Ads by Google Ads by Google

Tauvaga Galuega Fa’atino Fa’asaeanisi

Ua mae’a nei le Fa’aaliga o Galuega Fa’asaeanisi a fanau a’oga ma o le aso lona lua lenei o lea tauvaga, ma e ao ina mae’a ane, ua i ai le tulaga muamua, lua ma le tolu, ua mae’a fa’amasinoina aua so tatou sao mo le fa’aaliga o galuega fa’atino fa’asaeanitisi a setete me teritori uma lava o Amerika.

O le lona 29 lenei o fa’aaliga o lea ituaiga ua faia i le tatou teritori, ma ua matua iloga le aga’i i luma o le gaoiga a le fanau e ala i a latou su’esu’ega i a latou galueuga fa’atino, ma ua iloga fo’i ona maua’a o latou iloa, aua o le tele o fa’afesili e tusa ai o mea ua latou fa’atinoina, ua mafai e i latou ona talia.

E tusa ai ma se faamatalaga a le tamaita’i galue i le ofisa o a’oga, Netini Sene, sa ia fa’ailoa ai, “O se tausaga ese lenei i le tele na’ua o galuega fa’atino ua mae’a fa’atutuina mo le vasega o fa’amasino e fa’asolo atu e siakia ma fesiligia ai le fanau o lo’o latou fa’atinoa. Ua atoa le 139 o poloketi fa’atino o lenei tausaga i le vasega o a’oga maualuluga, ae o le vaega o a’oga laiti e 115 poloketi sa fa’atutuina ai i le aso Lua na te’a nei.”

O poloketi e sili ma le tulaga lua, o galuega fa’atino nei o le a suia Amerika Samoa i le fa’aaliga tele e faia lea ia Me 8-13, 2012 i Pittsburgh, Pennsylvania. O lo’o fa’aalia nei galuega tetele i le Faleta’alo i Kanana Fou ma ua matua fa’atumulia lea fo’i maota i le vasega o fanau a’oga, latou faia’oga, ae maise o nai matua fo’i o lo’o o’o atu  e tapua’ia faia o nai o latou alo i lea fo’i galuega fa’atino e saili ai o latou atamai i le mataupu fa’a-saeanisi.

I le fa’aaliga a le vaega o a’oga tulaga muamua e 115 galuega fa’atino sa fa’aalia ai. O se tasi fo’i lea auala ua iloga ai, ua si’itia le tomai o fanau i lea fo’i mataupu ma ua aga’i i luma a latou taumafaiga e fa’atino o latou tomai i galuega fa’atino fa’asaeanitisi nei, i tausaga ta’itasi.

Ua le gata i lea, ae ua molimauina fo’i e lea sui iloga o le Matagaluega o A’oga, Netini Sene, “Ua tele galuega fa’atino mai isi vaega o le Mataupu Fa’asaeanisi, ae maise i le vaega o inisinia, Soifua Maloloina, Fa’ato’aga, Si’omaga, Matematika, Su’esu’ega o La’au, Afuaga a Amioga a Manu, Masini Komipiuta, Fesuia’iga o Vaila’au, Tulaga o le Aniva ma ona Paneta, Suesuega Fa’asaeanisi o le Gataifale, Vaila’au ma le Soifua Maloloina, ma isi mea fa’apena.”

Ua fa’ailoa mai e le o faigofie le galuega tele a ali’i ma tama’ita’i fa’amasino i lenei fa’aaliga o lenei tausaga, ma ua tele fo’i le sapaia mai e a’oga ma latou ta’ita’i o le tauvaga i lenei tausaga. O se tasi lea o mea ua mata’ina ai fo’i le galulue fa’atasi o matua ma faia’oga ina ia sapaia ma una’ia malosi taumafaiga a le fanau e ala i a latou galuega fa’atino.

O le tula’i mai i tausaga ta’itasi, o tausaga lava e masani ona manumalo i nei galuega fa’atino mo le auina atu i fafo, e maua mai lea i galuega fa’atino a fanau a’oga maualuluga.  O le itula e 2:00 i le afiafi nei o le a mua’i maua ni sui se to’atolu e mauaina le tulaga muamua, le tulaga lua ma le tulaga tolu ma o le a tolaulauina mo le silafia a le to’atele o le a auai i lea itula i Kanana Fou Gym.

O le a fa’aalia atu se ata o le ua fa’amanuiaina ma lana galuega fa’atino i le tatou lomiga o le aso a taeao fa’atasi ai ma ni ata fo’i o isi sa taumafai atili mo lea fa’amoemoe.