Ads by Google Ads by Google

Te’ena Kovana $1.6 na pasia e le Fono mo le LBJ

Na aofia i saunoaga a afioga Senatoa i se latou iloiloga sa fa’ataunu’uina i le vaiaso ua mavae, ia le tatau ona faia se fa’ai’uga fa’asaga i le ali’i kovana, po o le fa’atula’i ese fo’i, ona o le tele o fa’afitauli matuia ua maitauina, i le fa’afoega o le malo i le taimi nei.

Sa saunoa le afioga Senatoa Galeai Tuufuli, e i ai ala o le tulafono e mafai ai ona fai se fa’aiuga fa’asaga i le taitai o le malo, pe afai e manatu le fono ma le tagata ua fa’aletonu le taitaiga o le malo, ma o lea fa’aiuga e le faia e le Senate, ae o le Maota o Sui o lo o i ai le malosi lea.

O saunoaga a Galeai na tuuina atu i luma o le Senate i le aso Faraile na tea nei, ina ua maea ona fa’alauiloa e le alii peresetene le tusi mai ia kovana Togiola Tulafono, na te te’ena ai le pili tupe e $1.56 miliona, na pasia e le fono, e tu’uina atu mo le falemai o le LBJ.

Saunoa Gaoteote Palaie Tofau, e lagona lona fa’anoanoa ona o le tulaga e pei ona i ai le fa’ai’uga a le alii kovana i pili tupe o lo o galue ai ai le fono mo le falemai, e ui e lagona lona fiafia ona o lo o galulue pea le fono mo le tau sailia o se fofo o le faafitauli mo le falemai.

Na taua e Gaoteote, e ui i le finagalo o le alii kovana i le le lava o le tupe lea e tali ai le manaoga o le falemai o lo o tulai mai, peitai e i ai lona talitonuga, e mafai lava ona maua le  fesoasoani mo le falemai pe afai e maua mai se tupe feololo mai le itu ma lea itu o le malo, nai lo le taumafai e saili se vaega tupe tele ae emo ane le ata e le maua.

Na faatatau le saunoaga a le alii peresetene i le pili tupe e $10 miliona a le kovana lea na tuuina mai i le fono i se taimi e lei mamao atu, lea ua toe tuuina atu i ai lana tusi i le kovana ina ia toe faasao le faaupuina o lea tulafono, lea o loo fuafua le kovana e faatupe mai i pili tupe ia e faaopoopo ai lafoga i luga o oloa e pei o le pia, sikaleti ma le ava malosi, o le pili e faaee ai le lafoga i totogi e 4%, ma le pili e faaee ai lafoga i pisinisi atoa ai ma le isi pili e sii ai totogi o laisene pisinisi i le atunuu.

I le tusi a Togiola i taitai o le fono i le aso Tofi na tea nei, sa ia faafetaia ai i latou mo le galuega i le pasiaina o le $1.6 miliona lea e faatupe mai i tupe faasili o le tausaga tupe 2011 e fesoasoani ai mo le falemai, peitai e i ai lona talitonuga o lea pili tupe e na  o le 2 lava vaiaso e faaaoga ai e le falemai ae maea.

Na faailoa e Togiola i taitai o le fono e faapea, “afai tou te silasila i le vaega tupe lea e manaomia e le falemai e faatupe ai lana tautua, o le tupe lea na outou pasiaina mai e na o se taimi puupuu e foia ai, ae faaauau pea ona tumau le faafitauli tele o loo i ai.”

“O le mea moni, e toe foi lava le falemai o le LBJ i le faafitauli tuai o loo latou faafeagai pe afai e maea ona latou faaaogaina lea vaega tupe,” o le saunoaga lea a le alii kovana.

Saunoa Galeai, o faafitauli ia ua olioli mai i le faatautaiga o le malo, e i’u ina lafotu ai le sa o le atunuu, aua e le gata o lea ua manatu le kovana e galulue le fono mo le faapasiaina o lana pili tupe e $10 e fesoasoani ai mo le falemai, ae o lea foi ua ia faaulu le pili e toe faafoi atu ai le falemai i le malo.

“E leai se tasi o le atunuu na te le o lagonaina le tulaga pagatia ua i ai le falemai, atoa ai ma le manaoga i le tatau lea ona tuu atu se fesoasoani mo le falemai, ua manaomia foi e tagata matitiva ma lima vaivai se fesoasoani i le taimi nei,” o le saunoaga lea a le alii Senatoa.

Na taua e Galeai, e tusa ai ma le tulafono ua pasia, o le faigamalo ua taoto atu i ai le faatautaiga o le malo atoa o Amerika Samoa, ae afai ua le mafai e le faigamalo ona faatino ona tiute, e mafai e le Failautusi o le Initeria ona fesoasoani mai.

Na lagolagoina e le afioga i le alii Senatoa ia Lualemaga Faoa le finagalo o Galeai e uiga i le mataupu lenei, ma ia  faatuina ai le fautuaina ina ia faaulu e le Senate se Iugafono, e talosagaina ai le faataunuuina o le finagalo o Galeai, ma talosagaina ai le Initeria ina ia fesoasoai mai i se taimi vave lava.

“Ua tatou manaomia se fesoasoani, e tatau foi ona tatou sailia se fofo o le faafitauli lea ua tulai mai,” o le saunoaga lea a Lualemanaga, peitai na taua e nisi o sui o le Senate, e le tatau ona faatelevave se finagalo o le maota e talosagaina ai le Initeria o se fesoasoani.

Fai mai nisi Senatoa, afai e tupu lea tulaga, ua tau atu ai e Amerika Samoa i le Initeria, ua ia le mafai ona taitai ma tauave lona malo.

O le finagalo foi lea o le alii kovana ina ua fesiligia e se tasi o tootoo i luga o lana polokalame i le faaiuga o le vaiaso na tea nei, pe aisea e le talosagaina ai le Initeria mo se fesoasoani tau tupe mo Amerika Samoa, saunoa Togiola, afai e faia e le atunuu le mea lena, o lona uiga ua tau atu ai ua le mafa e le Samoa ona foia faafitauli ma taitai lona malo.