’ona ma e fa’asaina, e tele o taimi e molia ai i le fa’amisa ma le tele o isi moliga sa ia faia o sauaga fa’aleituaiga.

O lenei tama’ita’i Niu Sila mai Nelson sa a’oa’oina i Canterbury University, na ulufale i Seattle, Uosigitone i le tausaga e 1978. Na fa’ailoa mai e leoleo, na tu’ua e ia lona fale i le itula e 11:00 i le po e talanoa ma lana uo, peita’i, na fa’alogoina e lana tama le ta’avale ua alu ‘ese atu mai lo latou lumafale, ae oso atu lana tama e 13 tausaga i fafo ua ta’atia mai lona tina ua matapogia.

E i ai ni isi sa latou fa’alogoina se pa’o, va’aia se tamaloa ua savali ‘ese atu mai lumafale o lea tama’ita’i, oso i lana ta’avale ma alu ‘ese atu loa. Oso atu i fafo le tama teine a lea tina mai Niu Sila ua ta’atia mai lona tina ua matapogia.

Na maliu lava lea tina i le falema’i i le aso Kerisimasi, ona ua tauga tele le lavea i lona ulu. O le ali’i o Wiggins e 48 ona tausaga, ua ia te’ena moliga nei e fa’asaga ia te ia i le fa’amasinoga i King County e pei ona fa’asalalauina mai i le Channel King 5 a lea setete.

Ua fa’aalia e loia o lo o tula’i mo lea tina, o le a sa’ilia e i latou se fa’ai’uga lelei mai le fa’amasinoga e tusa o lenei ali’i, ina ia mautinoa ua lava le taimi e fa’afalepuipuia ai o ia, aua ua ia fasiotia le tina o lenei teineitiiti i luma lava o ona mata. E le o se mea faigofie i lenei teineitiiti ona va’ai atu o fa’atauga mai fa’apenei lona tina i ona luma.

Ua toe pa nei le aiaiga o le palola a lenei ali’i i Georgia, aua o lo o nofo nei i Uosigitone, ae o lo o leiloa e Ofisa lea po o fea o aga’i i ai le ali’i fa’ao’osala.

O le taimi nei, ua fa’atulaga le tupe e totogia e tatala mai ai i tua i le $5miliona, ae ua fa’anofo ai pea i le to’ese mo le taimi atoa a’o faia sa’iliga ma su’esu’ega a leoleo i ana solitulafono nei ua toe molia ai fo’i. O se tala mai le aiga moni o lenei tama’ita’i faia’oga mai Niu Sila, ua latou fa’ailoa mai ai, “O le oti fa’afuase’i o Prue, o se mea ua fa’ava’atu’ia ai o matou loto uma i lenei vaitaimi fiafia i le lalolagi. Ua misia lenei tagata alofa o si matou aiga. O le tama o Prue sa vala’au mai i Ausetalia ma fa’ailoa i lo latou aiga atoa i Niu Sila le mea ua tupu i lona afafine i Seattle, Amerika.”

Ua fa’ailoa mai, na muamua vala’au mai le tama, ma fa’ailoa, o lo o ua fasia Prue i Seattle, peita’i e tasi le itula na soso’o ai, ae toe vala’au mai ua maliu o ia i le falema’i. “E matua le faigofie lava ona talia nei ituaiga tala pe a o’o mai i se aiga, ae maise lava i taimi o lo o feso’ota’i agaga o tagata uma i vaitaimi e fetufa’iga o aiga, e fa’amanuia atu le tasi i le isi.”

saunia: Leua Aiono Frost