Ads by Google Ads by Google

Te’ena Gloria Arroyo Ona Moliga

E ui ina matua ma’i lava, ma ua matua fo’i le tina sa avea ma peresetene o le malo o Filipaina, ae ua fa’ailoa mai e le vaega a le Fa’amasinoga i Filipaina, o lo ’o te’ena e ia ni moliga e fa’asaga ia te ia, e fa’apea ua ia fa’aaoga seseina tupe a lona Malo. O ia tupe ua masalomia ai o ia, o le vaitaimi o kemupeni lea ua fa’asaga nei ia te ia. Ua fa’apea na ia fa’aaogaina tupe a lona malo e togitupe ai ni isi mo lana palotaga.

I le taimi na auina atu ai o ia i totonu o le fa’amasinoga, na aumai sa’o lava o ia mai le falema’i a le militeri, lea e taofia ai o ia, ma togafitia lona maea ario o lona tuasivi ua fa’aletonu, ma ua loa fo’i ona talosagaina o i ai pea le avanoa e faia ai ona togafitiga i fafo mai o Filipaina, ae sa te’ena lava e le ituagai o lona fa’amasinoga lea e fa’atautaia nei.

Na saisaitia mai o ia ia Novema 2011 ina ua taumafai o ia e alu ese mai Filipaina ina ia faia ona togafitiga i Amerika. O le aofaiga o le tinotupe lea e tu’ua’ia ai le tina sa avea ma peresetene, i lona fesoasoani malosi lea e fa’amalo mai sui o lana faigamalo mai itumalo e 12 o le atunu’u ma na to’ai taunu’u lava ona mana’oga i le taimi o le palota.

O lea moliga o se ulua’i moliga lea o le tama’ita’i sa avea ma peresetene ia te ia i luma o le fa’amasinoga a lona malo. O lea fo’i fa’amasinoga, ua avea ma se fa’amalosi tele lea i le ali’i ua avea nei ma Peresetene o le Malo o Filipaina, Benigno Aquino 111, o se tasi mai le vaega fa’a'upufai a le Ituagai i le tama’ita’i o Gloria Arroyo a’o avea ma Peresetene o Filipaina lava. O lana mau na tula’i mai e fai i lona malo, “E vele 'ese mea sese o lo ’o fa’atautaia i totonu o le malo o Filipaina.

Peita’i, e ui i lenei taua tele e faia i tulaga o le fa’amasinoga ma su’esu’ega a loia a itu na lua, ua fa’ailo mai e le tama’ita’i o Arroyo, o lo ’o fa’asagatau mai pea faiga a le Aquino ia te ia, i ona lagona totino ae le o ni mea ua fa’amaonia ua ia fa’ao’o ai o ia i le fa’amasinoga. O Arroyo o le afafine fo’i o se tasi sa avea ma peresetene o lona malo, sa tu’ua’ia lava i le tele o taimi i lana faigamalo, ae peita’i, e leai ma se tasi na mafai ona fa’ao’oina o ia i le nofoa ua ia se’ei ai nei, i luma o le fa’amasinoga.

E tele fo’i taimi sa taumafai ai le to’atele e fa’aleagaina lana faigamalo, ae le’i mafaia lava a’o ia nofoia le nofoa sinia o le faigamalo, le peresetene. Pe afai ae mafai na fa’amaonia e le fa’amasinoga nei tu’ua’iga ua fa’asaga ia te ia i le fa’amasinoga, o lona fa’asalaga e tauau e lokaina ai o ia mo lona olaga atoa i le falepuipui, ae ua 'iloga mai, e tauau e umi lava le iloiloga a le fa’amasinoga i lea mata'upu.

O se mea moni lava, o le va’ai atu i le taimi e fa’aalu mo su'esu'ega ma fa’atautaiga a le fa’amasinoga i sui ua tu’ua’ia ma molia i soligatulafono fa’alemalo, na atoa lelei le 6 tausaga o fa’atautaia le fa’amasinoga o Joseph Estrada lea na muamua lona fa’amasinoga ia Arroyo.

Na saunoa fo’i le to’alua o Gloria, Mike Arroyo i tusitala i fafo o le maota fa’amasino, “O se lagona o lo ’o i lona to’alua, e 'iloga mai o lenei fa’amasinoga e fa’atautaia o se mea ua tu’ua’ia sese ai o ia.” Na ia fa’ailoa mai fo’i, e le o malolo si ona to’alua mai le tiga pea o lona tua, ona o lona ta'otoga e ao ina faia e fa’aleleia ai e le o mafai ona fa’ataunu’uina lea i Filipaina lea e fa’atonu e faia ai, peita’i e mana’omia ona faia lea i Amerika.

saunia: Leua Aiono Frost