E le i atoa se itula na iloilo ai e le vaega iloilo iuga la latou fa’aiuga i le mataupu fa’asaga ia Thomas Siaumau i le aso Lulu o le vaiaso na te’a nei, ae tu’uina mai loa le latou fa’aiuga, e nofosala le ua molia i le fa’alavelave sa tu’uaia ai o ia, i lona tafanaina lea o se ta’avale Leoleo a o i ai i totonu se tama’ita’i Leoleo.

Na taua e le malo i le latou tagi, o le po o le aso 14 o Tesema 2017 i tua o le malae Baseball i Tafuna, na tafana ai e Siaumau ma lona nephew e 15 tausaga le matua se ta’avale Leoleo i le fana o le ituaiga o le AK-47.

O moliaga ua ta’usala ai Siaumau e aofia ai le fa’atupu vevesi i nofoaga faitele, umia faasolitulafono o se a’upega fa’asaina, fa’aaoga fa’asolitulafono o se a’upega, 2 moliaga o le fa’aleaga meatotino i le tulaga muamua, fa’aoolima i le tulaga muamua, ma le moliaga o lona faaosooso o se tamaititi laititi e soli le tulafono.

Na solofua e le afioga i le ali’i Fa’amasino Sili lagolago ia Fiti Sunia le moliaga pito sili na mamafa na tu’uaia ai e le malo le ua molia, le moliaga o le taumafai e fasioti se tagata i le tulaga muamua.

Na matua faatumulia le potu fa’amasino i le aso mulimuli i taualumaga o le fa’amasinoga a Siaumau i le mamalu o ali’i ma tama’ita’i Leoleo sa laei a latou toniga. Sa i ai fo’i i totonu o le potu fa’amasino le Komesina o Leoleo ia Le’i Sonny Thomspon ma le Sui Komesina ia Falana’ipupu Ta’ase Sagapolutele.

E le i fa’aalia tele e Siaumau ni ona uiga i le taimi na lau ai le fa’aiuga a le vaega iloilo iuga, e nofosala o ia i le tagi a le malo. Sa talosagaina e lana loia ia Richard deSaulles le fa’amasinoga ina ia fesiligia ali’i ma tama’ita’i iloilo iuga, poo le latou faaiuga autasi uma lea. Ina ua fesiligia ta’ito’atasi ali’i ma tama’ita’i iloilo iuga, sa latou fa’aalia ai, o le latou fa’aaliga autasi uma lava.

Ina ua fesiligia e le Samoa News se tasi o sui o le vaega iloilo iuga e uiga i le latou fa’aiuga, sa ia taua ai e fa’apea, e ui i le malosi o le faafinauga a le itu tete’e i le leai lea o se a’upega na maua e fa’amaonia ai gaioiga sa faia e le ua molia, peita’i na matua fa’amalieina lava i latou i le molimau a le malo, lea sa ia taua lona vaai tino ia Siaumau ma lona nephew o la tafana le ta’avale Leoleo.

Na taua e le loia a le malo ia Christy Dunn i le Samoa News lona fa’afetaia o le galuega a le vaega iloilo iuga, lea ua mafai ai ona taunu’u lenei fa’amasinoga i se taunuuga manuia.

Ae ina ua fesiligia le loia a Siaumau, sa taua ai e deSaulles lona matua le fiafia i le faaiuga a le vaega iloilo iuga.

“E tasi ma le afa vaiaso o matou nonofo i totonu o le potu fa’amasino, ma fa’alogologo i mau ta’itasi sa folasia e le malo. I nei mau uma, e le taitai latalata lenei mataupu i le mafai lea e le malo ona fa’amaonia le latou tagi e aunoa ma se masalosaloga tatau. E pei fo’i ona silafia, na solofua e le afioga i le ali’i Fa’amasino ia Sunia le moliaga pito mamafa o le taumafai e fasioti se tagata sa faia fa’asaga ia Siaumau, ae le i oo i le taimi e amata ai ona valaau e le itu tete’e ana molimau,” o le saunoaga lea a deSaulles.

Na taua fo’i e deSaulles le faateia o ia i le saunoaga a Sunia, mo se avanoa latou te feiloa’i ai ma ali’i ma tama’ita’i iloilo iuga ina ua mae’a ona tu’uina atu la latou faaiuga i luma o le fa’amasinoga.

Sa ia taua atili e fa’apea, e 7 moliaga eseese sa tu’uaia ai Siaumau, o ia fo’i moliaga eseese e tofu lava ma elemeni e tatau ona fa’amaonia, peita’i o le itu e fa’ateia ai o ia, pe fa’apefea ona mafai e le vaega iloilo iuga ona iloilo uma elemeni ta’itasi o nei moliaga e 7 i totonu o le 30 minute sa latou fono ai.

O le taimi nei, ua sauni le itu tete’e e iloilo uma auala e tatau ona uia, ina ia mautinoa e faila le latou talosaga apili mo Siaumau, ina ia sailia ai le mea moni e uiga i lenei mataupu.

O le aso 18 o Aperila o le tausaga nei lea ua fa’atulaga e lau ai le fa’asalaga a Siaumau. Ma ua toe taofia nei o ia i le toese i Tafuna e aunoa ma se tupe e tatala ai i tua.

O le afioga i le Fa’amasili Lagolago Sinia ia Mamea Sala Jr, faapea ai ma le afioga i le Fa’amasino Lagolago ia Tunupopo Alalafaga Tunupopo na lagolago i le afioga a Sunia i le taulimaina o lenei mataupu.

TALOSAGA A LE ITU TETE’E INA IA FA’ATULA’I ESE LEOLEO

Ina ua amata taualumaga o le fa’amasinoga i lona aso mulimuli, na talosagaina ai e deSaulles le fa’amasinoga mo sana poloaiga e fa’atonu ai Leoleo uma sa auai i totonu o le falefa’amasino ma o latou toniga, ina ia latou tuua le potu fa’amasino.

E silia i le to’a 20 leoleo sa laei o latou toniga sa i ai i totonu o le potu fa’amasino i lea taeao. Na faailoa e deSaulles i le fa’amasinoga e fa’apea, sa i ai se feau faapitoa na tuuina atu e le tama’ita’i loia a le malo ia Dunn i luga o le upega o fesootaiga (Facebook), e talosagaina ai se vaega to’atele o ali’i ma tama’ita’i leoleo ina ia auai uma atu i totonu o le potu fa’amasino, ina ia fa’ailoa atu ai i le vaega iloilo iuga lo latou lagolagoina o le mataupu fa’asaga ia Siaumau.

Na taua e deSaulles e faapea, o le auai atu o se vaega to’atele o leoleo i totonu o le potu fa’amasino, o le a fai lea ma auala e fa’alavelave ai i mafaufau o le vaega iloilo iuga, ma ono ese ai sa latou faaiuga. Sa taua fo’i e deSaulles le le tatau lea i le loia a le malo ona ia faia lenei ituaiga amioga o le faia o fesootaiga faapenei i tua a o fa’agasolo le fa’amasinoga.

Na tete’e malosi Dunn i le talosaga a le itu tete’e. Sa ia taua i le fa’amasinoga, e le o ia na faia le fa’asalalauga e pei ona taua e deSaulles i luga o le Facebook. Ae mo le auai ai o Leoleo i totonu o le potu fa’amasino, na taua e Dunn e fa’apea, e i ai fo’i le aia tatau o Leoleo e pei fo’i o tagatanu’u e auai atu ai e fa’alogologo i taualumaga o le fa’amasinoga.

I le fa’aiuga o fa’afinauga a itu e lua, na fautuaina ai loa e Sunia ali’i ma tama’ita’i leoleo, ina ia tuua e le to’atele le potu fa’aasino, ae lava na o le to’a 6 o leoleo o loo laei toniga e nonofo pea i totonu o le potu fa’amasino.

FAAFINAUGA FA’AI’U A LOIA

I faafinauga faaiu a le itu a le malo, na taua ai e Dunn le tatau lea i ali’i ma tama’ita’i iloilo iuga ona latou silasila toto’a i le molimau a le ali’i o J.M, lea sa ia ta’utino i luma o le fa’amasinoga lona vaai ia Thomas ma lona nephew o la tafana le ta’avale a Leoleo.

Na taua e Dunn e fa’apea, tusa lava pe lei maua ni fanau i le fale o Siaumau, ua lava ma totoe le fa’amatalaga a J.M e fai ma mau fa’amaonia e sili atu lona malosi e fesoasoani i le faaiuga e nofosala o ia i lenei mataupu.

Na taua e le ali’i loia ia Daniel Holladay sa suia le itu tete’e i le taimi o fa’afinauga fa’ai’u, e le gata e le fa’amaoni le molimau a J.M, ae leai fo’i ni fana poo ni tulaga lima na maua e mafai ai ona fa’amaonia le tagi fa’asaga ia Siaumau.