Ads by Google Ads by Google

Tausia Ou Oloa - Lalelei Lau Ata

O se lapata’iga matagofie na o’o mai ma le susuga le ali’i foma’i nifo lauiloa i le setete o Utah, Elder Roger Roth ma lona faletua o Sister Juliann Roh i lo la’ua fa’ato’a ulufale mai i Amerika Samoa ma fa’aaoga sina taimi e maimoa ma asiasi solo ai i lala o le la’ua Ekalesia o lo’o galulue ai pea, Ekalesia o le Au Pa’ia a Iesu Keriso o Aso e Gata Ai.

O le la’ua fe’au e matagofie tele mo le lautele o tupulaga talavou ae maise le fanau iti, aua ua fai fo’i si tuai mo i latou ua tino matutua o le atunu’u, ae aoga lava fo’i i ai! “Ia tausia lelei ou Nifo, ia matagofie lau ‘ata, pe ia lalelei mai lau ‘ata!”

O i la’ua o nisi ua leva ona faia a la’ua Ofisa Foma’i Nifo i le setete o Utah i Amerika, ae o se mea sili ua mafai ona la’ua faia, ina ua litaea mai lea galuega tele sa la’ua faia, ma ua tali nei o la’ua saogalemu, ua la’ua filifili e toe o e faia se la’ua galuega fa’amisiona i le la’ua Ekalesia LDS, ma ua filifilia ai e i la’ua le Lotoa i Pesega.

Ua silia ma le 7 masina talu ona la’ua galulue i le Potu Fa’i Nifo i Pesega, ma ua atili ona tinou i la’ua e fa’ataunu’u le la’ua misiona i taimi uma, ona o le tele na’ua o talavou, ua sulufa’i atu mo le la’ua talavai, aua e le o totogia.

Ina ia tima’i fo’i i matua o fanauiti e le’i afaina o latou nifo ona ua leai se puipuiga tele o faia e matua i lea itu, o lea ua mae’a saunia ai e i la’ua se ata video, e mafai ona fa’amatala auiliili ai i le fa’aperetania ma le fa’asamoa fo’i, togafitiga ae maise o aga e fai ina ia mautinoa ua tausia lelei ou oloa.

O nei ata video ua mae’a tu’ufa’atasia, ma ua feoa’i solo lava ma i la’ua i’inei i Amerika Samoa.  I le ulua’i taimi na to’ai taunu’u ai Dr Roger ma Juliann i Amerika Samoa, o le la’ua malaga e fa’atutu i Samoa, peita’i, ua toe asiasi mai, ina ia maimoa lelei i Tutuila ma ua la’ua fa’ailoa mai ai, “O ni tagata lalelei tele tagata Samoa na lua. Peita’i, o lo’o i ai le fa’afitauli lenei, e ao ina mua’i fa’afo’ia, ma ia aoga fo’i i ma’ua i se ma’ua misiona ua tala’ia i’inei, ia fa’asaoina oloa o le atunu’u, ma ia fa’amatagofie atili ai le foliga mai o tagata Samoa fa’atasi ai ma lona si’omaga!”

I le la’ua video ua mae’a tu’ufa’atasia, ua mae’a fa’ailoa ai aga uma e ao ina faia e puipuia ai ou nifo mai fa’ama’i, pe palagia! “Ia mautu lelei ou lagona e te fia suia le va’aiga a tagata lautele ia te oe, ia fa’amatagofie muamua lava oe, aua o oe o le malumalu o le Atua na filifilia!”

O le tama’ita’i o Juliann Roth, o se tasi e pasi lelei ana a’oa’oga o le tausia lelei o foliga, pa’u ma ou nifo fo’i, o le ala lea e galulue fa’atasi ai lava i la’ua, ina ia togafitia e le tasi oloa o le lautele, ae fesoasoani le tasi e tima’ia i latou i aga e ao ina faia, ia mautinoa, ua va’ai lelei oi nifo ma lou foliga mai!

Afai e te fia maua se fesoasoani mai lea fo’i Misiona aoga tele, e mafai ona e fa’afeso’ota’i le susuga Kalili Hunt mo se DVD e fa’aaoga e lou aiga e tima’ia ai i tatou matua i ituaiga mea’ai e ao ina fagaina ai le fanau, ma amioga fo’i ua le toe faia e i tatou a’o fa’asusuina a tatou fanauiti e afua mai lava a’o pepe meamea se’ia o’o ina matutua ma ua mafai e i latou ona fufuina latou nifo.

Pe afai e uma lenei asiasiga a le ali’i foma’i nifo ma le faletua, ona toe o fo’i lea e fa’aauau le la’ua galuega misiona e fa’aleleia atili nifo o le autalavou ma le fanauiti i Samoa.

O nisi nei o misiona sili ona aoga mo le atunu’u, ma ua fa’afiafiaina nei misiona ona o le aoga o le la’ua galuega i tagata lautele.