Ads by Google Ads by Google

Tauva Taotasi Archie Soliai ma Savali Talavou Ale i le tofi Fofoga Fetalai

Ua faailoa mai le vevela o le tauvaga mo le sailia lea o se Fofoga Fetalai o le Maota o Sui, ina ua faamaonia mai le tauva ai o le afioga i le alii Faipule ia Taotasi Archie Soliai, ma le Fofoga Fetalai o lo o i ai nei o le maota, le tofa Savali Talavou Ale.

O le tofa Savali na amata avea o ia ma Faipule mo lona itumalo i le tausaga e 1981, ma faaauau mai ai lava lona manumalo i palota taitasi seia oo mai i le tausaga nei.

O le faalua ai lea ona tauva o le afioga a Taotasi i le tofi Fofoga Fetalai, ina ua faiaina ia Savali i palota e 11-9 ina ua faatauto Faipule mo le nofoaiga e 32 a le Fono Faitulafono i le aso 3 Ianuari 2011.

O le tausaga e 2006 na uluai filifilia ai Taotasi e avea ma le isi faipule o le Itumalo o Ituau, ma faaauau mai ai lava lona tauaveina o le isi nofoa o le itumalo seia oo mai i le taimi nei.

Na taua e ni isi o faipule e lagolagoina Taotasi e faapea, o le latou fonotaga sa faia i le aso Gafua na tea nei, na toe talosaga atu ai Taotasi ina ia toe tuu atu se isi avanoa e toe tauva ai mo le tofi, e ui sa i ai foi le isi faipule sa naunau e fia tauva i le tofi.

I le faaiuga o lea fonotaga, na malilie ai loa le latou itu o le a toe tuuina atu le avanoa mo Taotasi e tauva ai.

E tusa ai o se faamatalaga ua tuuina mai, e ta’i 9 faipule o lo o lagolagoina Taotasi ma Savali i le taimi nei, ma o lo o faaauau pea ona faia faatosina a itu e lua mo le sailia o ni isi sui se toalua e lagolagoina a latou itu.

E tusa ai o se molimau na tuuina mai i le Samoa News na taua ai, o i latou o lo o lagolagoina le afioga Taotasi, e aofia ai faipule tuai e toa 7 ma faipule fou e toalua, ae o isi sa lagolagoina le isi itu, ua toe suia a latou faaiuga ma ua latou lagolagoina nei le itu a Taotasi.

Mai sui e toa 21 o le maota o sui, e na o le toa 20 e mafai ona palota mo le sailia o se Fofoga Fetalai.

O le toatasi lea e atoa i ai sui e toa 21, o le sui mai le motu o Swains Island, lea e le mafai ona palota i le taimi e faia ai faaiuga a le maota, ae mafai ona palota i iloiloga a komiti.

E tatau ona 11 le aofai o faipule e maua e le sui tauva ona mafai lea ona avea o ia ma Fofoga Fetalai o le maota.

Ae i le taimi lenei e faasolo atu i le aso e faatauto ai faipule i le aso 3 Ianuari, 2013, o le a matua malolosi faiga faatosina a itu e lua, ina ia mafai ai ona faamautu a latou sui e toa 11 e lagolagoina a latou itu.

Ae tusa lava foi pe ua atoa sui e toa 11 a le isi itu, e tatau lava ona matua galulue lena itu ina ia faamausaili a latou sui e toa 11, seia oo atu lava i le taimi e faatautoina ai faipule i luma o le fono.

faaliliu: Ausage Fausia