Masalo ua fai si umi ona amata alo le sa o nisi o a’oga ma autalavou, aua ua fai si umi talu ona amata mai le avanoa lelei e te fa’afo’ia mai ai oloa alamini, atigi apainu e mafai ona toe fa’aliliu ma toe fa’aaoga, ae maua atu sina tupe mo lau a’oga po’o lau autalavou.

Peita’i, e ese mai lena alamanuia, ua i ai le tauvaga tele o aga’i atu i ai ia Tesema, lea e taumafai ai ona maua fa’ailoga tupe fa’atulaga e le kamupani agalelei a le GHC Reid & Co., i Tafuna. “O lenei lava le fa’amoemoe, ia fa’amasani talavou, e fa’afo’i mai nei oloa alamini ma palasitika ina ia fuaina, maua sina vaega tupe e taui ai le galuega, ae toe fa’a’a’asa atili le enesini latou o le autalavou, ia maua fa’ailoga tupe ua ofoina mo i latou e manumalo i le tele na’ua o latou oloa ua fa’afo’i mai!”

O se tala lea a le ali’i Ralph Taufa’asau lea e va’aia atoa lea itu o le tautua.

O le tauvaga lea sa amata mai ia Iulai ae fa’ato’a mae’a ia Tesema, i le vaitau lelei lava o aso fiafia e fa’ai’u ai le tausaga tuai lenei ua toetoe fo’i mae’a.

“E iloa lelei lava o le tele o polokalama fa’atino a le fanau talavou i a’oga ma autalavou fo’i e fa’atino i lea vaitaimi fiafia o le tausaga, ma e lelei lava le o’o atu i ai, ae maua sina mea mai lea fo’i taumafaiga e fesoasoani i a latou polokalama.” O se isi lea ana toe fa’amanatu.

E le faigata ona fa’ao’o atu oloa, aua e i ai le saini e i le tino o fagu ma atigi apa e iloa ai e mafai ona toe fa’aliliu ma toe fa’aaoga.

“Va’aia loa e oe le saini lena, o au na e laina fa’atafatolu, ia o le saini lena e iloa ai so’o se palasitika lava po’o le atigiapa lena e mafai ona e fa’ao’o maia mo lea fa’amoemoe.” Peita’i, ua i ai fo’i le au fa’aleaga mea, ona o le naunau ia mamafa le taga atigi apa, ae ua le amiotonu ai fo’i.

“Ua fa’alilo mai fo’i i le ogatotonu galemu o nei taga apainu ma palasitika ituaiga apa ma palasitika e le mafai ona fa’aliliu, ua fautuaina autalavou uma ma a’oga, aua le faia lena mea, e le toe maua ai lou avanoa lelei e te tauva ai, pe afai o le a i ai ma le le fa’amaoni i si a tatou mea o fai nei.”

E maua lava lea faiga, aua e fuaina loa lau taga ae ova la’ititi le mamafa mai le mea masani ai, ona siakia loa lea, a’o i ai pea oe i le lotoa, ma le isi, i le masini fou ma le tele a le Kamupani ua i ai nei, ua faigofie ona va’aia ai oloa e le tatau ona avea e toe fa’aliliu, ma o i’ina loa e maua sa’o ai lava le tulaga le fa’amaoni o lau autalavou po’o lau a’oga.

Ona ua leva ona oso lea tu’uga, ae o le aotelega o le a fa’atalitali toto’a i ai le au tausinio, e le’i taitai o lo’o lava pea le taimi mo sou sao aoga. O faailoga ua fa’asolo mai le $1,000 tulaga muamua, lua o le $750, tolu o le $500, lona fa o le $250, ma le lona lima e $100, ae o lona ono  e o’o i le 10 e ta’i $75 ma nisi lava fo’i fa’ailoga e tufaina mai fa’asolo atoa i autalavou ma a’oga uma sa tauva.

O fa’amaumauga o lenei tauvaga ua mae’a fa’amauina i le Kamupani a Leala i Tafuna ae toe fa’aulu fo’i e lea kamupani i le Matagaluega o Tupulaga ma Tina mo le latou fa’amaumauga. I le taimi nei e ta’u .25sene le totogi mo le pauna o le alamini ae o le palasitika e leai se tupe e te maua ai i lona mamafa, i le taimi e fuaina ai.

O lo’o sapaia lenei taumafaiga e le Kamupani a Leala, fa’atasi ai ma le Matagaluega o Talavou ma Tina, ae maise o le Matagaluega o Fefa’ataua’iga o le Malo o Amerika Samoa.