O le aso Lulu o le vaiaso lenei na te’a ai i tua mai se falema’i i Honolulu le afioga i le ali’i kovana ia Lolo Matalasi Moliga, ma ua sauni mo le toe malaga mai i le atunuu pe a ma’ea nisi o ana talavai, e pei ona fa’amaonia mai e le afioga i le kovana le tumau ia Lemanu Peleti Mauga, i se feiloaiga ma le au tusitala ma vaega fa’asalalau i le taeao ananafi.

O le aso Lulu “na ma talanoa ai ma le alii kovana i luga o le telefoni, ma ua ia fa’amaonia mai, o ia ua te’a i tua mai le falema’i, ma ua malolo atu i tua i se faletalimalo (hotel) e fa’atali ai le taimi e toe taliu mai ai i le atunuu” pe a ma’a talavai ma isi fonotaga, o le saunoaga lea a Lemanu.

Sa ia saunoa foi, o le vaiaso na te’a nei na tuua ai e Lolo ma lana aumalaga le laumua i Uosigitone ae malaga mai i Hawaii, ma taofia ai loa o ia i le falema’i o Straub i Honolulu i le aso Faraile na te’a nei, ina ua malaga atu le kovana mo le faia o isi ana siaki i le falema’i, ae fautuaina ai e foma’i le tatau lea ona taofia o ia i totonu o le falema’i, mo le faia i ai o ni isi togafitiga i lona soifua maloloina.

Na fai ma sui o le alii kovana ia Lolo le afioga a Lemanu e faafetaia ai le mamalu o le atunuu, faapea ai uo ma aiga sa maua le avanoa e asiasi atu ai ma avatu meaalofa ao i ai le alii kovana i le falema’i i Honolulu.

Na taua e Lemanu e faapea, sa i ai lava le lagona fia mafuta ane o le ali’i kovana i uo ma aiga sa malaga asiasi atu, ae ona o faatonuga mai foma’i ina ia maua lelei se taimi e faamalolo lelei ai lona tino ma lona mafaufau a’o i ai i le falema’i, o le mafuaaga lena e le i maua ai sona avanoa e feiloa’i ane ai ia i latou sa malaga atu e asi o ia i le falema’i.

E ui la o lea ua te’a i tua le ali’i kovana, ae o lo o talosagaina pea ma le fa’aaloalo le atunuu aemaise ai uo ma aiga o lo o fia malaga asiasi atu pea e feiloa’i atu i le alii kovana i Honolulu, ina ia tuu pea le avanoa i le alii kovana e faaauau ai ana malologa a’o i ai i Honolulu, ona o lo o fautuaina e foma’i le tatau pea ona lava se malologa mo lona tino ma le mafaufau, a’o lumana’i ai lona toe taliu mai i le atunuu.

Na faafetaia e Lemanu le atunuu atoa i ta’ita’i o le malo, o le aufai galuega a le Atua aemaise ai uo ma aiga, ona o talosaga e le utuva i le ao ma le po, e talosia ai le gasegase o le ali’i kovana, a’o fa’ataoto lia ai o ia  le falemai.

O lo o i ai faatasi ma le alii kovana i Honolulu lona faletua faapea ai ni isi o sui o lona Ofisa.